याकूब 5 - नोयरी नोवलू नियम

धनवानोंहो सलाह

¹ ऐ धनवान होबलीत ते ले तुमु आपाआ आवनारा दुखापोओ आअडी आअडीत रोड़ा.

² तुमाआ धन बिगडी गोयोहो, अने तुमाआ कापडाहा किडा खात टाक्ये होय.

³ तुमाआ हुनो सांदी माय जंग लागीई होय; अने तो जंग तुमापो साक्ष आपी, अने आगी होस तुमाआ माहा खात टाकही तुमु शेवटच्या दिहोकोअता धन ओवरावल्ये होय.

⁴ पाला, ज्या मजुराहा तुमाआ खेत वाड्यो, तियाआ ती मोजरी जी तुमु फसाविल्यो मेकीत लेदि आअडित होय, अने वाडीलो कोनारापो रोत आअडीलो सेनाधीनच्या प्रभूउ कानापो जा पूगी गोयी होय.

⁵ तुमु धोरतीपो मज्याकोली अने विलास कोअयु अने वोडो हुख पालील्यो; तुमु आव वधाच्या तेदीही आपाआ दृष्टचे पालीलो पोषणाआ कोईत तियाहा वोडी तृप्ती कोअयी.

⁶ तुमु नितीमनाला दोषी ठेरवीत घात कोअयु, तो तूमूह विरोध नाहाकोईत.

धीरज तोअलोओ

⁷ याकोअता ऐ पाही, प्रभूउ आगमना पर्यंत धीर तोआ पाला, खेती कोअनारू धरतीइ कीमतीवालो पिंकाची वाट पालीत ओतलू पहीले अने आखिर पाई ओइता धीर तोयलो.

⁸ तुमु पोन धीर तोआ; अने आपाआ मनाहे कठीण को, काहाके प्रभूऊ आगमन जागे आव्ये होय.

⁹ ऐ पाही, एक दिहरापो दोष नाहा लागाडहु, म्हणजे तुमु दोषी नाहा ओवो; पाला, न्यायाधीश बाअणाआरी उबु होय.

¹⁰ ऐ पाही, जे संदेष्टाआ प्रभूउ नावामेहे हादाडल्यो का, तियाहा दु:ख उठाडीलो अने धीर तोहू एक आदर्श सोमजा.

¹¹ पाला, आमाहा धीर तोनारा धन्य कोअत्लू तुमु ताहा अय्यूबो धिरो बाराम होमल्याहा अने प्रभू वोल राखित जो तिया प्रतिफोल उवे तियाहा पण समजीतीजे लेधलो होय, ज्याही प्रभूऊ जाअखो कीव कोअत्लू अने आपा देखात्ले.

¹² पोन ऐ माआ पाही आखाम श्रेष्ठ गोठी ए होय का शपथ नाहा मागिलो, नाहा स्वर्गाची, नाहा धोरती, न कोडला वस्तूअ, पण तुमाआ गोगीला होय का होय, अने नाहा ताहा नाहा, का तुमु दोषी ठरू कायना.

विश्वास पूर्ण प्रार्थनाआ शक्ति

¹³ जर तुमामेय कोडु दु:खी होय, ताहा तिये प्रार्थना कोईली जर खुशिमेहे होय, ताहा तिये स्त्रोतरे गावी.

¹⁴ जर तुमा मेहे कोडु मांदवाड्यू होय, ताहा मंडली डायाहा हादिलो, अने ते प्रभूउ नावोवांहि तियापो तेल लागाडी त्याकोअता प्रार्थना कोईलो,

¹⁵ अने विश्वासाआ प्रार्थना व्दारे मांदवाड्यू वासित जानारू अने प्रभू तियाहा उठवीत उभे कोअनारू; अने जर तिये पाप पण कोल्यु होय, ताहा तियाआ पण क्षमा उवनारा जानारू.

¹⁶ याकोअता तुमु स्वता कोअता एक दिहरा आगाडी आप आपाआ पापोओ काबलील्यो कोईत ल्या, अने एक दिहरा कोअता प्रार्थना को, ज्याही हाजो उवनारा जानारू नीतिमानाची प्रार्थनेच्या स्भावाने जास्तीज किबी उवहू सेकोहो.

¹⁷ एलिया पण ताहा आपाआ सार्खू दु:ख हुख भोगणारा मांहु ओतु; अने तिये विनंती कोईत प्रार्थना कोअयी का पाई नि पोडे; अने साडेतीन साल परंत धरतीपो पाईनाहा पोड्यू.

¹⁸ फासाडी तिये प्रार्थना कोअयी, ताहा जुगोमरोत पाई पोड्यू, अने जमीन फोल उपजाडिले.

¹⁹ ऐ माआ पाही, जर तुमा मेहे कोडु सत्त्याआ मार्गाप रोत भटकून जानारू अने कोडु तियाहा फासाडी आवनारू फिरीही,

²⁰ ताहा माघार फिरीही, तोओ एक जीवोहो मोअनाराप रोत वासाडे अने तियाआ पापा वर परदा टाकही.