युहन्ना 16 - नोयरी नोवलू नियम

¹ ऐ गुठ्या आय तुमाहा याआ कोअता कोहो का तुमु ठोकर ने खाय.

² एह्ली वेल मंदिर आवीत होय, का जो कोडु तुमामे माईत टाकही तो होमजे का आय परमेश्वरोओ सेवा कोअत्लू.

³ एहलो ते याकोअता कोआ का ते बाह्हाहा उलखित्लू नाहा अने माहु नाहा माहु ओलखीत.

पवित्र आत्माआ कार्य

⁴ पोन ए गोठी आय तुमामे याआ याकोअता कोयु, का जांहा तियाआ वेल आवे तेहलाम तुमामे पहिलुच कोयु ओते.

⁵ पवित्र आत्माआ काम आय आरंभा पासून तुमामे ए गोठी याआ याकोअता नाहा कोल्यी काहाके आय तुमाआ आरी ओतु पोन आय जांहा माहु मोकलीणारा जागे जात्लू अने तुमाआ मायरोत कोडूच माहु फुसीत नाहा, तू का जात होय?

⁶ पोन जी गोठी आय तुमामे कोल्यी होय, याआ याकोअता तुमाआ मोन शंकांनी पोईत गोये होय.

⁷ तेबी आय तुमामे खोरो कोत्लू का माआ जाअलो तुमाआ याकोअता हाजो होय, काहाके केधी आय जानारू नाहा ताहा तो मदत कोअनारू तुमाआ जागे आविलो नाहा; परंतु केधी आय जाय, ताहा तियाहा तुमाआ जागे मुकलिही.

⁸ तो आवीत जगाला पाप अने धार्मिकता अने न्यायो विषया माय वारुई कोअही.

⁹ पापाआ विषयामे याकोअता का ते मापो विश्वास नाहा कोअनारू;

¹⁰ अने धार्मिकताआ विषयामे याआ याकोअता का आय बाह्हाहा जागे जात होय, अने तुमु मांहु फासी पालनारू नाहा;

¹¹ न्यायाआ विषयामे याआ याकोअता का जगोओ सरदार दोषी ठेरव्यू गोल्यो होय.

¹² आवयू तुमाआ आरी फाशी जाअखो गोठी कोअला होय, परंतु तुमु ओमे तियाहा सहन नाहा कोहू सेकेहे.

¹³ पोन तो जाहा अर्थात सत्यांआ आत्माआ आपे, तो तुमामे आखे खोराआ मार्ग देखाडही, काहाके तो आपाआ अने आपाआ त्यापोरोत नाहा काहाके जी होमले तोज कोअही, अने आवनाराआ गोठी तुमामे कोअही.

¹⁴ तो माआ गौरव कोअही, काहाके माआ गोठी मायरोन तुमामे कोअही

¹⁵ जे किबी बाह्हाआ होय, ते आखे माआ होय; याआ याकोअता आय कोयु का तो माआ गोठी मायरोत तुमामे कोअही.

दुख आनंद मेहे बदली जाय

¹⁶ “थोडो वेलूम तुमु माहु पालनारू नाहा, अने फासाडी थोडो वेलूम माहु पाल्यो.”

¹⁷ तेहलाम तियाआ कोडू होमला शिष्यांनी आपसामेहे कोयु, ओ नाहाकोत होय जे आमाहा कोयु होय थोडो टायमोमे माहु पालिलो? अने जे याआ याकोअता का आय बाह्हा जागे जात होय?

¹⁸ तोयो तिये कोयु “ओ थोडो वेल, जे तो कोत्लू, नाहाकोत गोठी होय? आमाहा मालुम नाहा का नाहाकोत कोयु होय.”

¹⁹ येशु ओ होमजीत का ते फुसिलो इच्छितात, तिये कोयु, नाहाकोत तुमु आपसामेहे माआ आव गोठी च्या विषयामे पूछताछ, थोडो टायमोमे तुमु माहु पालनारू नाहा, अने फासाडी थोडो टायमोमे माहु पाल्यो,

²⁰ आय तुमामे खोरो-खोरो कोत्लू का तुमु रोड्यू अने दुख कोआ, परंतु जग आनंद कोआ; तुमु दुख कोआ पण तुमाआ दुख आनंदाम बोद्लीत जाय.

²¹ ठाल्ली पोडीलाआ वेले बुई ला त्रास ओतू, काहाके तीआ दुखाआ वेल आवीत जाहो, परंतु ती जांहा पोऱ्याहा जोल्मो आपोहो, ताहा तियाअ आनंदाआ जगात एक मांहु उत्पन्न ओवयू, तियाअ झुलुमाहा फासी ओर कोई सेक्त्ले नाहा.

²² तिया प्रकारे तुमामे ओमे ते दुख होय, परंतु आय तुमामे फासी मिले अने तुमाआ मोन आनंदावाही पोईत जाय; अने तुमाआ आनंद तुमाआ त्यापोरोत कोडु साडाळीते लेही नाहा.

²³ तिया तेदीही तुमु माहु किबी फुसनारू नाहा आय तुमामे खोरो-खोरो कोत्लू, केधी बाह्हू त्यापोरोत किबी मागहू ताहा, तो माआ नावामेहे तुमामे आपे.

²⁴ ओमे जाआ तूमु माआ नावामेहे कीज मागे नाहा मागा ते तुमाहा जोड़े काहाके तुमाआ आनंद पुरू ओत जाय.

संसार पोओ जित

²⁵ आय तुमामे ए गोठी दाखल्या माय कोल्यी होय, परंतु तेज वेल आवीत होय का आय तुमामे दाखलाम फासी कोअही नाहा, परंतु उगाडीत तुमामे बाह्हाआ बद्दल कोअही.

²⁶ ज्या तेदीही तुमु माआ नावामेहे मागे; अने आय तुमामे ओ नाहा कोयु का आय तुमा कोअता बाह्हाहा विनंती कोअही;

²⁷ काहाके देव तुमापो प्रीती कोअत्लू, याआ याकोअता का तुमु मापो प्रीती कोअयी अने ओ पण विश्वास कोअयु होय का आय बाह्हासी आवयू होय.

²⁸ आय बाह्हासी जगात आवयू होय, आय फासी जगाला सोडीत बाह्हाही जात्लू.

²⁹ तियाआ शिष्यांनी कोयु, “जाअखो ओमे ते तू उघड कोयु होय, दाखलाम नाहा कोयु.

³⁰ ओमे आमाहा होमजीत गोये होय का ताहु आखो किबी मालुम होय, अने तियाआ गरज ओतली नाहा का कोडु ताहु किबी फुसे; यामे विश्वास कोअत्लू का तू परमेश्वरा त्यापोरोत आवयू होय.

³¹ ऐ होमलित येशु लेतजा तियाहा कोयु.” नाहाकोत तुमु ओमे विश्वास कोअता?

³² पाला, ती वेल आवयी होय नहाते आलीहोय का तुमु आखे एहे-तिकडे जात आपाआ मार्ग लेणारे अने माहु एखल्यू सोडीत आपे; तेबी आय एखलू नाहा काहाके बाह्हू माआआरी होय.

³³ आय ए गोठी तुमामे याकोअता कोल्यी का तुमामे मामेह शांती जोडीत जगात तुमामे त्रास होय, पोन धीर तोआ आय जगाला जीक्यू होय.