युहन्ना 6 - नोयरी नोवलू नियम

पाच हाजार मांहोहो खावाड्यु

¹ तियाआ फासाडी येशु गलीलआ म्हणजे तिबिर्या समुद्राआ ती पार गोयु.

² अने एक वोडी गोर्दी तिया फासाडी आवहू लागीई काहाके आश्चर्य काम बिमारीवालापो तो देखाडीत ओतु तियाहा तो पालीत ओतु.

³ तेहलाम येशु डोगोपो सोडवीत आपाआ शिष्याआरी बोहित गोल्यो.

⁴ अने यहुदीयाआ वल्हांडण तिवार जागे ओतु.

⁵ जाहा येशु आपाआ डोआं उपो कोईत एक वोडी गोर्दी त्याजागे आविलावेले देखल्यी ताहा फिलिप्पुस कोयु, “आमाहा याहा खाअलाकाजे कोरात रोटा वेसातो लेतआविही?”

⁶ तिये ए गोठी तियाहा फारकीलोकोता कोल्यी काहाके तियाहा स्वतःहा मालुम ओते का तियाहा नाहाकोत कोईओलो होय.

⁷ फिलीप्प तियाहा उत्तर आप्लु, “बेनहोव दिनाराआ भाकर पण यांकोअता उरीलो नाहा का यामेरोते आखाहा थोडो-थोडो मिले”

⁸ तीही शिष्यामेरोत शिमोन पेत्राचा पाही आंद्रिया तियाहा कोयु,

⁹ “इही एक पोऱ्या होय ज्यापो जवोओ पाच रोटा अने बेन मासे होय पण एवढ्या माआहुकोअता ओ नाहाकोत होय?”

¹⁰ येशु कोयु, “माहुंहु बोहाडीत दया” तियाअ जागापो जास्ती चारू ओतुताहा मांहे त्यामेरयू माहुउ खाजगी पाच हजार ओती बोहित गोये.

¹¹ ताहा येशु रोटा लेदिओलो अने आशीर्वाद आपित बोहणाराहा वाटीत आप्लु; तेहलूज मासे पण जेवडे तियाहा लागित ओते वाटीत आप्लु.

¹² जाहा ते खात तृप्त उवेताहा तिये आपाआ शिष्यांआ कोयु, उरिलो तुकडे एखटो कोईत ल्या का किबी टाक्ये न जालो.

¹³ कोईत तियाआ एखटो कोल्यु अने जवोओ पाच रोटाहा तुकाडामरोत खाणारा त्यापोरोत उरिलो ओते ते बारा टोपल्या पोअल्यो.

¹⁴ ताहा जे आश्चर्य काम कोईत देखाडीलाआ तियाहा ते मांहे पालीत कोहू लागाडीत, “तो भविष्यवक्ता जो जगात आविलो ओतु खरोज तोज होय”

¹⁵ येशु ओ होमजीत का ते माहु तोईत राजा बोडाविही होय फासी डोगोपो एखालुज निहित गोल्यो.

येशु पाअयो पोओ साल्यु

¹⁶ जाहा हांजेपो उवी ताहा तियाआ शिष्य गलील समुद्राआ किनारावपो गोये.

¹⁷ अने नावेपो सोडवीत समुद्राआ तिवोल कफर्णहुमात जाऊ लागाडीत त्या टायमोहो रात ओतगोयु गोयी ओती अने येशु ओमेजा तियाआ जागे आव्ये निमिले.

¹⁸ अने वारा उठेत्यामुळे लाटा जोरामे आवुहू लागी.

¹⁹ जाहा ते कोस सवा कोस निहित गोये तेहलाम तिये येशुहू समुद्रापो सालीलावेले अने नावेए जागे आविलावेले पालीत भिईल्यो गोये.

²⁰ पोन तिये तियाहा कोयु, “आय होय; बिही नाहा”

²¹ कोईत ते नावीपो सोडीत तीयार उवे अने लागेज ती नाव तियाअ जागापो पुग्यी जी जागे ते जात ओते.

मांहे येशुहू हुदे वोल्ये

²² दिहरा तेदीही तियाअ गोर्दी जे समुद्राआ तिवोल उबी ओती इही होमला घेडीला सोडीत दिहरी नाव नाहाओती; अने येशु आपाआ शिष्याआरी सोढयू ने ओतू पण फक्त तियाआ शिष्यन गोये ओते.

²³ ताहा दिहरा नाव तीबिर्यामरोत तीही आव्या जीही तिये धन्यवाद आपित रोटा खाद्योओ कोयु

²⁴ यावाही जांहा गोर्दी पालील्यो का इंही येशु अने शिष्य पण नाहा तेहलाम ते नावूमे सोड्या अने येशुहू होदित-होदित कफर्णहुमात पुग्या.

येशु जीवनों रुटू

²⁵ गलीलो समुद्रापलीकडे जांहा ते तियाहा मिल्ये तेहलाम कोयु, “ओ स्वामी, तू इही कोयो आवयू?”

²⁶ येशु तियाहा उत्तर आप्लु, “आय तुमामे खोरोज-खोरोज कोत्लू तुमु माहु याकोअता होदित होय एहलो नाहा का तुमामे आश्चर्य काम देखाये पण तुमु यकोअता आव्ये का रोटा खात तृप्त उवे.”

²⁷ नाश उवानारो खाअलाकाजे मेहनतो कोहू नाहा पण तियाअ खाअलाकाजे जे अनंत जीविलातांहुजा टिके याहा माअहा पोऱ्या तुमाहा आपी काहाके बाह्हू म्हणजे परमेश्वराने त्यापोओ ठासु लागाडयी होय.

²⁸ तिये तियाहा कोयु, “परमेश्वरोओ काम कोइला कोअता आमाहा नाहाकोत कोईओलो?”

²⁹ येशु तियाहा उत्तर आप्लु, “परमेश्वरोओ काम ओ होय का तुमु तियापो ज्याहा तिये मोक्ल्यीत होय विश्वास को”

³⁰ तेहलाम तिये तियाहा कोयु, “फासाडी तुमु कोठले चिन्ह देखाडीत होय का आमाहा तियाहा पालीत तुमापो विश्वास कोअनारू?” तू कोठले काम देखाडीत होय?

³¹ आमू आगला डायाहा जंगलूम मन्ना खाले; एहलो लेखिलो होय; तिये तियाहा खाअलाकोता होर्गामरोत भाकर आप्यी.

³² येशु तियाहा कोयु, आय तुमामे खोरोज-खोरोज कोत्लू का मुस्साने तुमामे ती भाकर ताहा आप्यी नाहा पण माआ बाह्हू तुमामे होर्गामरोत खोरी भाकर आपोहो.

³³ काहाके परमेश्वरोओ भाकर तेज होय जी होर्गामरोत उतरित जगाला जीवोन आपोहो.

³⁴ तेहलाम तिये तियाहा कोयु, ओ प्रभू ए भाकर आमाहा कायम आपित रो

³⁵ येशु तियाहा कोयु, जीवनोओ भाकर आय होय जो मा आहने विश्वास आवत्लू तो केधीज बुख्यो उवे नाहा.

³⁶ पोन आय तुमामे कोयु ओते का तुमु माहु पालील्यो होय तेबी पण विश्वास कोईत नाहा.

³⁷ जे किबी बाह्हू माहु आपोहो ते आखेज मांही येत अने जो कोडु मांही आवत्लू तियाहा आय केधीज काडनारू नाहा.

³⁸ काहाके आय माआ इच्छा नाहा पण माहु मोकलीनाऱ्याआ इच्छा पुरो कोइला कोअता होर्गामरोत उतरीलो होय,

³⁹ अने माहु मोकलिनाराआ इच्छा ए होय काजे किबी माहु आप्लु होय तीयाम आय किबी आरवूहू कायना पण तियाहा शेवटच्या तेदीही फासी जिवंत उठाडे.

⁴⁰ काहाके माआ बाह्हाआ इच्छा ए होय का जो कोडु पोऱ्याहा पालनारू अने तियापो विश्वास कोअनारू तो अनंत जीवोन मेलविनारू; अने आय तियाहा शेवटच्या तेदीही फासी जीवतु उठवीही.

⁴¹ त्यापोत यहुदी तियापो कुरकुर कोहू लागाडीत काहाके तिये कोयु ओते, जी भाकर होर्गामरोत उतरित ती आयुज होय.

⁴² अने तिये कोयु, “नाहाकोत ओ योसेफाआ पोऱ्या नाहा? ज्याआ याह्ही बाह्हू आमाहा ओलखीत्लू? ताहा फासाडी तो केहलु कोत्लू का आय होर्गामरोत खालेआत होय.”

⁴³ येशु तियाहा उत्तर आप्लु, “आपसामेहे कुरकुर कोहू नाहा”

⁴⁴ कोडु मा आहने आवहू शकत नाहा जोपोरोत माआ बाह्हू जीआ माहु मोक्ल्यीत होय तियाहा आकर्षिल्या वासित अने आय तियाहा शेवटच्या तेदीही फासी जिवंत उठवीही.

⁴⁵ भविष्यवाक्ताआ ग्रंथात ओ लेखिलो होय का ते आखे परमेश्वारापोरोत हिकाड्ये होय ज्या कोडावाही बाह्हाप रोत होमल्यु होय अने हिकल्ये होय तो माआ जागे आवत्लू.

⁴⁶ एहलो नाहा का कोडा बाह्हाहा पाल्लये होय पण जो परमेश्वारापोरोत होय तीयेज फक्त बाह्हाहा पाल्लये होय.

⁴⁷ आय तुमाहा खोरोज-खोरोज कोत्लू का जो कोडु विश्वास कोअत्लू अनंत जीवोन तियाआ होय.

⁴⁸ जीवनोओ भाकर आय होय

⁴⁹ तुमाआ पूर्वजांहि जंगलूम मन्ना खादे अने मोईत गोये.

⁵⁰ एती भाकर होय जी होर्गामरोत उतरीत्ले म्हणजे माहुहू त्यामेरोत खाही अने मोअनारू नाहा.

⁵¹ जीवनोओ भाकर जी होर्गामरोत उतरी आय होय जर कोडु आव रोटामरोत खाही तो सार्वकालिक जिवंत रोही; अने जी भाकर आय जुगाआ जीवना कोअता आपी ते माआ माहा होय.

⁵² योपो यहुदी ओ कोत आपसामेहे वादविवाद कोहू लागाडीत ओ माहुहू केहलु आमाहा आपाआ माहा खाहुं आपुहू शकतो?

⁵³ येशु तियाहा कोयु, आय तुमामे खोरोज-खोरोज कोत्लू का जोपोरोत तुमु माअहा पोऱ्याआ माहा खाही नाहा अने तियाआ रक्त पीही नाहा तुमु तीयाम जीवोन नाहा.

⁵⁴ जो माआ माहा खाय अने रक्त पिहों अनंत जीवोन तीयाआज होय; अने आय तियाहा शेवटच्या तेदीही फासी जिवंत उठवीही.

⁵⁵ काहाके माआ माहा वास्तव्याम खाअला वस्तु होय अने माआ रक्त वास्तव्याम पिईला वस्तु होय.

⁵⁶ जो माआ माहा खाय अने माआ रक्त पिहों तो मामेह स्थिर बोणीत रोही अने आय तीयाम बोणीत रोही.

⁵⁷ जेहलो जिवंत बाह्हू मला मोक्ल्यीत होय अने आय बाह्हा वाही जिवंत होय तेहलूज तो पण जो माहु खाही माआ वोजोसे जिवंत रोही.

⁵⁸ जी भाकर होर्गामरोत उतरी एज होय ए तियाअ रोटा हारखी नाहा जीही पूर्वजांहि निसे अने माईत गोये; जो कोडु ए भाकर खाही तो कायम जिवंत रोही.

⁵⁹ याआ गोठी तिये कफर्णहुमात एक मंदिरोमेहे हिकवन आपलो वेले कोयु.

अनन्त जीवनों वचन

⁶⁰ तियाआ शिष्यामेरोत केताहा ओ होमलित कोयु, “याआ कठीण गोठी होय यांहा कोडू होमलीनारू?”

⁶¹ येशु आपाआ मोनामे ओ जाईत लेधलो का याआ गोठीपो माआ शिष्य कुरकुर कोईत होय तियाहा फ़ुस्ल्याआ नाहाकोत याआ गोठीपोरोत तुमामे ठोकायू लागित होय?

⁶² जर तुमु माअहा पोऱ्याहा जीही तो पहीले ओतु तीइही उसे जाआत्लू पालनारू ताहा नाहाकोत उवे?

⁶³ आत्माआ ताहा जीवोन आपणारो होय डीलोवांही किबी फायदा नाहा; ज्या गोठी आय तुमामे कोयु होय ती आत्माआ होय अने जीवोन पण होय.

⁶⁴ पण तुमामेर्ये केतेक जण एहलो होय जे विश्वास कोईत नाहा काहाके येशु पेलरोत होमजाडीत ओतु काजे विश्वास कोईत नाहा ते कोडू होय; अने कोडू माहु तोईत आपी.

⁶⁵ अने तिये कोयु, ह्यामुळेच आय तुमामे कोयु ओते का जोपोरोत ओ वरदान बाह्हाप रोत आप्लु जात नाहा तोपोरोत तो मा आहने आवहू शकत नाहा.

पतरसो विश्वास

⁶⁶ यापो तियाआ शिष्य उलटो फिरीत गोये अने तिया फासाडी त्याआरी गोये नाहा.

⁶⁷ तेहलाम येशु तियाअ बारा शिष्यांआ कोयु, “नाहाकोत तुमामे पण जायलो होय काहा?”

⁶⁸ शिमोन पेत्राई तियाहा उत्तर आप्लु, ओ प्रभू आमाहा कोडाही जायलो? अनंत जीवनाआ गोठी ताहा ताआज जागे होय,

⁶⁹ अने आमाहा विश्वास कोअयु अने होमजीत गोये का परमेश्वरोओ पवित्र जोओ तांहुज होय.

⁷⁰ येशु तियाहा उत्तर आप्लु, नाहाकोत आय तुमाआ बाराना निवडील्ये नाहा? तेबी पण तुमामेरोत एक जोओ शैतान होय.

⁷¹ ओ तिये शिमोन इस्करियोती चा पोऱ्या यहुदाआ विषयाम कोयु ओते काहाके तोज तो बारा मायरोत एक ओतु, तियाहा तोईत आपणारो.