याकूब 2 - नोयरी नोवलू नियम

पक्षपातो विरुद्ध चेतावनी

¹ ऐ माआ पाही आमाआ महिमा युक्त प्रभु येशु मसीहा पोओ तुमाआ विश्वास पक्षपात आरी ने होय.

² काहाके का केधी एक माहु बेनाआ अंगठी अने हाजी कापडे रीगडल्यो तुमाआ मिटींगोमे आवयू, अने, एक कंगाल पण मोयले कुसटाले कापडे पेईत आवयू,

³ अने तुमु तिया हाजी वस्त्रवाल्याला सोब पालीत कोआ, “तू तिया हाजलो जागापो बोह,” अने तियाअ हाकी कोजी तू ईहिजे उबु रो, केधी “माआ गुडाजागे बोह.”

⁴ की तुमु आपसामेहे भेदभाव नाहा कोअयु अने वाईट विचाराआ न्याय कोअनारे नाहा ठरव्येहे?

⁵ ओ माआ प्रिय पाही, होमला की परमेश्वराने आव जगोमेऱ्या कंगालोहो नाहा निवडील्ये का विश्वासामेहे धनवान अने तियाअ राज्याआ अधिकारी होय, ज्याआ प्रतिज्ञा तिये तियाहा कोअयी होय जे तियापो प्रेम कोअता?

⁶ पोन तुमु तिया कंगालो अपमान कोअयु कि धनवान मांहे तुमापो अत्याचार नाहाकोईत अने कि ओच तुमामे कचहरि मेहे खेचीलो-खेचीलो नाहा लेतजात?

⁷ किते उत्तम नावाआ निंदा नाहाकोईत ज्याआ तुमु कोलीजे जातेहे?

⁸ तेबी केधी तुमु “पवित्र शास्त्राआ आव वचनाआ नुसार का” तू आपाआ आरी कोरयापो आपाआ एकहरको प्रेम को खरोज तिया राज्य नियमशास्त्राआ पुरो कोईलो ताहा हाजो कोअता.

⁹ पोन केधी तुमु पक्षपात कोअता ताहा पाप कोअता; अने नियमशास्त्र तुमामे अपराधी ठरवितो.

¹⁰ काहाके का जो कोडू आखे नियमशास्त्राआ पालीत कोअता परंतु एकुच गोठी माय चुकीत जाय ताहा तो आखे गोठी माय दोषी ठेरव्यू गोल्यो होय.

¹¹ याकोअता जिये ओ कोयु, “तू व्यभिचार कोहू नाहा” तीयेज ओ पण कोयु, तू हत्या कोहू नाहा, “याकोअता केधी ताआ व्यभिचार नाहा कोअयु पण” हत्या कोअयी तेबी पण तू नियमशास्त्रा तियाआ उल्लघन कोअनारू ठरेल.

¹² तुमु तिया मांहाहा एकहरको वचन गोगे अने काम पण को, ज्याआ न्याय स्वातंत्र्याच्या नियमशास्त्राआ नुसार उवे.

¹³ काहाके का जिये आपा नाहा कोअयी तिया न्याय बिना दयावाही उवे आपा न्यायावर विजय पावनारो.

विश्वास अने कार्य

¹⁴ ओ माआ पाही केधी कोडु कोयु का माहु विश्वास होय पण तो कर्म नाहाकोईत, तारण तियाआ पोरोत कि लाभ?

¹⁵ कि एहेलू विश्वास केधी तिया उद्धार कोहू गोयो? केधी कोडु पायहो

¹⁶ नेताहा बोइई उनो मेकीला होय अने तियाहा शांती दाडी होद्ही खाअलाआ टायम ओयताहा

¹⁷ अने तुमाआ मायत्यू कोडु तियाहा कोयु “सुखाआ जा तुमु तोपेहे रो अने तृप्त रो” पण जे वस्तू आपलो कोअता आवश्यक होय ते तियाहा नाहा आप्लु ताहा की लाभ?

¹⁸ तेहलूज विश्वास पण, केधी कर्म आरी नाहा होय ताहा आपाआ होभाव प्रमाणोओ मोल्यू होय.

¹⁹ ताहू विश्वास होय के एकूज परमेश्वर होय, तू हाजो कोअत्लु, दुष्टत्मा बी विश्वास मिकत्ले अने कापत्ले.

²⁰ माहु विश्वास होय का एकुच परमेश्वर होय; तू हाजो कोअत्लू पुते ए विश्वास मेकात्ले अने थर-थर कापत्ले?

²¹ पोन ऐ बुद्धीहीन महांआ, कि तू ओ पण नाहा उलखित्लू का कर्म विना विश्वास व्यर्थ होय धर्मी जाहा आपाआ बाह्हू आब्राहम?

²² आपाआ पुत्र इसाहाकाला वेदीवर सोडविलो, ताहा तो की कानोवाही धोर्मी नाहा ठरवील्यु?

²³ अने पवित्रशास्त्रो अओ वचन पुरो ओवयो, “अब्राहम परमेश्वर पोओ विश्वास कोअयु, अने अओ तिया कोअता धार्मिकता ओवयी” अने तोओ परमेश्वरो मित्र कोवायु.

²⁴ पवित्र शास्त्रचे ओ वचन पुरो ओवयू होय अब्राहम परमेश्वरोओ विश्वास कोअयु, अने ओ तियाआ याकोअता धर्म मोजल्या गोये अने तो परमेश्वरा चा हेगांति कोयु गोल्यो.

²⁵ आव प्रकारे तुमु पहीले का मांहु फक्त दूत विश्वासा नाहा, ताहा कर्माने पण धोर्मी ओलखिणारा?

²⁶ जेहे डील आत्मा बिगुर मोअली होय, तेहेज विश्वास बी मोअलू होय.