याकूब 3 - नोयरी नोवलू नियम

जीभ एक आग

¹ ऐ माआ पाही तुमा मेहेरोत खोब जोओ उपदेशक नाहा बोने काहाके जाअ ताहा का आमू उपदेशक ईजी बी दोषी ओवूहू.

² याकोअता का आमाहा आखे खूप टायमोआ चुकीत जात्लू; जो कोडु वचनोम नाहा सुक्तलू तोज ताहा सिद्ध मांहु होय अने आखे डिलोरी पण लगाम लागाडहु सेकतेहे.

³ जाहा आमू आपाआ ताबामे कोइला कोअता गोदडा मुख माय लगाम लागाडीत, ताहा आमाहा तियाआ आखे डीला पण फेरवूहू शकतो.

⁴ पाला, जहाज बी, ती एवडी वोडी रोतेहे अने जास्ती वाराआ लोटली जातेहे, तेबी पण एक आयती नाव द्वारा माझीई इच्छावाहि फिरविल्यो जाहो.

⁵ तेहलूज जीभ पोन एक हानोतो अवयव होय अने ती वोडी-वोडीई गोठीई फुशारकी देत्लो पाला, थुडा आगी सी केतो वोडा जंगलूम आगी लागाडी जाहो.

⁶ जीभ पोन एक आगी होय; जीभ आपाआ अवयवात अधर्म मंदिर होय, अने आखे डीलोपो कायने हाजो कोअल्यो, अने जीवनामे आगी लागाडी आपल्या, अने नरकाआ कुंड्याच्या आगीमेहे पेटीत रोनारे.

⁷ काहाके हर एक प्रकारोओ श्वापदे सिडे, अने होरकीज प्राणी, अने समुद्रामेये मांहु स्वभावो उवनारा होय अने उवनारा पण गोये होय,

⁸ पोन जीभेहे मांहोम रोत कोडु ताबामे नाहा कोहू शकत; ती एक एहली बिली होय जी केधी उबोरथ पण नाहा, ते प्राणघात विइलो पोअल्यी होय.

⁹ त्यावाहिज आमाहा प्रभू अने बाह्हाआ स्तुती कोत्ले, अने इच्छा वाहिजे मांहाहा जो देवाच्या प्रतीरुपोओ तीयार ओवयू होय शाप आपोहो

¹⁰ एकुच मुखोवाही आशीर्वाद अने शाप निकले ऐ माआ पाही, एहलो नाहा उवूंहू जोवे.

¹¹ कि झऱ्याच्या जीरामेरोत गुल्यो अने कोडवो पाई बेनु निकले?

¹² ऐ माआ पाही, की अंजिराआ साडामेहे जैतून, पोन द्राक्ष वेळेला अंजीर आवे? तेहलूज खाऱ्या पाअयोपोरोत गुल्यो पाईनाहा निहुं शकत.

खरु विवेक

¹³ तुमामे ज्ञानी अने समजदार कोडु होय? जो एहलो होय तो आपाआ कामाकोता हाजो चाल चालाळनारू नम्रतेने सादर कोईओलो जो ज्ञायांनी उत्तम ओते.

¹⁴ पोन जर तुमु आप आपाआ मोनामे कोडवो पण अने विरोध मेकीत होय, ताहा सत्त्याआ विरोधाम घमंड नाहा कोहू, अने नाहा खोटो गोगू.

¹⁵ ओ ज्ञान ते नाहा जे उपोरोत उतरीत्ले, परंतु सांसारीक, अने शारीरिक, अने शैतानो वोगरे होय.

¹⁶ काहाके जेहेलो खोत लागती अने विरूध ओते, तीइही अव्यवस्था अने हर एक पाप पण ओतू.

¹⁷ पोन जे ज्ञान उपोरोत आवत्लू ते पहीले ताहा पवित्र ओतू शांती प्रियआ, सौम्य अने होण्या जोगे अने दया अने हाजो सत्फले याआ पुरो अने अपक्षपाती निर्दभ एहलो-एहलो होय.

¹⁸ पुरो शांती कोअनारे नीतीमत्वरुपी फोल मेल मिलापोरी आरी उरतले होय.