युहन्ना 3 - नोयरी नोवलू नियम

येशु अने नीकुदेमुस

¹ फरीसी मेहे रोत नीकुदेमुस नवाआ एक माहू ओतु जो यहुदीयाआ सरदार ओतु.

² तिया तो राती येशुउ जागे आवीत तियाहा कोयु, ओ गुरुजी, आमाहा मालुम होय का परमेश्वारापोरोत गुरु होतगोयो आवयू होय, काहाके कोडु आव चिन्ह जे तू देखाडत्लू, जर परमेश्वर तियाआ आरी नाहा ताहा नाहा हिकवीही शकत.

³ येशु तियाहा उत्तर आप्लु, “आय तुमामे खरोज कोत्लू का, जर कोडु नविनफासो जन्मला नाहा ताहा देवोओ राज्य पालहू नाहा शकत.”

⁴ नीकुदेमुस तियाहा कोयु, “मांहु जांहा डायु ओत गोयो, ताहा केह्काय जोल्मो उवहू शकतो? नाहाकोत तो आपाआ याह्हीई पेटाम ईजी प्रवेश कोईत उवहू शकतो?”

⁵ येशु उत्तर आप्लु, आय तुमामे खरोज कोत्लू, जोपोरोत कोडु मांहु पायोंपोरोत अने आत्माम रोत जोन्म्या वासित ताहा तो देवोओ राज्यम प्रवेश नाहा कोहू शकत.

⁶ काहाके जो डीलोवांही जन्मला होय, तो डील होय; अने जो आत्मा पोरोत जन्मला होय, तो आत्माआ होय.

⁷ सहारू नाहा कोहू का ती तुमामे कोल्यी होय, ताहु नविनफासो जोल्मो घेण्यासाठी गरजेए होय.

⁸ वारू जीई वोहत्लू तीई वोहत्लू अने तू तियाआ शब्द मानत्लू, पण नाहा होमजाडीत का ती कारोन येत अने का जाहो? जो कोडु आत्माम रोत जन्मला होय तो एहलो होय.

⁹ नीकुदेमुस तियाहा उत्तर आप्लु, “आव गोठी केहलो ओवुहू सेकतेहे?”

¹⁰ ओ होमलित येशु तियाहा कोयु, “तू इस्राएलाआ गुरु ओमेत पोन नाहाकोत आव गोठीकोता नाहा होमजाडीत?

¹¹ आय तुमामे खरोज कोत्लू का आमाहा जे होमजीत्लू तोज केते, अने ज्याहा आमाहा पाल्लये होय तियाआ साक्ष आपत्ले, अने तुमु आमाआं साक्ष ग्रहण नाहाकोईत.

¹² जाहा आय तुमामे धरतीई गोठी कोयु अने तुमु आमाआं साक्ष ग्रहण नाहाकोईत, जर आय तुमामे स्वर्गाची गोठी कोहू ताहा फासाडी केहलु विश्वास कोअनारू?

¹³ कोडु स्वर्गापो नाहा सोड्या, फक्त तोज जो होर्गामरोत उतरीलो, म्हणजे माअहा पोऱ्या जो होर्गाम होय.

¹⁴ अने ज्या रीतीवाही मोशेवाही जंगलूम सापाला उचो कोअयु, तियाआ रीतीवाही माहा होय का माअहा पोऱ्या पण उसापो सोढया जावा,

¹⁵ यकोअता का जो कोडु तियापो विश्वास मेकही तियाहा सार्वकालिक जीवोन जोडयो उवे

¹⁶ काहाके देवूही जुगोपो एहलो प्रेम कोल्यु का तिये आपाआ एखलूच एक पुत्र आप्यू, यकोअता का जो कोडु तियापो विश्वास मेकोहो तिया नाश ओवुहू कायना ताहा तियाहा सार्वकालिक जीवोन जोडीत.

¹⁷ देवूही आपाआ पोऱ्याहा याकोअता नाहा मोक्ल्यीत का जगाआ न्यायनिवाडा कोइला कोअता नाहा, पण याकोअता का जगोवाही तियाआ व्दारे तारण उवे.

¹⁸ जो तियापो विश्वास मेकोहो, तिया न्यायनिवाडा नाहा उवनारा, पण जो तियापो विश्वास नाहाकोईत, तो सुकीत जोडत्लू; याकोअता का तिये देवाआ एखलूच एक पुत्राच्या नावापो विश्वास नाहाकोईत.

¹⁹ अने न्यायनिवाडा मुळे ओ होय का प्रकाश जगात आवयू होय, अने माहुहीई अंधाराहा उजवोडा पेक्षा जाखो प्रिय कोल्यु काहाके तियाआ काम वाईट ओती.

²⁰ काहाके जो कोडु वाईट कोअत्लू, तो उजवोडाआ तिरस्कार कोअत्लू, अने उजवोडोओ जागे नाहा आवीत, नाहा एहलो नाहा ओवो का मापो दोष लागाड्यू जानारू.

²¹ पोन जो खोरापोओ चालीलो, तो उजवोडा जागे आवत्लू, याकोअता का तियाआ काम प्रगट उवे का तो देवापो ओवल्यु होय.”

येशुउ विषय युहन्नाआ गवाही

²² तिया फासाडी येशु अने तियाआ शिष्य यहुदिया प्रांतात आव्ये; अने तो तीइही तियाआ आरी रोत बाप्तिस्मे कोअला लाग्यू.

²³ योहान पण शालिमा जागऱ्या एनोन गावोम बाप्तिस्मे कोईत ओतु, काहाके तीइही खूप पाई ओते, अने मांहे आविलो बाप्तिस्मे लेत ओते.

²⁴ योहान त्या टायमोहो पर्यंत जेलूम नाहा टाक्यू गोल्यो ओतु

²⁵ तीइही यूहन्ना शिष्यांआ कोडला यहुदीआरी शुद्धी कोइला विषयि वादविवाद ओवयू,

²⁶ अने ते योहानाही आविलो तियाहा कोयु, “ओ गुरुजी, जो माहहू यरदोनो जागे ताआ आरी ओतु, अने ज्याआ साक्ष आप्यी ओती; पाला, ते बाप्तिस्मे आपित, अने आखे जोओ तियाआ जागे आवत्ले.”

²⁷ योहानाई उत्तर आप्लु, “जो पर्यंत मांहाहा होर्गामरोत नाहा आप्या जानारू, तोपोरोत तो किबी नाहा मेलवूहु शकत.”

²⁸ तुमु ताहा स्व ताच माआ साक्ष होय का आय कोयु, आय ख्रिस्त नाहा, पण तियाआ आगाडी मोकलील्यो गोल्यू होय.

²⁹ ज्याआ लाडी होय, तोज वर होय, पण वरोओ हेगांति जो उभे रोत तियाआ मानत्लू, तियाहा वोरोओ शब्दापोरोत जाखो आनंद ओतू ओमे माआ ओ आनंद पुरो उवे होय.

³⁰ अवश्य होय का तो वोड़े अने आय कोम उवे.

³¹ “जो उसेरोत आवत्लू आखाआ उपो होय, जो धरतीपोन आवत्लू तो धोरतीई होय, अने धोरतीइ गोठी कोतले जो होर्गापोरोत आवत्लू तो, धरतीई उपो होय.”

³² जे किबी तिये पालील्यो अने होमल्या होय, तीयाआज साक्ष आपोहो; अने कोडु तियाआ साक्ष ग्रहण नाहाकोईत.

³³ जीयाई तियाआ साक्ष ग्रहण कोईत लेदि तिये आव गोठीपोरोत शिक्का लागाडी आप्यी का देव खोरो होय.

³⁴ कोईत ज्याहा परमेश्वराने मोक्ल्यीत होय, तो परमेश्वरोओ गोठी कोत्लू; काहाके तो आत्माआ परिमित नाहा आपित.

³⁵ बाह्हू पोऱ्यापो प्रीती कोअत्लू जीआ आखे वस्तू तियाआ आथे आप्यी होय.

³⁶ जो पोऱ्यापो विश्वास मेकोहो, सार्वकालिक जीवोन तियाआ होय; पण जो पोऱ्याआ नाहा होमलीतु, तो जीवनाहा नाहा पालीलो, पण देवाआ राग तियापो रोतलू.