युहन्ना 12 - नोयरी नोवलू नियम

बेयतिनियाहा मेहे येशुउ आदर

¹ ताहरुहू येशु वल्हाडनाहा पेल्लू सोव दीह बैथानिया मेहे आव्यू ओतु जीही लाजर ओतु जियाहा येशु मोअलाम रोत जीवाड्यू ओतु.

² तीइही तिये तियाआ याकोअता रोटू तीयार कोल्यु; अने मार्था सेवा कोईत ओती, अने लाजरस तियाआ मायरोत एक ओतु जो तियाआ याकोअता रोटू कोइला याकोअता बोहयु ओतु.

³ तेहलाम मरियम जटामांसी आर्दू शेर कीमतीवालो हाजलावास तेल घेऊन येशुउ गुडापो टाक्ये, अने आपाआ सिज्यावाही तियाआ गुडाहा नुसल्यो; अने हजुबास तेलोवांही को हाजलावास होतगोयो.

⁴ पोन तियाआ चेलाप रोत यहूदा इस्करियोती नावाआ एक शिष्य जो तियाहा तोईत आपी ओतु, कोहू लाग्यू,

⁵ ऐ हजुबास तेल तिनहोव दिनार माय वेसेत गोरब्योहो काहा आप्यू गोल्यो नाहा?

⁶ तिये ए गोठी याकोअता कोल्यी नाहा का चिंता ओती परंतु याकोअता केतो चोर ओतु, अने, तियाआ जागे तियाआ खोतली रोत ओती अने तीयाम जे किबी टाक्ये जाहो ते काढीत लेत ओतु.

⁷ येशु कोयु “तियाहा रोंहुद्या तियाहा माआ पुऱ्या जाला दिहोकोअता रोहू आपा.

⁸ काहाके गरीब ताहा तुमाआ आरी कायम रोतलू परंतु आय तुमाआ आरी सर्वकाल रोही नाहा.”

लाजरोहो माअलो निर्णय

⁹ जाहा यहुदीयानाआ वोडी गोर्दी मालुम उवे का तो तिही होय, ते नाहा फक्त येशुउ कारनो कोईत आव्ये परंतु याआ याकोअता का लाजराहा पालीही ज्याहा तिये मोअल्या त्यामेरोत जीवतो कोल्यु ओते.

¹⁰ तेहलाम मुख्य याजकावाही लाजरस ला देउलाकोअता याकोअता षड्यंत्र तीयार कोअयु.

¹¹ काहाके का तियाआ करणावाही जाअखो यहुदी निहित गोये अने येशु उपो विश्वास कोअयु.

येशुउ यरूशलेम मेहे विजय-प्रवेश

¹² दिहरा तेदीही जाअखो माहु जे पूर्वी आव्ये ओते ओ होमल्यु ओते का यरूशलेम माय आवीत होय.

¹³ याकोअता तिये खजुराआ डाली लेदिओलो अने तियाहा भेट आपलो याकोअता निकलीलू, अने ओरडाय ला लागाडीत, “होसान्ना धन्य इस्राएल चा राजा, जो इस्राएल च्या नावोवांहि आवीत होय.”

¹⁴ जाहा येशुहू गोदडीइ गोदडापिलू मिल्यू; ताहा तो तियाआ उपो बोहित गोल्यो; जेहलो लेखिलो होय,

¹⁵ “ऐ सियोनाच्या पोऱ्यी, बित नाहा; पाला, ताआ राजा गोदडीइ शिंगरापो बोहीतरोल्यु आवीत होय.”

¹⁶ तियाआ शिष्य ए गोठी पहीले होमज्ये नाहा, परंतु जांहा येशुउ गौरव प्रगट उवेताहा तियाहा ओर का ए गोठी तिया विषया माय लेखल्यी ओती अने माहु तियाआरी याज प्रकारचा व्यवहार कोअयु ओतु.

¹⁷ तेहलाम गोर्दी च्या तियाअ माहु साक्ष आप्यी, जे तियाअ वेले तियाआ आरी ओते तिये लाजराहा कबरा मायरोत हादीत मोल्यामरोत मायरोत जिवंत कोल्यु.

¹⁸ याज कारनोवाही माहु तियाहा भेट आपलो कोअता आव्ये ओते काहाके तिये होमल्यु ओते का तिये आश्चर्यकर्म देखाये.

¹⁹ तेहलाम परुश्यांहि आपसामेहे कोयु, “विचार ताहा को का तुमाआ त्यापोरोत किबी नाहा उवहू सेकेहे पाला, जगत मांहे तियाआ फासाडी चालते होय.”

येशु अने यूनानी

²⁰ जे मांहे आगाडी उपासना कोइला कोअता आव्ये ओते याहा मायरोत किबी यूनानी ओते.

²¹ तिये गालीला मेहे तियाअ बेथसैदाआ रोणारे फिलीप्प जागे आवीत तियाआ जागे विनंती कोअयी, “महाराज; आमाहा येशुहू भेट आपुहू पालोहो.”

²² फिलीप्प आवीत आंद्रियास ला कोयु, तोये आंद्रियास अने फिलीप्प लेतजा आवीत येशुहू कोयु.

²³ याआ वरून येशु कोयु, ती वेल आवीत गोयी होय, का माअहा पोऱ्याआ गौरव होय.

²⁴ आय तुमामे खोरो-खोरो कोत्लू का जांहा पर्यत गवोओ दाणु धरतीमे मेकीत मोईत नाहा जात तो एखल्यू रोतलू; परंतु जांहा मोईत जात्लू, तेहलाम जाअखो फोल आपोहो.

²⁵ जो आपाआ जीवोहो प्रिय मोनोहो, तो तियाहा गोमावीत आपोहो; अने जो आव जगुमे आपाआ जीवोहो ने गोमनारू होमजीत्लू तो सार्वकालिक जीवना कोअता तिया होंबाला कोअही.

²⁶ केधी कोडु माआ सेवा कोअही, ताहा माआ फासाडी आव; अने जीही आय होय, तीही माआ सेवक पण होय केधी कोडु माआ सेवा कोअही, तिया बाह्हू तिया आदर कोअही.

खुदोओ मृत्यु बाराम भविष्यवाणी

²⁷ “ओमे माआ जीव व्याकुल होय याआ याकोअता आय नाहाकोत कोलु? ओ ओबा, माहु आव घटके पोरोत वासाड? नाहा, काहाके आय याज कारनोवाही आव घटके पर्यत पोचुज होय.”

²⁸ ऐ ओबा, आपाआ नावोओ गौरव को तेहलाम ए जुग वाणी उवी, “आय तियाआ गौरव कोल्यु होय, अने फासाडीभी कोअही.”

²⁹ तेहलाम मांहे उभूरोत होमलित ओते तिये कोयु का वादलो आअडे ए दिहरा कोयु, “कोडु एक स्वर्गदूत बोलतुल्यो.”

³⁰ याआ वरून येशु कोयु, ओ शब्द माआ याकोअता नाहा परंतु तुमाआ याकोअता आवयू होय

³¹ ओमे आव जगाआ न्याय उवनारा होय, ओमे जुगाआ सरदारहा काढीत टाक्ये जाय;

³² अने आय केधी धरतीपोन उसकोल्यू जाइअलो, ताहा आखाहा मांही खेचीत लेही.

³³ आपु कोडला मोईलावाही मोअनारू ओ सुचविला कोअता तो एहलो बोलतुल्यो.

³⁴ याआ वरून माहु तियाहा कोयु, “आमाहा नियम शास्रामे ए गोठी कोअयु होय का ख्रिस्त कायम रोही, फासाडी तू नाहाकोत कोअत्लू का माअहा पोऱ्याहा उसापो सोढविलो जाअलो गरजेए होय ओ माअहा पुत्र कोडू होय.”

³⁵ येशु तियाहा कोयु, “प्रकाश ओमे थोडो टायमोआ पर्यंत तुमामे होय जो पर्यंत प्रकाश तुमाआ जागे होय तो पर्यंत साला निहित जाहू एहलो उवहू कायना का आंदारो आवीत लेय; जो आंदाराम चालीलो तो नाहा होमजाडीत का जात होय.”

³⁶ जो पर्यंत प्रकाश तुमाआ आरी होय, उजवोडापो विश्वास को काहाके का तुमु उजवाडामे पोऱ्ये बोनल्यो ए गोठी कोत येशु निहित गोल्यो अने त्यापोरोत निकाईत रोला.

भविष्यवाणी पूरी ओवयी

³⁷ तिये तियाआ आगाडी एहलो चिन्ह देखाये, तेबी तिये तियापो विश्वास कोअयु नाहा;

³⁸ तेबी यशायाह भविष्यवक्ता तियाआ वचन पुरो उवे जे तियाआ लेखिलो ओते कोयु ओते “ओ प्रभू आमा सुवार्तेए कोडु विश्वास कोअयु होय? अने प्रभूआ भूजबल कोडापो प्रगट ओवयू होय.”

³⁹ याज कारनोवाही ते विश्वास कोहू सेकेले नाहा, काहाके यशायाह ओ पण कोयु होय.

⁴⁰ “तिये त्याआं डोआं आंधली, अने त्याआं मोन कठीण कोईत आप्लु होय; केधी एहलो नाहा उवे का ते डोआवाही पालीही, अने मोनोवाही होमजीत्ले, अने फिरहा, अने आय तियाहा हाजो कोअही.”

⁴¹ यशायाह ए गोठी याकोअता कोल्यी का तिये तियाआ गौरव पालील्यो, अने तिये तियाआ विषया माय गोठी कोअल्यो.

⁴² तेबी मुख्य याजक मायरोत जाअखो जानोतांहि तियापो विश्वास कोअयु, परंतु परुश्याआ कारनोवाही प्रगताट नाहा मानीत ओते, केधी एहलो न ओवो का ते मंदिरोम काढीत टाक्ये जाय.

⁴³ काहाके का महांआ ची प्रशंसा परमेश्वरा प्रशंसा जाखा प्रिय लागेहे.

ज्योति मेहे साल्लोओ

⁴⁴ येशु आअड़ित कोयु, “जो मापो विश्वास कोअत्लू, तो मापो नहाते माआ मोकलीणारा उपो विश्वास कोअत्लू.

⁴⁵ अने जो माहु पालत्लू तो माहु मोकलीनाराहा पालत्लू.

⁴⁶ आय जगाआ प्रकाश बोणीत आवयू होय, काहाके का जो कोडु मापो विश्वास कोअत्लू तो आंदाराम रोहू कायना.

⁴⁷ केधी कोडु माआ गोठी होमलित पण पालीत नाहा, ताहा आय तियाहा दोषी ठरावीत नाहा; काहाके आय जगाला दोषी ठेरविल्यो याकोअता नाहा ताहा, परंतु जगाआ तारण कोइला कोअता आवयू होय.

⁴⁸ जो माहु तुच्छ मोनोहो अने माआ गोठी ग्रहण कोईत नाहा तियाहा दोषी ठेरविनारू ताहा एकुच होय. अर्थात जे वचन आय कोयु होय, तोज फासाडीई दिहोम तियाहा दोषी ठेरवीही.

⁴⁹ काहाके आय मापोरोत गोठी कोयु नाहा का; परंतु बाह्हाही जीयाहा माहु मोकल्ये होय तीयेज माहु आज्ञा आप्यी होय का कि-कि कोहू अने कि-कि गोगू?

⁵⁰ अने माहु मालुम होय का तियाआ आज्ञा सार्वकालिक जीवोन होय याकोअता आय जे किबी गोगत्लू, ते जेहलो बाह्हाही माहु कोयु होय तेहलूज गोगत्लू.”