यहूदा 1 - नोयरी नोवलू नियम

शुभकामना

¹ यहूदाआ वोलरोत जो प्रभु येशु ख्रिस्ताआ दास अने याकूबो पाही होय ते हादाडल्या आ नावे जे परमेश्वर बाह्हा मेहे प्रिय अने येशु मसीहाआ कोअता सुरक्षित होय.

विश्वासों कोअता संघर्ष

² दया अने शांती अने प्रेम तुमामे खूब जास्ती जोडती रोय.

³ ओ प्रिय, जोवे आय तुमामे तिया उद्धारच्या विषया माय लेखिलो आरी खोब परिश्रमाने प्रयत्न कोईत रोला ओतू ज्याम आमू आखे सहभागी होय, ताहा आय तुमामे ऐ समजीलो आवश्यक जाहा का तिया विश्वासापो रोत पुरो यत्न को जो पवित्र मांहोहो एकुज कावा होप्यू ओतु.

⁴ काहाके का केतो एहलो मांहु बागेज आमा माय आवीत मिलीत गोयलो होय, ज्याआ आमू दंडो वर्णन जुनो टायमोआ माय पहिलुच लेख्यअ गोये ओते अने भक्तीहिन होय, अने आमा परमेश्वराआ कृपाला लबाडीम बदली टाकतले, अने आमाहा एक पोन स्वामी अने प्रभू येशु ख्रिस्ताआ इन्कार कोअतले.

⁵ पोन कदाचित तुमु आखे गोठी एकवा होमजीत गोये होय, तेबी पोन आय तुमामे आय गोठी अने आपुहू इच्छा होय का प्रभूऊ एक कुलोहो मिसर देशोमेरोत सोडविल्या फासाडी विश्वास नाहा आपनारा नष्ट कोईत आप्लु.

⁶ पोन ज्या दूता कोई आपाआ पदाआ स्थिर नाहा मेकल्ये नाहा ताहा आपाआ निसे विश्वाला सोडीत आप्लु, तिये तियाहा तिया भीषण दिहाआ न्याय याकोअता अंधकारा मेहे अनंतकाल, बंधनात मेक्ल्ये आव्ये.

⁷ ज्या रीतीवाही सोदोम अने गोमोरा अने तियाआ जागे पास आ नगरामे, जे याहा एकहरको वाईट काम कोअनारु होतगोयो ओते अने पाक्या डीलोओ फासाडी लागित गोये ओते, आगीही अनंत दंडा मेहे पोडीत दृष्टांत ठरव्येहे होय.

⁸ तिया रीतीवाही अने स्वप्नदर्शी बी आपाआ-आपाआ डीला अशुद्ध कोअता, अने अधिकारोहो बी तुच्छ मानतेहे, अने उचो पद वालाहा हाजो वाईट कोतेहे.

⁹ पोन प्रधना स्वर्गदूत मीकाईल, जाहा शैतानाहा मोशेऐ डील वाद कोयु, ताहा तियाहा हाजो उलटो कोईत दोष लागाडिया हिंमत नाहा कोअयी पण ओ कोयु, “प्रभू ताहु बावराये”

¹⁰ पोन ऐ मांहे ज्या गोठीही नाहा उलखित्लू तियाहा हाजा बक्ता कोतेहे अने ज्या गोठीही अचेतन जनावरे आगाडी स्वभावाइहि जाआत्ले, तीयावाही आपाआ रागावलो नष्ट कोअता.

¹¹ तियापो हाय काहाके का ते कैनकीची चाले साल्ये, अने मोजरी याकोअता बिलाम एकहरको बोलो उवनारा गोये होय, अने कोरह आ एकहरको विरोध कोईत नष्ट उवे होय.

¹² ऐ तुमाआ प्रेम मिटींगोमे तुमाआ आरी खातले पेल, समुद्राम लिकाली चट्टान सारखो होय, अने आपाज पेट पेआडे होंबाला कोअनारे होय; ते पाईनाहा वादोल होय, ज्याहा हपा उडाडीत लेत जाहो; पाने पोडणारे निष्फोल साड होय, जे बेन दा मोईत गोये होय, अने मुलोमेरोत उपटीत गोये होय;

¹³ ओ समुद्राआ जास्ती हिलकोरे होय जे आपाआ लंज्जेचे फेड उस्लित्लू, ओ दावे डोल तारे होय, तीया कोअता कायम जाआ घोर आंदारो मेक्युहू.

¹⁴ हानोक पण जो आदम रोत सातवी पिढी मेहे ओतू, याहा विषया माय ए भविष्यवाणी कोअयी, “पाला, प्रभू आपाआ लाख पवित्र दूतोरी आवयू

¹⁵ का आखाआ न्याय को, अने आखे भक्तीहिनांना तियाआ अभक्तीई आखे कामाआ मुंदु माय जे तिये भक्तीहिन लेत कोयु होय, अने तिया आखे कडक गोठीइ मुंदु माय जो भक्तीहिन पापकोली तियाआ विरोधाम कोयु ओते, दोषी ठेरवीही”

¹⁶ ऐ ताहा असंतुष्ट, कुरकुर कोअत्ले, अने आपाआ सोबिवाही घमंडच्या गोठी गोगत्ले, अने ते लाभ पण लेत सोब पालीत बोडाई कोईत रोत्ले.

प्रयत्नशील बोनित रोवा

¹⁷ पोन ऐ प्रीयांनो, तुमु तिया गोठीही ओर मेका जो आमाआ प्रभू येशु ख्रिस्त प्रेषित पहिलुच कोईत उवे होय.

¹⁸ ते तुमामे कोयो रोत्ले, “फासाडीई दिहोमे एहलो यहा कोअनारे होय जो आपाआ अभक्तीई अभिलाषाआ नुसार चालणारे.”

¹⁹ तेऐ होय जे फुट टाकतले; ऐ शारिरीक मांहे होय, ज्याम आत्माआ नाहा.

²⁰ पोन ऐ प्रीयांनो, तुमु आपाआ अति पवित्र विश्वासामेहे उन्नति अतांवाही अने पवित्र आत्माआ माय प्रार्थना कोअत्लू तेहलाम,

²¹ आपाआ स्वताला परमेश्वरोओ प्रेमा माय बोणाडीत मेका; अने सार्वकालिक जीविलोमेहे याकोअता आमाआ प्रभू येशु ख्रिस्ताच्या दयावाही वात पालीत रो.

²² तियापो जे शंकात होय दया को;

²³ अने ईस्ताहाज आगीम रोत झपटून काडा, पोन तिया दया पण तिया कापडा सी घृणा को जो डीलोओ व्दारे अंकाआ होतगोयो गोये होय.

परमेश्वरोओ स्तुति

²⁴ विसमे जो तुमामे ठोकर खायलापोरोत वाचाआडयो शकतो होय, अने आपाआ गौरवअ जाअखो जनान आगाडी मगन अने निर्दोष कोईत उबु कोहू शकतो,

²⁵ तिया एक पोन परमेश्वर आमाआ उद्धारकर्ता गौरव अने पराक्रम अने अधिकार, आमाआ प्रभू येशु ख्रिस्ताच्या व्दारे जेहलो सनातन काल रोत होय, ओमे बी ओवो अने कायम रोय आमेन.