युहन्ना 10 - नोयरी नोवलू नियम

गुवाल्यु अने मेंडाआ दृष्टांत

¹ आय तुमाहा खोरोज-खोरोज कोहो का जो कोडू मेंडवाडाआ बाआड़ने जाता दीहरी वोलरोत चोढीत जातलू तो चोर अने लुटारू होय.

² पोन जो बाअणामोरोत विसमे जात्लू तो मेंडाआ गुवाल्यु होय.

³ त्यांकोअता राखवालदार बायणो उगडवित्लू अने मेंढे तिया आवाज होमलित्ले तो मेंढराना नाव घेऊन हादत्लू अने तियाहा बारथे लेत जात्लू.

⁴ तो आपाआ आखे मेडांहा जांहा बारथे काडत्लू तेहलाम तियाआ आगाडी-आगाडी तो चालीलो अने तियाआ मेंढे तियाआ फासाडी-फासाडी चालते रोतेहे काहाके ते तिया आवाज ओलखीत.

⁵ मेंढे कोडनीबि अनोळखाती नाहा ला पालीत तियाआ अनुसरण कोईत नाहा ते त्यापोरोत सेटे जातेहे काहाके ते तियाअ ओलखाळनाहा आवाज उलखित्लू नाहा.

⁶ येशु तियाहा ओ दाखलू आप्यू पण ते होम्जीलो सेकेले नाहा का येशु कि कोयु होय.

येशु हाजु गुवाल्यु होय

⁷ यापो येशु तियाहा फासी कोइतलु, आय तुमामे खोरो कोयु होय का मेंढाकोअता बाअणो आय होय.

⁸ ते आखे माआ पेल्योओ आव्ये ओते, ते सूर अने डाखू ओते परंतु मेंढावाही तियाआ होमल्यु नाहा.

⁹ आय बाअणो होय अने जो कोडु मारोत प्रवेश कोअत्लू ताहा तियाआ उद्धार जोडे अने जागे तार आवे अने बारथे जाइअलो अने तियाहा खाआलाकाजे जोडीत.

¹⁰ सूर आवत्लू तो-तो फक्त चोरी, खून अने नाश कोइला कोअता आवत्लू परंतु आय याकोअता आवयू होय का मांहोहो जाअखो जीवोन जोडे.

¹¹ “हाजू सारणारू आय होय, हाजू सारणारू आपाआ मेंढाकोअता जीव आपुहू शकतो”,

¹² पोन पाडाआ मजदूर तो सारणारू नाहा अने मेंढे तियाआ स्वतःआ कायनाओत जांहा कोयु आवत्लू तो तियाहा पालीत नाहीत जात्लू अने लांडगा मेढापो उडी टाकीत तियाहा दाणादाण कोअत्लू.

¹³ काम कोअनारे नाहीत जात्लू काहाके तो काम कोनारीइ होय काहाके तियाहा मेंढाआ कालजी कायना ओतो

¹⁴ हाजू गुवाल्यू आय होय आपाआ मेडांहा आय ओलखीत्लू अने माआ मेंढे माहु ओलखीत.

¹⁵ तेहलूज ओलखीत जेहलो परम बाह्हू माहु ओलखीत्लू अने आय परम बाह्हाहा ओलखीत्लू माआ मेंढाकोअता आय जीव आपोहो.

¹⁶ माआ फासी मेंढे होय जी मेंडा गोठाम नाहा माहु तियाहा पण घेऊन आवजी होय ते पण माआ वांणी होमीजीलो अने आव गोठाम आविलो एक उवे फासाडी आखाआ एकुच सारणारू होय.

¹⁷ परम बाह्हू माहु याकोअता प्रेम कोअत्लू का आय आपाआ जीव आपोहो आय आपाआ जीव आपोहो याकोअता का आय तियाहा फासी-फासी लेऊ शकतो ओ मापोरोत कोडु लेऊ शकत नाहा.

¹⁸ पोन आय स्वतः माआ इच्छावाहि आपित होय तो माहु आपलो अधिकार होय ऐ आज्ञा माहु माआ परम बाह्हू त्यापोरोत मिल्यू होय.

¹⁹ याआ शब्दापोरोत यहुदी अधिकारी माय एक फासी फुट पोड्यी

²⁰ वारुज कोहू लागाडीत ओ गांडू ओवयू होय यामे दुष्टात्मा लेतजा वास कोअयु होय तुमु ह्याआ काहा एकता?

²¹ किबी दिहरे मांहे कोयु, ओ शब्द एगदा एहलो मांहाआ ओवुहू शकत नाहा का ज्याहा दुष्टात्मा वास कोल्यु होय खरोज ए कोडु दुष्टात्मा लागल्यो कोडु आन्दालाहा डोआं आपुहू शकत नाहा.

यहूदीई अविश्वास

²² फासाडी यरूशलेमरोत फासो स्थापिला तिवार आवयू ओतु अने तेदीही हियालामे ओते.

²³ येशु मंदिरोम सुलैमान देवडीपाही फिरीत ओतु.

²⁴ तेहलाम यहुदी अधिकार्यांवाही तियाहा कोंडीत अने कोयु, “तू आमाहा कोयोजा संशयामे पोअनारू, जर तू ख्रिस्त होय ताहा आमाहा उघड कोआ.”

²⁵ येशु उत्तर आप्लु, “आय तुमामे कोयु होय अने विश्वास कोईत नाहा जे काम आय माआ बाह्हाआ नावामेहे कोअत्लू यामे तो स्वता साक्षी होय.”

²⁶ पोन तुमु मांहे विश्वास कोईत नाहा काहाके तुमु माआ मेंढावालामरोत नाहा.

²⁷ माआ मेंढे माआ आवाज ओलखीत अने आय तियाहा ओलखीत ते माआ फासाडी आवत्ले,

²⁸ आय तियाहा अनंत जीवोन आपोहो तियाआ केधीज नाश उवे नाहा अने कोडु तियाहा मापोरोत मागित लेऊ शकत नाहा.

²⁹ माहु तियापो हक्क आपणारो माआ परम बाह्हू आखाप रोत महान होय माआ बाह्हाप रोत तियाहा कोडु बुअसित शकत नाहा.

³⁰ माआ बाह्हू अने आय एक होय.

³¹ फासाडी यहुदी अधिकार्यांवाही येशुहू देउलाकोअता डोणो विसित.

³² येशु लेतजा तियाहा कोयु, बाह्हाप रोत आय तुमामे अनेक हाजो काम देखाडीलाआ होय तीयामरोत कोडला कामा कोअता तुमु माहु डोणो देही होय?

³³ यहुदी अधिकार्यांवाही उत्तर आप्लु, आमाहा ताहु कोडनीबि हाजा कामा कोअता डोणो वांहि देत कोईत नाहा ताहा यकोअता कोअनारू होय का तू परमेश्वरोओ निंदा कोईत होय अने तू फक्त एक मांहु होय, स्वतःहा परमेश्वर घोषित कोईत होय.

³⁴ येशु तियाहा उत्तर आप्लु, नाहाकोत ओ तुमाआ नियमांमे लेखिलो नाहा का, आय कोयु का तुमु आखे ईश्वर होय?

³⁵ नाहाकोत ईश्वर इंही तियाआ माहुंहु कोयु नाहा ज्याहा परम बाह्हाआ संदेश मिल्यू होय? अने धर्म शास्त्राआ भंग कोअयु जाऊ शकत नाहा.

³⁶ नाहाकोत ओ तुमु तियाआ कोअता पवित्र कोयु होय ज्याहा माआ निंदा बाह्हू स्वतःहा याआ जगात मोक्ल्यीत होय फक्त याकोअता का कोयु आय परमेश्वरोओ पोऱ्या होय

³⁷ जर आय माआ बाहाआ काम कोईत नाहा ताहा माआ विश्वास कोअहू नाहा.

³⁸ पोन जर आय माआ बाहाआ काम कोईत होय ताहा जर तुमु मापो विश्वास कोईत नाहा ताहा तियाअ कार्यापो ए विश्वास को ज्यापो तुमु ओ अनुभव कोहू सेकेहे अने ओलखुहू शकहू का माआ बाह्हू मामेह होय अने माआ बाह्हामे आय होय.

³⁹ योपो यहुदियाआ तियाहा कैदी बोनाडीला कोअता एकवा फासी प्रयत्न कोअयु पोन येशु तियाआ आथे निहित गोल्यो.

⁴⁰ येशु फासाडी यरदोन नदीच्या तिवोल तियाअ जाग्तली जातलू गोल्यो जीही पालील्यो योहान बाप्तिस्मे आपित ओतु येशु तीही उबलु

⁴¹ जास्तीज मांहे तियापो आव्ये अने तियाहा कोयु, योहान लेतजा जाखो आश्चर्य काम कोअयी नाहा परंतु याआ माहुबारामे योहान लेतजा जे कोयु ओते ते आखे खोरोज निकलीलू.

⁴² फासाडी त्याजागे जास्तीज माहु येशुपो विश्वास कोअयु.