युहन्ना 19 - नोयरी नोवलू नियम

साप्का देअलो अने मजाक उड़ाडलोओ

¹ ऐ ओ कोईत पिलातुस येशुहु चापके देवाडले.

² शिपायाआ काटाआ मुकुट गुंथवून मुंडकापो मेक्या एने तियाहा जांबले कापडे पेआड्या,

³ अने त्याजागे आविलो कोहू लागाडीत, “ऐ यहुद्याआ राजा नमस्कार,” अने तियाहा थापोड पण देदा.

⁴ तेहलाम पिलातुसो वांही फासी बारथे निहित माहुंहु कोयु, “पाला, आय तियाहा तुमापोओ बारथे फासी लेत आवलू; म्हणजे तुमु होमजुत्लू का माहु यामे किबी दोष जोड्यू नाहा.”

क्रूस पोओ सोडवुहू होप्यु

⁵ तेहलाम येशु काटाआ मुकुट अने जांबडे कापडे कालीत बारथे आवयू अने पिलातुसो वांही तियाहा कोयु, “पाला, ओ माहु”

⁶ जाहा मुख्य याजक अने तियाआ शिपायाआ तियाहा पालील्यो तेहलाम आयडीत कोयु, याहा क्रूसपो सोडवा, क्रूसपो सोडवा पिलातुसो वांही तियाहा कोयु, तुमु च तियाहा घेऊन क्रूसपो सोडवा काहाके यामे माहु किबी दोष देखाईत नाहा.

⁷ यहुदी इये उत्तर आप्लु, अने तियाअ नियमानुसार तो माईत टाकिलाआ योग्य होय काहाके तिये स्वतः ला परमेश्वरोओ पुत्र बनविल्यो.

⁸ जाहा पिलातुसो वांही याआ गोठी होमल्याहा ताहा फासी जाखो भिईलो.

⁹ अने राजवाडाम गोल्यो अने येशुहू कोयु, “तू कोडू कावालू होय?” पण येशु तियाहा किबी उत्तर आप्लु नाहा.

¹⁰ यापो पिलातुसो वांही तियाहा कोयु, माआरी काहा गोगीत नाहा? कि ताहु मालुम नाहा का ताहु सोडीत आपलो अधिकार माहु क्रूस होय.

¹¹ येशु उत्तर आप्लु, जर वरून आप्लु कायना ओतो, ताहा ताआ मापो किबी अधिकार रोला नसते त्यापोत जीआ माहु ताआ आथोमेहे तोईत आप्लु होय तियाआ पाप जाखो होय.

¹² त्यापोरोत पिलातुसो वांही तियाहा सोडीत आपलो ठेरव्यो पण यहुद्यांनी आयडीत-आयडीत कोयु, जर तू याहा सोडीत आपी ताहा ताआ सेवा कैसराहि दोस्त नाहा जो कोडु स्वतः ला राजा बनवितो तो केसराआ विरूध जात्लू.

¹³ याआ गोठी होमलित पिलात येशुहू बारथे घेऊन आवयू अने तियाअ जागापो चबुतरा ओतु जो इब्रानी भाषम गब्बाथा कोतेहे अने तीही न्यायासणापो बोहयु.

¹⁴ ओ वल्हांडण तिवाराआ तियारीइ दीही ओतु अने सहावू तासा सुमारास ओतु तेहलाम तिये यहुद्याआ कोयु, “पाला, तुमाआ राजा”

¹⁵ पण ते आअडीलो, “घेऊन जा घेऊन जा तियाहा क्रूसपो सोडवा” पिलातुसो वांही तियाहा कोयु, “नाहाकोत आय तुमाआ राजाहा क्रूसपो सोढवूहू?” मुख्य याजकाआ उत्तर आप्लु कैसरहा सोडीत आमाआ कोड्लूच दिहरू राजा नाहा.

¹⁶ तेहलाम तिये तियाहा तियाआ आथोमेहे होफहोपिन आप्लु म्हणजे तो क्रूसपो सोडाव्यु जानारू.

क्रूस पोओ सडावलोओ

¹⁷ तेहलाम ते येशुहू घेऊन गोये अने तो आपाआ क्रूस विसित तियाअ ठीकानोपो बारथे गोल्यो जी मुलकाआ ठिकाण कोत्ले अने इब्रानी माय “गुलगुथा” कोयु जाहो.

¹⁸ तीइही तिये तियाहा अने त्याआरी बेन मांह्हू क्रूसपो चोढावीत एकाहा यीबाजुहू अने दिहीराहा तियाअ सेटे अने येशुहू माय.

¹⁹ पिलातुसो वांही एक दोषपत्र लेखित क्रूस लागाडी आप्यू अने तीयाम ओ लेखिलो ओते, “नासरेथ चा येशु यहुद्याआ राजा”

²⁰ ओ दोषपत्र जास्तीज यहुद्यांनी वाचले, ते ठिकाण जीही येशुहू क्रूस चोढावीत ओते नगरा जागे ओते; अने पत्र इब्रानी, लातिनी, अने युनानी माय लेखिलो ओते.

²¹ तेहलाम यहुद्याआ मुख्य याजकाने पिलातला कोयु याहुद्याचा राजा नाहा लिखेहू पण एहलो लेख का तियाहा कोयु आय याहुद्याचा राजा होय

²² पिलातुसो वांही उत्तर आप्लु आय जे लेखित आप्लु म्हणजे लेखित आप्लु.

²³ जाहा शिपाई येशुहू क्रूसापोओ चोढावीन उवेताहा तियाआ कापडे घेऊन तियाआ चोर भाग कोल्यु हर एक सैनिका कोअता एक भाग अने झगा पण लेदो पण झगा हिवाळल्यू ने ओतू पण वरून निसेजा तीयार हिवल्यो ओतु.

²⁴ त्यापोत तिये आपसामेहे कोयु, आपु याहा फाडीला नाहा पण ह्यापो चिठी टाकुहू का ओ कोडाआ उवे ओ आव याकोअता उवे का पवित्र शास्त्रात जे लेखिलो ओते ते पुरो उवे, “तिये माआ कापडे आपसामेहे वाटीत लेधलो, अने माआ पोतडापो चिठी टाक्यी.”

येशु तिया याह्ही कोअता प्रावधान

²⁵ कोईत शिपायाआ तेहलूज कोल्यु येशुउ क्रूस तियाआ याह्ही अने तीआ बोईही अने क्लोपाची लाडी मरिया अने मरिया मग्दलिनी उबे कोयु.

²⁶ जाहा तिया याह्ही अने तियाअ शिष्यांआ ज्यापोओ तो प्रेम कोअला जागे उभे होयतो पालील्यो तेहलाम आपाआ याह्हीही कोयु, “ओ बाय, पाला, ओ ताआ पोऱ्या होय”

²⁷ तेहलाम तिये शिष्यामे कोयु, “ए ताआ याह्ही होय,” अने तियाअ टायमोपो रोत शिष्य तीही आपाआ कोआ घेऊन गोल्यो.

कार्य पुरो ओवयो

²⁸ इयाफासाडी येशु होमज्ये का ओमे आखे पुरो उवे होय त्यापोत पवित्र शास्त्रात जे कोयु होय, ते पुरो उवूंहू जोवे कोईत कोयु, “आय तोर्ह्यु होय”

²⁹ तीइही आंब पोईत मेकीत्तरोल्यू एक बासणा ओते कोईत तिये स्पंज आंब्यात बुडालीत ते स्पंज जुफावर मेकीत तियाआ सुबीप लागाडले.

³⁰ जाहा येशु तो आंब लेदो, तेहलाम कोयु, “पुरो उवे, अने मुंडको निसे कोईत जीव सोड्यू.”

येशुहू भालू गुप्या

³¹ यामुळे का तो तियारीइ दीही ओतु यहुद्यांनी पिलातला विनंती कोअयी तियाआ गुडू तोडीदे अने निसे उतरविला होय म्हणजे ते शब्बाथाआ तेदीही क्रूस रोही नाहा काहाके तो शब्बाथाचा दीही वोडू दीही ओतु.

³² कोईत शिपायाआ आविलो तियाअ माहामोरोत पाललेआ गुडू तोडये; अने फासाडी दिहराआ पण जो तियाआ आरी क्रूसपो सोडवियू ओतु

³³ पोन जाहा आविलो पालील्यो का तो माईत गोल्यो होय कोईत तियाआ गुडू तोडये नाहा.

³⁴ पोन शिपायमरोत एकाने तियाहा डाफावांहि तियाआ खुशीम जाअयें अने तियाआ मायरोत लागेज रक्त अने पाई निकलीलू.

³⁵ जीआ ओ पालील्यो तिये ओ साक्ष आप्यी होय अने तियाआ साक्ष खोरी होय अने तियाहा मालुम होय का तो खोरोज कोत्लू का तुमु पण विश्वास मेकिलो.

³⁶ याआ गोठी यामुळे ओवल्यु का पवित्र शास्त्रात जे कोयु होय ते पुरो उवे, “तियाआ कोडलो आड तोडये जानारू नाहा”

³⁷ फासी होमला जागापो एहलो लेखिलो होय तियाहा जिये छेदले तियापो तो नजर कोअनारू.

यूसुफो कब्र मेहे येशुहू गाड्या

³⁸ आवा गोठीफासाडी अरिमतियाआ योसेफाने जो येशुउ शिष्य ओतु पण यहुद्यांआ पिकेवाही तियाअ गोठीकोता निकाडीत मेकीत ओतु पिलाताहा विनंती कोअयी का नाहाकोत तो येशुउ डीला घेऊन जात शकतो पिलातुसो वांही तियाआ विनंती कोअयु, अने तो आविलो तियाआ डील घेऊन गोल्यो.

³⁹ नीकुदेमुस पोन जो पेल्लु येशुआरी राती गोल्यो होये गन्धरस अने अगरु याआ सुमारे होव रत्तल मिश्रण घेऊन आवयू.

⁴⁰ तेहलाम तिये येशुउ डीला लेधलो अने यहुद्यांआ गाडीलो कोइलाआ रीतीवाही तियाहा सुगन्धित सामानाआरी गाडीत्वाआ फडकाम,

⁴¹ तिया जाग्तली जीही येशुहू क्रूसपो चोढावीत ओते तीइही एक मोलू ओती तीयीय एक कबर ओती तीयीय खोरोज कोडाआ मेक्ल्ये निमिले.

⁴² त्यापोत यहुद्यांआ तीयारीई दीही होयकोत तिये येशुहू तीयाम मेक्ल्ये; काहाके ती कबर जागे ओती.