युहन्ना 5 - नोयरी नोवलू नियम

अड़तीस सालोओ रोगिही हाजु कोअयु

¹ ई गोठीई फासाडी यहुदीई तीवार ओतु अने येशु यरूशलेमोम गोयु.

² यरुशलेमोमे एक कुंड होय मेंढरांहा बाअणाआरी ज्याहा इब्रानी भाषम बेथसदा कोयू जात्लू; तियाआ पाच पाडव्या होय.

³ यामे जास्तीज मांदवाड्यू, आंदले, लेंगडे अने उगाल्या डीलोओ (पाई आलीलाआ आशामे) पोडीत रोये ओते.

⁴ काहाके निवडीलिया वेलो पोओ परमेश्वरोओ स्वर्गदूत कुंडा मेहे उतरित कोईत पा आ याहा आलवित कोईत रोते ओते पाई हालताज जो कोई पेल्लू उत्रीत्लू तो हाजु ओत जातु ती कोडी बी बीमारी केहे ने रोय.

⁵ तीही एक माहुहू ओतु तो अडोतीस वर्षापोरोत मांदवाड्यू पोडीत ओतु.

⁶ येशु तियाहा पोडल्ये पालीत ओ मालुम उवेताहा का तो जास्तीज दिहीआ आव परीस्थीतीम पोडीतरोल्यु होय तियाहा फ़ुस्ल्याआ, नाहाकोत हाजो उविलो होय नाहाकोत?

⁷ तिया आजाराम ओतु तियाहा उत्तर आप्लु, “ओ प्रभू माआ जागे कोडु माहुहू नाहा, का जाहा पाई आलाड्ये जाहो तेहलाम माहु पाअयो कुंड मेहे उतरीवीही” पण माआ पुग्लो आगाडीच दिहरू उतरित जात्लू.

⁸ येशु तियाहा कोयु, “उठ, आपाआ खाटलो विस्तीत अने सालता व्हा”

⁹ तो माहुहू लागेज हाजू ओवयू अने आपाआ खाटलो विसित चालीलो फिरूहु लाग्यू.

¹⁰ तो शब्बाथाचा दीही ओतु त्यापोत यहुदी तियाहा जो हाजू ओवयू ओतु, कोहू लागाडीत, आज शब्बाथाचा दीही होय ताहु खाटलो विसिलो योग्य नाहा.

¹¹ तिये तियाहा उत्तर आप्लु, “जीआ माहु हाजो कोल्यु, तिये माहुंज कोयु, आपाआ खाटलो वीस अने सालता व्हा”

¹² तिये तियाहा फ़ुस्ल्याआ, “तो कोडु माहुहू होय जीआ ताहु कोयु, खाटलो वीस अने सालता व्हा?”

¹³ पोन जो हाजू ओवयू ओतु तियाहा मालुम निमिले का, काहाके तियाअ जागाम गोर्दी होयकोत येशु तिहीरोत निहित गोल्यो ओतु.

¹⁴ आव गोठीफासाडी येशु तियाहा मंदिरोम मिल्यू, येशु तियाहा कोयु, “पाला तू हाजू ओवयू होय फासी पाप कोहू नाहा, एहलो उवूंहू नाहा का त्यापोरोत जाखा समस्या तापो आविलो जावा”

¹⁵ तिया माहुंऊ जात यहुदीना कोत आप्लु का जीआ माहु हाजो कोल्यु तो येशु होय.

¹⁶ त्यापोत यहुदी येशु फासाडी लागाडीत, काहाके तो एहलो काम शब्बाथाआ तेदीही कोईत ओतु

¹⁷ यापो येशु तियाहा कोयु, “माआ बाह्हू ओमेजा काम कोईत होय, अने आय पोन काम कोअत्लू”

¹⁸ त्यापोत यहुदी फासी जाखो तियाहा माईत टाकिलाआ प्रयत्न कोहू लागाडीत काहाके तो शब्बाथाआ विधीला तोडत्लू एहलो नाहा ताहा परमेश्वरोओ आपाआ बाह्हू कोत स्वतः परमेश्वारा सारखू ठरावीत ओतु.

सुआआ अधिकार

¹⁹ यापो येशु तियाहा कोयु, “आय तुमामे खोरोज-खोरोज कोयु होय, पोऱ्या स्वतः किबी कोअहू शकत नाहा फक्त तोज जे बाह्हाहा कोअत्लू तेहलाम पालत्लू काहाके ज्या-ज्या कामाकोता तो कोअत्लू तियाहा पोऱ्या पण तियाआ प्रमाणोओ कोअत्लू.

²⁰ काहाके बाह्हू पोऱ्यापो प्रेम कोअत्लू अने जे-जे काम तो स्वतः कोअत्लू ते आखेज तियाहा देखाडोहो; अने तो तियाहा यापोरोत वोडो काम तियाहा देखाडीही म्हणजे तुमु आश्चर्य कोहू सेकतेहे.

²¹ जेहलो बाह्हू मोल्याहा उठाडत्लू अने जिवंत कोअत्लू तेहलूज पोऱ्या पण जो तियाहा गोमत्लू तियाहा जिवंत कोअत्लू.

²² बाह्हू कोडाआ न्याय कोईत नाहा पण न्याय कोईओलो आखे काम पोऱ्याहा होफहोपिन आप्लु होय.

²³ का आखे मांहे जेहलो बाह्हाआ सन्मान कोअता तेहलूज पोऱ्याआ पण सन्मान कोअला जोवे जो पोऱ्याआ सन्मान कोईत नाहा तो बाह्हाआ जीआ तियाहा मोक्ल्यीत होय तियाहा सन्मान कोईत नाहा.

²⁴ आय तुमामे खोरोज कोत्लू जो माआ वचन मानत्लू माहु मोकलीनारापो विश्वास कोअत्लू अनंत जीवोन तियाआ होय; अने तियापो दंड आज्ञा आविलो नाहा पण तो मोईलामरोत पार ओतगोयु जीवनामे प्रवेश कोल्यु होय.”

²⁵ “आय तुमामे खोरोज-खोरोज कोत्लू का ती वेल आवीत होय अने ती वेल ओमे होय, जियाम मोअले परमेश्वरोओ पुत्रोओ आवाज होमले अने जे होमलीनारू ते जिवंत उवे.”

²⁶ काहाके ज्यपोरोत बाह्हू स्वतः माय जीवोन मेकोहो तियाआ प्रमाणोओ तिये पोऱ्याहा पण ओच अधिकार आप्यू होय का, स्वतः माय जीवोन मेकिलो;

²⁷ एवडोज नाहा ताहा न्याय कोईओलो पण अधिकार आप्यू होय, यावाही का तो माअहा पोऱ्या होय.

²⁸ यावांही आश्चर्य कोहू नाहा, काहाके तो वेल आवीत होय का जेवडे कब्रोमेहे होय तिया शब्द होमलीताज निहित आविलो.

²⁹ जीआ हाजो काम कोल्यु होय ते जीवनाआ पुनरुस्थाना कोअता उठनारू अने जीआ वाईट काम कोल्यु होय ते न्यायाआ पुनरुस्थाना कोअता जिवंत उठनारू.

येशु बाराम गवाही

³⁰ आय स्वतः किबी कोहू शकत नाहा; जेहलो मानत्लू तेहलूज न्याय कोअत्लू अने माआ न्याय खोरो होय आय माआ इच्छा नाहा पण माहु मोकलीनाराआ इच्छा जोवे.

³¹ जर आय स्वतः माआ साक्ष कोहू ताहा माआ साक्ष खोरी नाहा.

³² एक दिहरू होय तो माआ साक्ष आपोहो माहु मालुम होय माआ साक्ष जो आपोहो ती खोरी होय.

³³ तुमु योहानाआ फुसुहू लागाडले अने तिये खोरी साक्ष आप्यी होय.

³⁴ पोन आय स्वतः विषयी माहाआ साक्ष नाहा जोवे; तेबी पण आय याआ गोठी यावाही कोत्लू का तुमामे तारण मिलूहु जोवे.

³⁵ तो ताहा बालनारू अने सोमकीनारू दिव ओतू एन तुमामे किबी टाईमापोजा तियाआ उजवोडाम आनंदाम उविला हाजो लागेहे.

³⁶ पोन मांही जी साक्ष होय ती योहानाआ साक्ष पेक्षा वोडी होय काहाके जे काम बाह्हू माहु पुरो कोइला कोअता होपण्ये होय कोअतीज ओ काम जे आय कोअत्लू ते माआ साक्ष होय का बाह्हू माहु मोक्ल्यीत होय.

³⁷ अने बाह्हू जीआ माहु मोकल्यीत होय तीयेज माआ साक्ष आप्यी होय तुमुबीही तियाआ शब्द होमल्यु नाहा अने तिया चेहरू पण पाल्यू नाहा;

³⁸ अने तियाआ वचनाआ मोनुमे स्थिर मेकीत नाहा काहाके ज्याहा तिये मोक्ल्यीत होय तुमु तिया विश्वास कोईत नाहा.

³⁹ तुमु पवित्र शास्त्रामेहे होदतेहे काहाके तुमामे मालुम होय का तुमामे अनंत जीवोन जोळे; अने ओ तोज होय काजे माआ साक्ष आपत्ले;

⁴⁰ तेबी पण तुमु जीवोन मिलविला कोअता मा आहने आवीत नाहा

⁴¹ माहु महांआ त्यापोरोत सन्मान नाहा जुवे.

⁴² पोन आय तुमामे होमजीत्लू का तुमामे परमेश्वरोओ प्रेम नाहा.

⁴³ आय आपाआ बाह्हाआ नावामेहे आवयू होय अने तुमु माहु ग्रहण कोईत नाहा जर कोडु स्वतःआ नावामेहे आवे तियाहा ग्रहण कोईत लेही.

⁴⁴ तुमु जे एकादिहराप रोत सन्मान लत्ले अने तो सन्मान जो फक्त परमेश्वारापोरोत होय लेत नाहा कोडला प्रकारे विश्वास कोहू सेकतेहे?

⁴⁵ एहलो होमज्यू नाहा का आय बाह्हा आगाडी तुमापो दोष लागाडनारू; तुमापो दोष लागाळणारू ताहा मुसा होय ज्यापो तुमु भोरुसो मेकलू होय.

⁴⁶ जे तुमु मुसाआ विश्वास कोअयु ओतलू ताहा माआ पण विश्वास कोअयु ओतलू यामुळे का तिये माआ विषयी लेखिलो होय.

⁴⁷ पोन जर तुमु तियाआ लेखल्यो गोठीपो विश्वास कोईत नाहा ताहा माआ गोठीपो केहलो विश्वास कोअनारू?