युहन्ना 11 - नोयरी नोवलू नियम

लाजरोओ मृत्यु

¹ मरियम अने तोई बोईहही मार्थाआ गाव बैथानिया लाजर नावाआ एक, माहू मांदवाड्यू ओतु.

² ए तेज मरिया ओती जीयी प्रभूपो इत्र टाकीत तियाआ गुडाहा आपाआ केहावाही नुसल्यो ओते, यीज पाही लाजर मांदवाड्यू ओतु.

³ कोईत तियाआ बोईहीही कोत मोकल्ये, “ओ प्रभू पाला, ज्यापो तू प्रेम कोअत्लू, तो मांदवाड्यू ओतु”

⁴ ओ होमलित येशु कोयु, “ओ आजार मोईला नाहा, पण परमेश्वरोओ गौरव कोअता होय, का तीयावाही परमेश्वरोओ पोऱ्याआ गौरव होय,”

⁵ येशु जाहा मार्था अने तियाआ बोईहही अने लाजर यापो येशु प्रेम कोईत ओतु.

⁶ तेबी पोन तिये होमल्यु तो मांदवाड्यू होय तो ज्या जागापो ओतु तीइही बेन दीही फासी थोबिलो गोल्यो

⁷ याआनंतर तिये शिष्यांआ कोयु, “आव आपु फासी यहुदात जाऊ”

⁸ शिष्यांनी तियाहा कोयु, “ऐ स्वामी, ओमे ते यहुदी तापो डोणो देही होय, तेबी तू होमजीत्लो जात्लू?”

⁹ येशु उत्तर आप्लु, “नाहाकोत दिहाआ बारा तास उवनारा नाहा? जर कोडु दिहोम सालनारू ताहा तो ठोकर खाही नाहा काहाके आव जगोआ प्रकाश पालत्लू.”

¹⁰ जर कोडु पण राती सालही ताहा तो ठोकर खाहोव काहाके तीयाम प्रकाश नाहा.

¹¹ तिये याआ गोठी कोयु याआनंतर त्यां कोहू लाग्यू, “आमाआ हेगांति लाजर हुवीत गोल्यो होय, पण आय तियाहा जागतू कोअला जात होय”

¹² तेहलाम शिष्यांनी तियाहा कोयु, “ओ प्रभूजी जर तो हुवीत गोल्यो होय ताहा हाजू ओतगोयु जानारू”

¹³ येशुई ताहा तियाआ मोइला विषयी कोयु पण ते होमज्ये का तिये हुविलाबद्दल कोयु होय

¹⁴ तेहलाम येशु तियाहा हीदू पणे कोत आप्लु, लाजरस मोईत गोल्यो होय;

¹⁵ अने आय तुमा कोअता आनंदाम होय आय तीइही ने ओतू ज्याहा तुमु विश्वास को पोन ओमे आव आपु त्याजागे जाऊ.

¹⁶ तेहलाम थोमाई जो दिद्दमुस कोयू जात्लू, आपाआ आरीवालाआ शिष्यांआ कोयु, “आव, आमाहा पण ह्याच्या बरोबर मोहुहू साला.”

येशु पुनरुस्थान अने जीवन

¹⁷ तीइही पुगित कोईत येशुहू मालुम उवे का लाजराहा कब्रोमे मेकीत चोर दीही उवे होय.

¹⁸ बेथानी यरुशलेमाआ जागे बेन मैल अंतरापो होय.

¹⁹ जास्तीज यहुदी मार्था अने मरियाजागे आपाआ पाहीओ मोयलापो तियाहा सात्वना आपलो कोअता आव्ये ओते.

²⁰ जाहा मार्थाए येशुउ आविलाआ माहिती जोडल्यापो ती तियाहा मिलीला गोयी पण मरिया कोअमे बोहित रोली.

²¹ मार्था येशुहू कोयी, ओ प्रभू जर तू इही रोला ओतलू ताहा माआ पाही मोअयू नसते.

²² पोन ओमे पण आय होमजतोलो काजे किबी तू परमेश्वारापोरोत मांगनारू परमेश्वर ताहु आपी.

²³ येशु तियाहा कोयु, “ताआ पाही फासी जिवंत उठनारू”

²⁴ मार्था लेतजा तीही कोयु आय होमजतोलो का शेवटच्या दिहोम पुनरुस्थानाच्या टायमोमें तो जिवंत उठनारू.

²⁵ येशु तियाहा कोइतलु पुनरुस्थान अने जीवोन आयुज होय; जो कोडु मापो विश्वास मेकोहो तो मोअनारू तेबी पण जिवंत उठनारू,

²⁶ अने जो कोडु जिवंत होय अने मापो विश्वास मेकोहो तो अनंतकाल पर्यत मोअनारू नाहा नाहाकोत तू आव गोठीपो विश्वास कोअते?

²⁷ तिये तियाहा कोयु, ओ, ओ प्रभू आय विश्वास कोअते का परमेश्वरोओ पोऱ्या जो ख्रिस्त जगुमे आविलो ओतु तो तांहुज होय.

लाजरोहो जिवाड्यु

²⁸ ओ कोत ती निहित गोयी अने आपाआ बोईही मरिया हादीत तीही गुपचुप कोयु का, “स्वामी आवयू होय अने ताहु हादीत होय”

²⁹ ओ होमलीताज ती लागेज उठित त्याजागे आवयी.

³⁰ येशु ओमे गावून पुगीतगोयू नेओतुपोणे तियाआ जागापो ओतूजींही मार्था लेतजा तियाआ भेट लेदि ओती.

³¹ तेहलाम यहुदी तीआरी कोआ ओते, जे तीही सात्वना आपित ओते ओ पालीत ती मरिया लागेज उठित बारथे गोयी होय ती कबरेपो रोडहू जात होय ते तिया फासाडी जाऊ लागाडीत.

³² जाहा मरिया तीइही पुग्यी जीही येशु ओतुताहा तियाहा पालताज तियाआ गुडापो पोडीत कोहू लागीई, ओ प्रभू जर तू इही रोला ओतलू, ताहा माआ पाही मोल्यु नसते.

³³ जाहा येशुई तीही अने यहुदीयाहा जे तीआरी आव्ये ओते तियाहा रोडीलावेले पालील्यो तेहलाम आत्मावांहि दुखित अने खिन्न ओवयू,

³⁴ अने कोयु, तुमु तियाहा कोठे मेक्ल्ये होय? ओ प्रभू आविलो पालहु ल्या.

³⁵ येशु रोड्यू.

³⁶ तेहलाम यहुदी कोहू लागाडीत, पाला, तो तियापो केतो प्रेम कोईत ओतु.

³⁷ पोन त्यामेरोत किबी जानोतांहि कोयु, नाहाकोत ओ जीआ आंदलाआ डोआं उगड्यो, ओ पण कोहू शकला नाहा का ओ माहुहू मोल्यु नसते?

³⁸ फासी येशु मोनामे जास्तीज खिन्न ओतगोयु कबरेपो आवयू ती एक गुफा ओती अने तीपो एक डोणो मेकलू ओतु.

³⁹ येशु कोयु, “डोणो सेटे को” तियाअ मोल्याआ बोईहही मार्था तियाहा कोहू लागीई, ऐ प्रभू, त्यामेरोत ओमे घाणवास येत काहाके तियाहा माईत चोर दीही उवे होय.

⁴⁰ येशु तियाहा कोयु, नाहाकोत आय ताहु कोयु निमिले का, जर तू विश्वास कोअनारू ताहा परमेश्वरोओ गौरव पालही.

⁴¹ तेहलाम तिये तियाअ डोणुहु सेटे कोल्यु येशु डोआं उपो कोईत कोयु, ओ बाह्हू, आयताआ धन्यवाद कोअत्लू का तू माआ होम्लाडित लेधलो होय.

⁴² माहु मालुम ओते, हरेक टेमे तू माआ मानत्लू पण जी गोर्दी आगाडी फासाडी उबी होय त्यापोत आय ओ कोयु ज्यावाही का ते विश्वास कोअला जोवे का तू माहु मोक्ल्यीत होय.

⁴³ ओ कोत तिये वोडो शब्दावाही आवाज माईत कोयु, ओ लाजर, निहित आव.

⁴⁴ जो मरण पाव्यू ओतु तो गाडीत्वाआ फडकावाही आथे गुडू बांधीत मेकलये निहित आव्यू अने तियाआ सोब रुमालावांही बानदल्यो ओते येशु तियाहा कोयु, तियाहा सोडीत दया अने जाऊ दया.

येशु विरुद्ध मेहे योजना

⁴⁵ तेहलाम जे यहुदी मरियाजागे आव्ये ओते अने तियाआ ओ काम पालीत तियापो तीयामरोत केताहा विश्वास कोअयु.

⁴⁶ पोन तियाआ मायरोत किबी जोओ परुश्याही जात येशुउ का माहा माहिती आप्यी.

⁴⁷ यापो मुख्य याजक अने परुसी इये महा सभा हादिलो अने कोयु, आमाहा नाहाकोत कोईत होय? ओ मांहु ताहा खुपुच चिन्हे देखाडीत होय.

⁴⁸ जर आमू तियाहा ऐहलेच सोडीत आपुहू ताहा आखे तियापो विश्वास मेकीत लेही अने रोमी आविलो आमू जागापो अने जाती बेनुपो राज्य कोहू लेही.

⁴⁹ तेहलाम तियाआ मायरोत कैफा नावाआ होमला माहुई जो तियाअ सालाआ महायाजक ओतु तियाहा कोयु, ताहु किबी मालुम नाहा;

⁵⁰ अने ओ पण होमजाडीत नाहा का तुमा कोअता ओ हाजो होय का आमा मांहाकोअता एक माहुहू माईलु अने आखी जाती नष्ट उवूंहू नाहा.

⁵¹ ए गोठी तिये आमापोरोत कोयु नाहा पण तियाअ सालाआ महायाजक ओतगोयु भविष्यवाणी कोअयी का येशु आव जातीकोता देही,

⁵² अने तियाअ जातीकोअता नाहा ताहा यकोअता पण का परमेश्वरोओ तितर बितर उवलो पोऱ्याहा एकठे कोईत आपी.

⁵³ कोईत तियाअ दिहेरोत ते तियाअ तियाहा माईत टाकिलाआ प्रयत्न कोहू लागाडीत.

⁵⁴ त्यामुळे येशु तिया टायमोपो रोत यहुदीमे नावाजीत ओतगोयु फिर्यु नाहा पोन तिहीरोत जंगलातले, जागेण्या प्रांतात एफ्राईम नावोओ नगरामे निहित गोल्यो आपाआ शिष्याआरी होमजीत्लो रोंहु लाग्यू.

⁵⁵ यहुदीयाहा वल्हांडन तिवार जागे ओतु अने जास्तीज मांहे तिवाराआ पाल्या दिहेरोत यरुशलेमेत गोये का स्वतः शुद्ध कोअनारू.

⁵⁶ कोईत ते येशुहू होदहू लागाडीत, अने मंदिरोम उभे रोत आपसामेहे कोहू लागाडीत, “तुमु नाहाकोत विचार कोअता नाहाकोत तो तीवारोमे आविलो नाहा?”

⁵⁷ मुख्य याजक अने परुश्यांहि ए आज्ञा आपित मेकल्यी का जर कोडाआ मालुम होय का येशु कोठे होय ताहा कोओलो म्हणजे ते येशुहू तोईत लेही.