युहन्ना 9 - नोयरी नोवलू नियम

जन्मोसी आन्दलाहा दृष्टीदान

¹ तो तीहीरोत जातो ओतुताहा तीये एक माहू पाल्यु ते तो जोलोमक्युज आंदलू ओतु.

² तियाआ शिष्यांनी तियाहा फ़ुस्ल्याआ, “ओ गुरुजी, कोडु पाप कोल्यु ओते का ओ आदोलो जन्मला, आव माहुहुं कान याआ याह्ही-वडिलांनी?”

³ येशुनी उत्तर आप्लु, “नाहा तिये पाप कोल्यु ओते नाहा तियाआ याह्ही-वडिलांनी पोन ऐ याकोअता उवे का देवोओ काम तीयाम प्रगट उवे.

⁴ जिये माहु मोक्ल्यीत होय, आमाहा तियाआ काम दीही न दिहोम कारने गरजेए होय; ती रात आविलो होय ज्याम कोडु काम नाहा कोहू सेकेहे

⁵ जोपोरोत आय जगात होय, तो पर्यंत जगाआ प्रकाश होय.”

⁶ ऐ कोत तिये धरतीपो थुंकला, अने तियाअ थुकनाराआ गारू कोल्यु, अने ते गारू तियाअ आंदलाहा डोआहा लागाडी.

⁷ तियाहा कोयु, जा शिलोहाआ तलावूमे तुवीत ले या अर्थ पाठविलेला तियाआ जात तुण्यो, अने पालीलो फासी आवयू.

⁸ तेहलाम जागरयु अने जिये पालील्यो तियाहा भिक मागतले ताहा पाल्लये ओते कोअहु लागाडीत, “नाहाकोत ओतो नाहा, जो बोहित भिक मागित ओतु?”

⁹ किबी कोकानी कोयु, “ओ तोज होय,” दिहरे कोयु, “नाहा” पोन तिया सारखु होय “तो कोयु, आय तोज होय.”

¹⁰ तेहलाम ते तियाहा फुसिलो लागाडीत, “ताआ डोआं केहलो उगड्यो?”

¹¹ तिये उत्तर आप्लु, “येशु नावाआ एक माहुई गारू कोईत, अने माआ डोआहा लागाडी माहु कोयु, शिलोह मेहे जात तोवीत ले, आखरी आय गोल्यू अने तुण्यो अने पालुहू लाग्यू.”

¹² तिये तियाहा फ़ुस्ल्याआ, “तो का होय?” तो कोयु, “माहु नाहा मालुम.”

फरीसी द्वारा चंगायीई जांच-पड़ताल

¹³ मांहे तियाहा जो पहीले आदोलो ओतु परुश्याकडे घेऊन आव्ये.

¹⁴ ज्या तेदीही येशुनी गारू कोईत तियाआ डोआं उगड्यो ओते, तो शब्बाथाआ दीही ओतु.

¹⁵ फासी परुश्याही पण तियाहा फ़ुस्ल्याआ का तियाआ डोआं कोडला रीतीवाही उगाडीत गोयी तो तियाहा कोयु, “तिये माआ डोआंपे गारू लागाड्ये, फासाडी मिती तुवीन लेधलो, अने ओमे पाल्तू.”

¹⁶ यापोरोत किबी परुसी कोहू लागाडीत, “ओ मांहु देवापो नाहा, काहाके ओ शब्बाथाचा दीही नाहा मानीत.” दिहरावाही कोयु, “पापी मांहु एहलो चिन्ह केहलो देखाडहु शकतो?” आखरी तीयाम फुटी पोडीत गोयी.

¹⁷ तिये तियाअ आंदलाहा फासी कोयु, “तिये ताआ डोआं उगड्यो होय तू त्याविषयी नाहाकोत कोत्लू?” तो कोयु, “तो संदेष्टा होय.”

¹⁸ पोन यहुदीयाहा विश्वास नाहा ओवयू का तो आदोलो ओतु अने ओमे पालत्लू, जोपोरोत तियाआ-तियाआ डोआं उगड्यो ओते, याह्ही-वडिलांना हादीत

¹⁹ तियाहा फ़ुस्ल्याआ, “नाहाकोत ओ तुमाआ पोऱ्या होय, ज्याहा तुमु कोअता का आदोलो जन्मूला ओतु? फासाडी ओमे तो केहलु पालीलो होय?”

²⁰ तियाआ याह्ही-वडिलांनी उत्तर आखे, “आमाहा ताहा मालुम होय का ओ आमाआ पोऱ्या होय, अने आदोलो जन्मूला आवयू ओतु;

²¹ पण आमाहा ओ नाहा मालुम का ओमे केहलो पालीलो होय, अने ओ नाहा मालुम का कोडु तियाआ डोआं उगड्यो तो वयोम आवल्यु होय, तीयाहा फुसीत ल्या; तो आपा विषयी स्वताआ कोत आपी.”

²² ए गोठी तियाआ याह्ही-वडिलांनी याकोअता कोयु काहाके ते यहुदियाहा बित ओते, काहाके यहुदी एकमोत बित ओते का जर कोडु कोअही का तो ख्रिस्त होय, ताहा मंदिरो आथोवाही काढ्या जानारू.

²³ या कारनोवांही तियाआ याह्ही-वडील कोयु, “तो वयोम आवयू होय, तीयाहा फुसीत ल्या.”

²⁴ तेहलाम तिये तियाहा मांहाहा जो आदोलो ओतु, दिहरा टायमोमें हादीत तियाहा कोयु, “देवोओ गौरव कोआहू ताहा मोलुम होय का तो मांहु पापी होय.”

²⁵ तियाआ उत्तर आप्लु, “माहु एक गोठी मालुम होय का तो पापी होय कोयो नाहा; माहु एक गोठी मालुम होय का आय आदोलो ओतू अने ओमे पालत्लू.”

²⁶ तिये तियाहा फासी कोयु, “तिये ताआ आरी नाहाकोत कोल्यु? अने कोडला प्रकारे ताआ डोआं उगड्यो?”

²⁷ तो तियाहा कोयु, आयताहा तुमामे कोत आप्लु, “अने तुमु नाहा होमलित; ओमे दिहराहा टायमोमें नाहाकोत होमलुहू होय? नाहाकोत तुमामे पण तियाआ शिष्य बोनीला होय?”

²⁸ तेहलाम ते तियाहा वाईट-हाजो कोत गोग्या, “तांहुज तिया शिष्य होय, आमुतेभी मोशेच शिष्य होय.

²⁹ आमाहा मालुम होय का देवूही मोशेआरी गोठी कोअयी ओती; पण आव मांहाहा नाहा उलखित्लू का कावालू होय.”

³⁰ तिये तियाहा उत्तर आप्लु, एताहा आश्चर्याआ गोठी होय का तुमामे नाहा मालुम का तो कावालू होय, तेबी पण तिये माआ डोआं उगाडीत आप्लु.

³¹ आमाहा मालुम होय का परमेश्वराहा पापी महुअ नाहा होमलित्लू, पण जर देवाआ भक्ति होय अने तियाआ इच्छावाही चालते होय, ताहा तो तियाआ मानत्लू.

³² जगाआ सुरवातीती ओ केधी उनीलाम नाहा आव्ये का कोडु तेबी जन्मापोरोत आंदलाआ डोआं उगड्यो.

³³ जर ओ माहहू देवापो नाहा ओतु, ताहा किबी नाहा कोहू शकत.

³⁴ तियाआ तियाहा उत्तर आप्लु, तू ताहा बिलकुल पापिमे जोल्मो लेदो होय, तू आमाहा नाहाकोत हिकाडत्लू? अने तिये तियाहा बारथे काढीत आप्लु.

आत्मिक आन्दलापन

³⁵ येशुनी होमलित का तिये तियाहा बारथे काढीत टाक्ये, अने जांहा तियाआ आरी भेट उवी ताहा कोयु, “नाहाकोत तू देवाच्या पोऱ्यापो विश्वास कोअत्लू?”

³⁶ तिये उत्तर आप्लु, “ओ प्रभुजी, तो कोडू होय, का आय तियापो विश्वास कोहू?”

³⁷ येशु तियाहा कोयु, “तुयें तियाहा पाल्लये तेबी होय काहा, अने जो ताआ आरी गोठी कोईत होय, तो तोज होय.”

³⁸ ओतो कोयु, “ओ प्रभुजी आय विश्वास मेकोहो.” अने तियाहा नमन कोयो.

³⁹ तेह्लाम येशु कोयु, “आय आव जगात न्यायनिवाडा कोइला कोअता आवयू होय, काहाके जो अने पालीत, अने जे पालल्ते ते आंदले होतगोयो जानारू.”

⁴⁰ परुश्यामरोत जे त्याजागे ओते तिये ओ होमलित तियाहा कोयु, आमाहाबी आंदले होये नाहाकोत?

⁴¹ जे परुसी तियाआ जागे ओते तिये ए गोठी होमलित तियाहा कोयु, जर तुमु आंदले ओते ताहा पापी नाहा ठेरवीही जाहो; पण ओमे कोअते का आमू पालत्लू, याकोअता तुमाआ पाप बोणीत रोनारे.