युहन्ना 13 - नोयरी नोवलू नियम

प्रभु भोज

¹ वल्हाडण तीवारोओ पेल्लू एहलो उव्यो का येशुई दुनिया मेहेरोत ओमे बाह्हाआ जाआलोआ आपाआ वेल आवित गोइही का ओ जोग सोडित बाह्हाआ इही जाहो ते माआ मांहे ऐ जे जगामे ओ जेहलो प्रेम मेलतू ओतु शेवटी जाआ ऐहलोच प्रेम मेलतू रोयु.

² हाजेपोर्यो रोटू कोईत ओते शैतान ओमेजा शिमोन इस्करियोती चा पोऱ्या यहुदा याआ मोनामे टाक्ये ओते का येशुहू धोक्यात घेऊन तोईत आपलू

³ येशु ओ उलखित्लू ओतु का माआ बाह्हू आखे किबी तियाआ आथे होफहोपिन आप्लु होय अने तो परमेश्वारापोरोत आवयू होय अने पर्मेश्वरारी फासी जात होय,

⁴ त्याकोता रोटू सोडीत उबु रोला तिये आपाआ बारथे कापडे काढ्ये अने एक रुमाल आपाआ कोमरेहे बांध्यू.

येशु चेलाआ गुडा तुवयु

⁵ फासाडी होमला गंगाळाम पाई ओतीत आपाआ शिष्यांआ गुडू तुवूहू लाग्यू अने तियाअ कमरुहू बांधीत मेकल्या रुमालावांही नुसहू लाग्यू.

⁶ फासाडी जाहा तो शिमोन पेत्राआ जागे गोल्यो तेहलाम पेत्राई कोयु, प्रभू नाहाकोत तू माआ गुडू तुवीत होय?

⁷ उत्तर आपित येशु कोयु, ओमे ताहु मालुम नाहा का आय नाहाकोत कोईत होय, फासाडी ताहु मालुम उवे.

⁸ पेत्राई तियाहा कोयु, तू माआ गुडू केधीज तुव्ही नाहा, येशु तियाहा उत्तर आप्लु, जर आय तुव्ही नाहा ताहा ताहु मा आहने जागू मिले नाहा.

⁹ शिमोन पेत्राई तियाहा कोयु, प्रभू फक्त माआ गुडूच नाहा ताहा माआ आथे अने माआ मुंडको पण तोवीत आप.

¹⁰ येशु तियाहा कोयु, जीआ उंगलीलो कोअयी होय तियाहा आपाआ गुडाआ व्यतिरिक्त किबी तुविला आवश्यकता नाहा ताहा तो पुरो शुद्ध ओतू तुमु मांहे शुद्ध होय पण आखेज नाहा.

¹¹ येशु तियाहा उलखित्लू ओतु जो तियाहा धोक्यात तोईत आपे ओतु त्याकोता तिये कोयु ओते, “तुमु आखे शुद्ध नाहा.”

गुडा तुवलो अर्थ

¹² फासाडी जाहा त्याआं गुडू तुण्यो गोये तेहलाम तिये आपाआ बारथे कापडे फासी कालीत लेधलो अने आपाआ जाग्तली फासी आविलो बोहयु नाहाकोत तुमु उलखित्लू होय का आय तुमा कोअता नाहाकोत कोल्यु?

¹³ तुमु माहु गुरु अने प्रभू कोतेहे अने तुमु योग्य होय काहाके आय तो होय.

¹⁴ त्याकोता जर आय प्रभू अने गुरु ओमेत तुमाआ गुडू तुण्यो ताहा तुमु पण एकमेकाआ गुडू तुवूहुं हवे आय तुमा आगाडी आय एक उदाहरण आप्लु होय.

¹⁵ काहाके आय तुमाहा नमूनों देखाडीत देदलू होय का जेहलो आय तुमाआ आरी कोयु होय तुमु बी तेहलोज कोअते रोआ.

¹⁶ आय तुमामे खोरो कोत्लू एक सेवक आपाआ मालिकापेक्षा वोडू नाहा अने न संदेश आपणारो वोडू होय जीआ ताहु मोकल्यीत होय.

¹⁷ जर तुमु याआ गोठी उलखित्लू होय अने तेहलो सालतेहे ताहा तुमु धन्य होय.

¹⁸ आय तुम्हाआ आखा विषयी कोयु नाहा आय तियाहा ओलखीत्लू ज्याहा आय निवडिले होय (अने ओ पण का यहुदा विश्वासघात कोअनारा होय) परंतु आय तियाहा याकोअता निवडिले होय का शास्त्राआ वचन खोरो उवे अने जीआ माआ भाकर खादल्यी तो माविरुध ओवयू.

¹⁹ ओमे ए घटना घाडीला आगाडी आय तुमामे विश्वास कोत्लू का तो आय होय

²⁰ आय तुमामे खोरो-खोरो कोत्लू का जो कोडु माहु मोकलील्यांहा ग्रहण कोअत्लू तो माहु ग्रहण कोअत्लू अने जो माहु ग्रहण कोअत्लू तो तियाहा ग्रहण कोअत्लू जीआ माहु मोक्ल्यीत होय.

विश्वासघातो वोल संकेत

²¹ ऐ कोल्याफासाडी येशु आत्माम कासावीस ओवयू अने साक्षी आप्यी आय तुमामे खोरो कोत्लू, तुमा मेहेरोत एक एहेलू होय का तो माहु धोका आपित तोईत आपे.

²² तेहलाम तियाआ शिष्य एक दिहराहा देखाडहु लागाडीत तियाहा निच्छित उवनारा निमिले का तो कोढाकोअता गोगीत होय

²³ तिया एक शिष्य तियाआ जागे बोहयु ओतु तियाहा येशु जाखो प्रेम कोईत ओतु.

²⁴ तेहलाम शिमोन पेत्राई इशारु कोअयु का फुसा का तो कोडू ओवुहू शकतो ज्यावीरूढ येशु गोगीत ओतु?

²⁵ येशुउ गोमाणाऱ्या शिष्याने तियाहा सहज तियाआ सातीपो टूगुवोलीत तियाहा फ़ुस्ल्याआ, “ओ प्रभू तो कोडू होय?”

²⁶ येशु लेतजा उत्तर आप्लु, रोटाहा बोटकु वाटकामेहे बुडालीत ज्याहा आय आपी तोज होय फासाडी येशु रोटाहा बोटकु वाटकामेहे बुडाळयु अने तो विसित शिमोन इस्करियोती चा पोऱ्या यहुदाहा आप्यू.

²⁷ ज्याहबी यहुदाने रोटाहा बोटकु लेदो तीयाम शैतान वास कोअयु फासाडी येशु तियाहा कोयु, जे तू कोअला निघाल्यू होय ते वेगु को.

²⁸ पोन तिया जागापो खाअलाकाजे बहित रोल्यामे कोडोबी ओ होमजे नाहा येशु ओ काहा कोयु.

²⁹ काहीही विचार कोअयु का पोशाआ खोत्ली रोत ओती त्याकोता येशु तियाहा कोयु होय का वल्हाडन तिवार याकोअता किबी आवश्यक साधन घेऊन आवे किंवा कोत ओतु का गोरब्योहो किबी आपित आपलो त्याकोता यहुदाने रोटाहा बोटकु लेदो.

³⁰ रोटू कोईलानंतर तो तत्काळ निहित गोल्यो ए रातीई वेल ओतु.

एक नवली आज्ञा

³¹ तो निहित गोयेनतर येशु कोइतलु, “माअहा पोऱ्या ओमे गौरवात आवयू होय अने तियाआ त्यापोरत परमेश्वरोओ गौरव ओवयू होय”

³² जर तियाद्वारे परमेश्वरोओ गौरव ओवयू होय ताहा परमेश्वर आपाआ द्वारे तियाहा गौरव आपी अने तियाहा गौरव लग्गेज ए आपी.

³³ ओ माआ गोमाणाऱ्या पोरयां, आय ओमे थोडोज वेल तुमाआरी होय तुमु माहु होदहा अने जेहलो आय यहुदी अधिकाऱ्यांना कोयु ओते, तेहलूज तुमु तियाअ जागापो आवहू शकत नाहा तियाअ जागापो आय जात होय, तेहलूज तुमामे पण कोत्लू.

³⁴ आय तुमामे नवो आज्ञा आपोहो का तुमु एकमेकाआरी प्रेम को जेहलो आय तुमामे प्रेम कोल्यु होय तेहलूज तुमुबीही एकमेकाआरी प्रेम को.

³⁵ जर तुमु एकमेकाआरी प्रेम कोअनारू तेहलाम हर एक जोओ ओलखीत लेही का तुमु माआ शिष्य होय.

येशु द्वारा पतरसो ईन्कारो भविष्यवाणी

³⁶ शिमोन पेत्राई तियाहा फ़ुस्ल्याआ, ओ प्रभू, तू कोठे जात होय? येशु तियाहा उत्तर आप्लु, “तू ओमे माफासाडी आवहू शकत नाहा परंतु फासाडी तू माफासाडी आविलो.”

³⁷ पेत्राई तियाहा फ़ुस्ल्याआ, “ओ प्रभू, ओमे आयताआ ताआ फासाडी काहा आवहू शकत नाहा? आयताहा ता कोअता माआ जीव पण आपित आपी.”

³⁸ येशु उत्तर आप्लु, “तू खुदोओ जीव आपी? आय ताहु खोरो कोत्लू का जो पर्यंत तू माहु तीन टायमोआ नकार आपी नाहा तो पर्यंत कुकडू वाहे नाहा.”