युहन्ना 15 - नोयरी नोवलू नियम

खोरी दाखलता

¹ आय खोरू द्राक्षाआ वेलु होय अने माआ बाह्हू किसान होय.

² जी डाली मामेहे होय अने फोल आपित नाहा तीही तो वाडीत टाकोहो अने जी लागे फोल आपोहो तियाअ लोगिई तो साफ़ कोअत्लू.

³ तुमु ताहा तिया वचनावांही जे आय तुमामे कोयु ओमे तुमु शुद्ध होय.

⁴ तुमु मामेह बोणीत रो अने आय तुमामे रोही जेहलो डाली जर द्राक्ष वेलुमे नेशेय ताहा स्वतः ती फोले आपुहू शकत नाहा तेहलूज तुमुभी मामेहे रोही नाहा ताहा फोल आपुहू शकत नाहा.

⁵ आय द्राक्षाआ वेल होय, तुमु डाली होय जो मामेहे रोतलू अने आय तीयाम तो खुपुच फोल आपोहो काहाके मामेरोत अलग ओतगोयु किबी कोहू शकत नाहा.

⁶ जर कोडु मामेहे रोही नाहा ताहा तो डाली होस टाकी आपलो आवत्लू अने उगात जात्लू अने मांहे तियाहा एखटो कोईत आगीम टाकीत जातेहे अने ते पेटाडीत जातेहे.

⁷ जर तुमु मामेहे रोही अने माआ वचन तुमामे रोही ताहा जे जोवे ते मांगा अने ते तुमामे मिलीलो.

⁸ माआ बाहाआ गौरव तीयेज ओते का तुमु जाखो फोल घेऊन आवे; तोयोज तुमु माआ शिष्य ठराविलो.

⁹ जेहलो बाह्हू मापो प्रेम कोल्यु तेहलूज आय तुमापो प्रेम कोल्यु होय; माआ प्रेमाम बोणीत रो.

¹⁰ जर तुमु माआ आज्ञाहा मानणारु ताहा माआ प्रेमाम बोणीत रोही; जेहलो आय आपाआ बाह्हाआ आज्ञाहा मान्ये होय अने तियाआ प्रेमाम बोणीत रोतलू.

¹¹ आय याआ गोठी तुमामे याकोअता कोयु होय का माआ आनंद तुमामे बोणीत रोही अने तुमाआ आनंद पुरो उवे.

चेलाआ एकदिहरारी सबंध

¹² माआ आज्ञा ए होय का जेहलो आय तुमापो प्रेम कोअयो होय तेहलूज तुमुभी एक दिहीरापो प्रेम को.

¹³ यांपोरोत वोडू प्रेम कोडाआ नाहा का कोडु आपाआ दोस्तांकोअता आपाआ जीव आपित आपी.

¹⁴ जी आज्ञा आय तुमामे आपोहो जर तुमु मानणारु ताहा तुमु माआ हेगांति होय.

¹⁵ ओमोरोत आय तुमामे सेवक कोअही नाहा काहाके सेवकोहो मालुम कायना ओतो का तिया मालक नाहाकोत कोअत्लू; आय तुमामे हेगांति कोयु होय काहाके ज्या गोठी आपाआ बाह्हाप रोत होमल्याहा आखे तिया तुमामे कोत आप्या.

¹⁶ तुमु माहु निवडील्ये नाहा ताहा आय तुमु निवडील्ये होये आने ठेरव्यो का तुमु जात फोल घेऊन आव अने तुमाआ फोल टीकित रोंहु जोवे का तुमु माआ नावामेहे जे किबी माआ बाह्हाप रोत मागहू तो तुमामे आपे.

¹⁷ आव गोठीइ आज्ञा आय तुमामे यकोअता आपोहो का तुमु एकादिहीरापो प्रेम कोईओलो.

संसारोरी सताव

¹⁸ जर जग तुमाआ द्वेष कोअत्लू ताहा तुमामे मालुम होय का तुमाआ आगाडी माआरी पण द्वेष कोअयु.

¹⁹ जर तुमु जगोआ रोल्या ओते ताहा जग आपापो प्रेम कोल्यु ओते पण यामुळे का तुमु जगोआ नाहा पण आय तुमामे जगोमरोत निवडील्ये होय त्यापोत जग तुमाआ द्वेष कोअते.

²⁰ जी गोठी आय तुमामे कोल्यी ओती सेवक आपाआ मालापोरोत वोडू नाहा याहा ओर मेका जर तिये माआ छळ कोअयु ताहा तुमाआ पण द्वेष कोअनारू; जर तिये माआ गोठी मान्या ताहा तुमाआ पण मानणारु.

²¹ पोन ऐ आखे किबी माआ नावोवाही तुमाआरी कोअनारू काहाके ते माहु मोकलीनाराहा उलखित्लू नाहा.

²² जर आय आवयू नाहा अने तुमाआ आरी बोलतुल्यो नसते ताहा ते पापी ठेरव्यो कायना ओतो; पण ओमे तियाआ कोडलाज निमतीवाही पापो कोअता नाहा.

²³ जो माआरी द्वेष कोअत्लू तो माआ बाह्हा आरी पण दुश्मोनी ओलखिणारा.

²⁴ जर आय तीयाम ते काम कोल्यु कायना ओतो जे कोडु कोल्यु नाहा ताहा ते पापी ठरव्येहे कायना ओतो; पण ओमे तिये माहु अने माआ बाह्हाहा बेनुहू पालील्यो अने बेनुआरी द्वेष कोअयु.

²⁵ ओ यकोअता उवे का ते वचन पुरो उवूंहू जोवे जे तियाआ पवित्र नियमलेखिलो होय तियाआ माआरी बिनकामो द्वेष कोअयु

²⁶ पोन जाहा अतो मदत कोअनारू आविलो ज्याहा आय तुमापोओ बाह्हाप रोत मोकलीही म्हणजे खराआ आत्माआ जो परमेश्वारापोरोत आवत्लू ताहा तो माआ साक्ष होय,

²⁷ अने तुमु पोन माआ साक्ष होय काहाके तुमु पेलेरोत माआरी रोल्या होय.