युहन्ना 7 - नोयरी नोवलू नियम

येशु अने तियाआ पाहि

¹ ई गोठीई फासाडी येशु गलील में फिरयु यहुदी तियाहा मारुह कोअता पालते फिरते ओते, कोईत तियाहा यहुदीयामेहे फीरीईआ इच्छा नाह उवी.

² यहुदी काहाके याचा मांडवाचा तीवारे जागे आवयू ओतु.

³ त्यापोत तियाआ पाहीही तियाहा कोयु, ईहिरोत यहूदिया मेहे जा काहाके जे नोवलोकाम तू कोअतलो ते ताआ शिष्य तिहीभी पालनारू.

⁴ काहाके एहेलू कोडूच ने ओय जो प्रसिद्ध ओवुहू इच्छितो पण गुप्तपणे काम कोअनारू ताहा तू ओ काम कोअतलो ताहा स्वतः जाहा ला जगात प्रकट को.

⁵ काहाके तियाआ पाही पण तियापो कोईत विश्वास निमिले.

⁶ तेहलाम येशु तियाहा कोयु, माआ वेल फासी आवयी नाहा पण तुमा कोअता आखी वेल होय.

⁷ जर जग तुमाआ द्वेष कोईत नाहा पण ते माआ द्वेष कोअता काहाके आय तियाआ विरोधाम साक्ष आपोहो का त्याआं काम वाईट होय.

⁸ तुमु तीवारोमे जा; आय ओमे आव सनात जात नाहा काहाके फासी पर्यंत माआ वेल पुरो ओवयू नाहा.

⁹ तो तियाहा याआ गोठी कोत गालीलामुज रोत गोल्यो.

झोपडी पर्व मेहे येशु

¹⁰ पण जांहा तियाआ पाही तीवारोमे निहित गोये तेहलाम तो स्वतःपण उघडपणे नाहा पण जेहेकाय गुप्तपणे गोल्यो.

¹¹ यहुदी तीवारोमे ओ कोत होदहू लागाडीत, “तो का होय?”

¹² अने माहुमो गुपचुप जास्तीज गोठी ओवल्यु; कोडु कोयु ओते, “तो हाजू माहुहू होय.

¹³ तेबी पण यहुदी पिकेवाही ते तियाआ विषयी उघडपणे गोगीत निमिले.”

पर्व मेहे येशुउ उपदेश

¹⁴ जाहा तीवारोओ आर्धोज दीही निहित गोये; ताहा येशु मंदिरोम जात हिकवोन आपुहू लाग्यू.

¹⁵ तेहलाम यहुदीयाआ चक्कित ओतगोयु कोयु, “ईये हिकल्ये नाहा तेबी ज्ञान कारोत आव्ये?”

¹⁶ येशु तियाहा उत्तर आप्लु, “माआ हिकवन माआ नाहा, पण माहु मोकलिनाराआ होय”

¹⁷ जर कोडु तियाआ इच्चेप सालीला इच्छा कोअत्लू, ताहा तो आव हिकवोणीही होमजीत जानारू का ओ परमेश्वारापोरोत होय किंवा मापोरोत कोयु होय.

¹⁸ जो खुद्पोरोन किबी कोत्लू तो आपाज पालत्लू; पण जो आपाआ मोकलिनास्थाआ गौरव पाल्हू इच्छितो तोज खोरो होय अने तीयाम अधर्म नाहा.

¹⁹ नाहाकोत मुसाई तुमामे नियम आप्लु निमिले? तेबी पण तुमामे केते जोओ नियम शास्रापो चालते नाहा तुमु काहा माहु माईत टाकिलाकोअता मागतले?

²⁰ माहु उत्तर आप्लु, तामेहे दुष्टात्मा होय, कोडू ताहु माईत टाकिलाकोअता मांगत्लू?

²¹ आय एक काम कोल्यु, अने तुमु आखे आश्चर्य कोअता.

²² त्याकोईत मुस्साने तुमामे सुंताआ आज्ञा आप्यी होय (ती मुस्साकडून नाहा पण आगला डायापरोत आवल्यी होय), अने तुमु शब्बाथआ तेदीही सुंता कोअता.

²³ म्हणजे मोशे सुंता आज्ञा टालुहू नाहाकोईत ताहा तुमु मापो काहा त्यापोत रागाकोहे होय का शब्बाथआ तेदीही आय होमला माहुंहु हाजो कोल्यु?

²⁴ “सोब पालहु न्याय कोहू नाहा ताहा खरोज न्याय को.”

येशु मसीह होय के?

²⁵ तेहलाम केते यरुशलेमोमे रोणारे कोहू लागाडीत, “नाहाकोत ओतो नाहा नाहाकोत ज्याहा माईत टाकिलाआ प्रयत्न कोहू रोल्या होय?”

²⁶ पोन पाला, तो ताहा उघडपणे गोगत्लू अने तियाहा कोडु किबी कोयु नाहा, नाहाकोत सरदारांही खरोज होमजीत लेधलो होय का ओच ख्रिस्त होय?

²⁷ याहा ताहा आमाहा ओलखीत्लू का ओ कोडू कावालू होय; पण ख्रिस्त जांहा आविलो तेहलाम कोडोबी मालुम नेशेय का तो कोडू कावालू होय.

²⁸ तेहलाम येशु लेतजा मंदिरोम हिकवन आपित आवाज माईत कोयु, “तुमु माहु ओलखीत अने ओ पण मालुम होय का आय कोरात होय आयताहा स्वतः आवयू नाहा पण माहु मोकलीनारू खोरो होयत्याहा तुमु उलखित्लू नाहा.”

²⁹ आय तियाहा ओलखीत्लू काहाके आय त्यापोरोत होय अने तीयेज माहु मोक्ल्यीत होय.

³⁰ योपो तिये तियाहा तोईला प्रयत्न कोअयु तेबी कोडूच तियापो आथे टाकुहू शकला नाहा काहाके तियाआ वेल फासी आवयी नाहाओती.

³¹ तेबी पण गर्दीमेहे केते माहुहु तियापो विश्वास कोअयु अने कोहू लागाडीत, “ख्रिस्त जांहा आविलो ताहा नाहाकोत यांपोरोत जाखो आश्चर्य काम देखाडीही जे इये देखाडीलाआ?”

येशुहू तोअलो प्रयत्न

³² परुश्याही मांहोहो तीया विषयाम निकाईत-निकाईत गोठी कोअत्लू तेहलाम होमल्यु; अने मुख्य याजक अने पारुश्यानी तियाहा तोओला कोता शिपाई मोकल्यीत.

³³ यापो येशु कोयु, “आय थोडो टायमोपो रोत फासी तुमाआरी होय फासाडी माहु मोकलीनाराही आय निहित जानारू”

³⁴ तुमु माहु होद्ही पण आय जोडनारू नाहा; अने जीही आय होय तीइही तुमु आवहू शकत नाहा.

³⁵ यापो यहुद्यांनी आपसामेहे कोयु, ओ का जानारू का तियाहा आमाहा होदहू सेकेहे नाहा? नाहाकोत तो तियापो जानारू काजे युनानी माय तितर बितर ओतगोयु रोत्ले, अने यूनानीआ पण हिकवन आपी?

³⁶ ए कोडली गोठी होय का ती जीआ कोल्यी का तुमु माहु होद्ही पण आय तुमामे जोडनारू नाहा; अने आय जीही होय तीइही तुमु आवहू शकत नाहा.

जीवनों पाअयो नद्या

³⁷ तीवारो शेवटच्या तेदीही जो मुख्य दीही होय येशु उबु रोला अने हादीत कोयु, जर कोडु तोर्ह्यु होय ताहा मा आहने आव अने पिवा;

³⁸ जो मापो विश्वास कोअनारू होय जेहलो पवित्र शास्त्रात होय तियाआ मोनामेरोत जीवनाआ खाडी वोहीत नीही;

³⁹ तिये ओ वचन पवित्र आत्माआ विषयी कोयु, ज्याहा तियापो विश्वास कोअनारापो उतरीही ओते; काहाके आत्माआ ओमेजा उतरीलो ने ओतू काहाके येशु फासी पण आपाआ गौरवात पुगीतगोयू ने ओतू.

⁴⁰ तेहलाम गर्दीमेहे केते जानोतांहि याआ गोठी होमलित कोयु, “खरोज ओ तोज भविष्यवक्ता होय,”

⁴¹ दिहराहा कोयु, “ओ ख्रिस्त होय” पण केताहा कोयु, “काहा? की ख्रिस्त गालीलोमरोत आविलो?”

⁴² की पवित्र शास्त्रात ओ आव्ये नाहा का ख्रिस्त दाविदाआ कुलोमरोत अने बेथलेहेम गावोमेरोत आविलो जीही दावीद रोत ओतु?

⁴³ कोईत त्यापोत माहुंमे फुट पोडीत गोयी.

⁴⁴ तीयामरोत केते जोओ तियाहा तोईला प्रयत्न कोईत ओते, पोन कोडूच तियापो आथे टाक्यू नाहा

⁴⁵ तेहलाम शिपाया मुख्य याजक अने परुसी जागे फिरीत आव्ये तिये तियाहा कोयु, तुमु तियाहा काहा घेऊन आव्ये नाहा?

यहूदी अगुवोओ विश्वास

⁴⁶ शिपायाआ उत्तर आप्लु, “कोडलाज माहुंऊ खोरोज एहलो गोठी कोअल्यो नाहा”

⁴⁷ पारुश्यानी तियाहा उत्तर आप्लु, की तुमु पण भार्मावून गोये होय की?

⁴⁸ की सरदार अने पारुश्यामरोत कोडु तियापो विश्वास कोअयु होय?

⁴⁹ पोन ऐ मांहे ज्याहा नियामशास्त्र मालुम नाहा शापित होय.

⁵⁰ नीकुदेमुस जो पेल्लु त्याजागे आवयू ओतु अने त्यामेथुं होमला ओतु तियाहा कोयु,

⁵¹ “की आमाहा नियमशास्त्र कोडनीबि माअहुहू जोपोरोत पहीले तियाआ होमलित होमजीत लेत नाहा का तो नाहाकोत कोईत होय दोषी ठरविहो?”

⁵² तिये तियाहा उत्तर आप्लु, “की तू पण गालीलाचा होय? होद अने पाला, का गालीलोमरोत कोडु भविष्यवक्ता प्रकट उवे नाहा नाहाकोत.”

⁵³ तेहलाम आखे आप आपाआ कोआ निहित गोये.