युहन्ना 4 - नोयरी नोवलू नियम

येशु अने सामरी बुई

¹ फाशो जाहा प्रभुहु मालुम उवो का परुशीई होमले का येशु योहानो रोत जाआखे चेले बोनावतलु अने तियाहा बाप्तिस्मे बी आपत्लू होय

² कदाचित येशु खुद नाहा तियाआ शिष्य बाप्तिस्मे आपित ओते

³ तेहलाम तो यहुद्यांमे सोडीत फासी गालीला मेहे निघाल्यू,

⁴ अने तियाहा शमरोना मायरोत निहित जाअलोच लागाडीत.

⁵ सुखार नावोओ होमला शमरोनाआ नगरा पर्यत आवयू जे तियाअ धरतीइ जागे होय ज्याहा याकोबाआ आपाआ पोऱ्या योसेफ ला आप्यू ओतु;

⁶ अने याकोबा वेअ होमजीत्लो ओती येशु वातेम थाकल्यु ओतु तियाअ वेअ जागे सहज बोहित गोल्यो ए गोठी सहावू तासा जागे पास उवी.

⁷ तोह्लाम एक शमरोनी बुई पाई पोहुं आवयी येशु तीयीही कोयु, “माहु पाई पिवाड.”

⁸ काहाके तियाआ शिष्य ताहा नगरामे रोटू वेसातो घेण्यासाठी गोये ओते.

⁹ ती सामरी बुई तियाहा तेकोहे, “तू यहुदी ओमेत आय सामरी बुई त्यापोरोत पाई काहा मागित होय?” काहाके यहुदी सामरी आरी कोड्लाज प्रकारचा व्यवहार कोईत नाहा.

¹⁰ येशुई उत्तर आप्लु, “केधी तू परमेश्वरोओ दानाहा ओलखित्लू, अने याहा पण ओलखित्लू का तो कोडू होय जो ताहु कोयु होय, माहु पाई पिवाड, ताहा तू तियाआ त्यापोरोत मागल्यो, अने तो ताहु जिवनाआ पाई आपे.

¹¹ बुई नि तियाहा कोयु ओ प्रभू ताअही ताहा पाई पोईला याकोअता किबी नाहा, अने वेअ उंडो होय; ताहा फासाडी ताआ जागे जिवनाआ पाई किहीरोत आव्ये?

¹² नाहाकोत तू आमाआ बाह्हू याकोब पेक्षा वोडू होय, जीआ आमाहा ए वेअ आप्यी; अने तुमु आपाआ पोऱ्ये, अने आपाआ जनावरे आरी यामरोत पिदो?”

¹³ येशु तियाहा उत्तर आप्लु, जो कोडू ओ पाई पीय तियाहा फासी तीह लागे,

¹⁴ परंतु जो कोडू याआ पाण्या मायरोत पीय जे आय तियाहा आपी, तो अनंतकाल पर्यंत; तरहयु उवे नाहा; नहाते जे पाई आय तियाहा आपही, तो तीयाम एक ओर बोनीत जाय का सर्वकालिक जिविओ याकोअता उकलीत्ला पाअयोओ कुवू एहलो उवे;

¹⁵ बुई तियाहा कोयी, “ओ प्रभू ते पाई माहु आप काहाके माहु तीह लागे नाहा अने पाई पोहुं एतांम सेटू आवे.”

¹⁶ येशु तीही कोयु, “जा ताआ माटी हादीत लेताव.”

¹⁷ बुई तियाहा उत्तर आप्लु, आय बिना वोरोओ होय “येशु तीही कोयु.” तू आरी कोयु होय, “आय बिना वोरोओ होय.”

¹⁸ काहाके तू पाच वर बोनाडहि होय, “अने ज्याआ जागे तू रोत होय तो पण ताआ नवरा नाहालो तू खोरोज कोयू होय.”

¹⁹ बुई तियाहा कोयी, “ओ प्रभू, माहु लागेहे का तू भविष्यवक्ता होय.”

²⁰ आमा पूर्वजांहि याज डोगोपो उपासना कोअयी जोवे यरुशलेम माय होय.

²¹ येशु तीयीही कोयु, “ओ बाय, माआ गोठी उपो विश्वास को का ती एज वेल होय का तू नाहा आव डोगोओ उपो बाह्हाआ उपासना कोइलाआ, नाहा यरुशलेमेम.

²² तुमु ज्याहा नाहा उलखित्लू, तियाआ भक्ती कोअता; अने आमू ज्याहा ओलखीत्लू तियाआ उपासना कोअत्लू; काहाके उद्धार यहुदीया मायरोन होय.

²³ आवहू ती वेल आवीत होय, नाहा ताहा ओमेज होय, ज्याम खोरो भक्त बाह्हाआ उपासना आत्माआ अने खोरो पनानी कोअही, काहाके बाह्हू आपाआ याकोअता एह्लाज माहुंहु होदत्ले.”

²⁴ परमेश्वरआ आत्माआ होय, “अने गरजेए होय का तियाआ उपासना कोअनारे आत्माआ अने खोरो पनानी उपासना कोअता.”

²⁵ बुई तियाहा कोयी, “मांहु मालुम होय का ख्रिस्त जो येशु ख्रिस्त कोयु जात्लू, आवनारू होय; जांहा तो आवे, आमाहा खाजगी गोठी कोत आपे.”

²⁶ येशु तीयीही कोयु, “आय जे ताआ आरी गोगीत होय तोज होय.”

चेला वापस आवया

²⁷ तेताम तेच तियाआ शिष्य फासी आव्ये, अने आश्चर्य कोअला लागाडीत का तो बुई आरी गोठी कोईत होय; तेबी किबी फ़ुस्ल्याआ नाहा, “ताहु नाहाकोत जोवे?” “काहयो कोअता तियाआरी गोठी कोईत होय?”

²⁸ तेहलाम बुई आपाआ घागर सोडीत नगरामे निहित गोयी, अने माहुंहु कोहू लागीई,

²⁹ “आव एक महांआ ला पाला, जीआ आखे किबी जे आय कोल्यु ते माहु कोत आप्ये केधी ओच ताहा ख्रिस्त नाहा?”

³⁰ आखरी ते नगरामारोत निहित तियाआ जागे आवी लागाडीत.

³¹ याआ माय तियाआ शिष्यांनी येशु ला ए विनंती कोअयी, “ओ रब्बी, किबी खातले.”

³² पोन तिये तियाहा कोइतलु, “मांही खाअलाकोता एहलो रोटू होय ज्याहा तुमु उलखित्लू नाहा.”

³³ तेहलाम शिष्यांनी आपसामेहे गोग्या, “नाहाकोत कोडु तियाआ याकोअता कोडु खाहुं लेत आवयू होय?”

³⁴ येशु लेतजा तियाहा कोयु, “माआ रोटू ओच होय का माहु मोकलीणारा च्या इच्छा नुसार चालीलो अने तियाआ काम पुरो कोहू.

³⁵ नाहाकोत तुमु नाहा कोयु, वाडीलो उविला कोअता चार मोयना बाकी होय पाला, आय तुमामे कोत्लू, आपाआ डोआं उगाडीत खेताम जागे नजर लागाडा का ते वाडीलो याकोअता पाकीत गोये होय.

³⁶ वाडीलो कोअनाराहा मोजरी जोळे अने सार्वकालिक जिविओ याकोअता फोले जमा कोअत्लू, काहाके पेअनारू अने वाडीलो कोअनारू बेनु मिलून आनंद कोअही.

³⁷ काहाके इंही ए कहावत होय पेईलो कोअनारू अने फाशी होय वाडीलो कोअनारू फाशी,

³⁸ आय तुमामे ते खेत वाडीलो याकोअता मोकल्ये ज्याम तुमु काम नाहा कोयु दिहराआ परिश्रम अने तुमु तियाआ मेह्नोतोहो फलोमे गोवाद्या होय.”

सामरी मांहे विश्वास कोअये

³⁹ आव नगरामेहे जाअखो एहला शमरोन्यांनी तियाअ बुई च्या कोल्यावाअहि येशु उपो विश्वास कोअयु; काहाके ती लेतजा ए साक्ष आप्यी ओती; तीयी आखे किबी जे आय कोल्यु होय, माहु कोत आप्लु.

⁴⁰ याआ याकोअता जांहा ते सामरी तिया जागे आव्ये, ताहा विनती कोअला लागाडीत का आमा का ईहि रो आखरी तो तिही बेन दीही पर्यत रोला.

⁴¹ तियाआ वचनाआ कारनावाही अने जाअखो जानोतांहि विश्वास कोअयु.

⁴² अने तियाअ राती ला कोयु, “ओमे आमाहा कोअलावाहीज विश्वास कोअयु नाहाकोईत; काहाके आमाहा ताआज कानून होमलित लेधलो, अने ओलखीता येत का ओ खरोज जगाआ उद्धारकर्ता होय.”

⁴³ फासाडी तियाअ बेन दिह फासाडी तो गालीला मेहे गोल्यो.

⁴⁴ काहाके येशु आपाज साक्ष आप्यी का भविष्य कोआनारी आपाआ तियाहा आदर नाहा मिलीअलो.

⁴⁵ जाहा तो गालीला मेहे आवयू, ताहा गालीली आनंदावाही तियाहा मिल्ये; काहाके आपारी काम तिये यरुशलेमेम पूर्वीच्या वेले कोल्यु ओते, तिये आव आखाहा पालील्यो काहाके ते पण पूर्वी गोये ओते.

राजकर्मचारीई सुआहा हाजु कोअयु

⁴⁶ तेहलाम तो फासी गालीलाआ कानामे आवयू, जीही तिये पाअयोओ द्राक्षरस बोनाड्यू ओतु तिही राज्याआ एक कर्मचारी आवयू ओतु ज्याचा पोऱ्या कफरनहूम मध्ये मांदवाड्यू ओतु.

⁴⁷ तो ऐ होमलित का येशु यहुदिया पोरोत गालीला मेहे आवीत गोल्यो होय, तियाआ जागे गोल्यो अने तियाहा विनंती कोअला लाग्यू का जात माआ पोऱ्याहा हाजो कोईओलो; काहाके तो मोईलाकाजे टेकल्यू ओतु.

⁴⁸ येशु तियाहा कोयु, “जो पर्यत तुमु चमत्कार अने अदभुत काम नाहा पालनारू तो पर्यत, कदाचित विश्वास कोअनारू नाहा”

⁴⁹ राज्याआ कामकोअनाराही तियाहा कोयु, “ओ प्रभू पोऱ्याआ मोरण उविला आगाडी साला.”

⁵⁰ येशु तियाहा कोयु “जा, ताआ पोऱ्या जीवतु होय.” तियाअ मांहुहू कोयु गोठीई विश्वास कोईत निहित गोल्यो.

⁵¹ तो वातीमेज ओतु तियाआ दास तियाहा आवीत जोडयेहे अने कोहू लागाडीत, “ताआ पोऱ्या जिवंत होय.”

⁵² तिये तियाहा फ़ुस्ल्याआ, कोडला वेले तो हाजू ओवुहू लाग्यू? तिये तियाहा कोयु, “काल एक वाजता दिहे तिया जोरू उतरीलो?”

⁵³ जयो बाह्हू होमजीत लेधलो का ते याज वेळेला उवे, का येशु तियाहा कोयु, “ताआ पोऱ्या जीवतु होय.” अने तिये अने तियाआ आखे कोऱ्यामे विश्वास कोअयु.

⁵⁴ ओ दिहरू आश्चर्य काम ओते जे येशु लेतजा यहुदिया मायरोत आवीत गालीला मेहे आवयू.