इब्रानि 9 - नोयरी नोवलू नियम

सांसारिक तम्बू

¹ ती पेल्ली वाचा में बी सेवाआ नियम ओते अने एहलो पवित्र स्थान ओतो जा या जगताआ ओतो

² काहाके एक मंडप बनविल्यो गोल्यो, पाल्या मंडपा मेहे दीपवृक्ष दिवट अने मेज समर्पणाच्या रोटा ओता; अने ते पवित्र स्थान कोयु जात ओते.

³ दिहरु पडदु फासाडी तो मंडप ओतु, जो परम पवित्र स्थान कोअहो जात्लू.

⁴ तीयाम हुनाआ धूपदान अने सोमकीर हुनाआ सी मडी देदलो कराराचा कोश अने मान्नांने पोल्यो हुनाआ सुवर्ण पात्र अने हारूनची काठी ज्याम फुल अने फोल आविलो गोये ओते अने कराराच्या पाटी कोयू.

⁵ तिया उपोओ बेनो तेजस्वी करूब ओते, जे प्रायश्चित ढकनावर सावलू कोयु ओते; तियाआ एक-एक कोईत वर्णन कोअला वेल ओमे नाहा.

सांसारिक सेवाआ सीमा

⁶ आव वस्तु यावाही तीयार ओत गोयी तियाअ पाल्या मंडपा मेहे याजक हर एक टायमोमें प्रवेश कोईत सेवेए काम पुरो कोईत रोतेहे,

⁷ पोन दिहरा मंडपा मेहे महायाजक फक्त वऱ्योमेहे एकुजवा जात्लू अने रक्त आप्लु ताहा जात नाहा जातो आपाआ अने मांहाहा ने समजीत्लो कोईलो पापो कोअता अर्पण कोअत्लू.

⁸ याकोईत पवित्र आत्माआ ओच देखाडीत होय का जो परंत पेल्लु मंडप उबु होय, तो परंत पवित्रस्थान मार्ग उघड ओवयू नाहा.

⁹ ओ मंडप वर्तमान टायमा काजे एक दृष्टान्त होय ज्याम एहली बलिदाने अने भेट अर्पण कोल्यु जातेहे याकोअता उपासना कोअनाराआ विवेक भाव पुरो ओवुहू शकत नाहा.

¹⁰ काहाके ते फक्त खाअलोओ अने पिअलो वस्तु अने अलग-अलग डीलो विधीच्या आधारापो डीलो नियम होय, जे हुदराविलो टायमोपोजा साठीच ठेरव्यो गोये होय.

स्वर्गीय तंबू

¹¹ पोन जाहा ख्रिस्त आवनाराआ हजा हाजा वस्तूंऊ महायाजक बोणीत आवयू, ताहा तिये फासी वोडो अने पुरो मंडपा तुन जो आथोसी बनविल्य नाहा कोअतीज आव धोरतीई नाहा,

¹² अने बोकडाआ अने कोकऱ्याच्या रक्ताआ त्यापोरत नाहा पण आपाहाज रक्ताद्वारा, एकुजवा पवित्र स्थानात प्रवेश कोअयु अने सार्वकालिक छुटकारा जोडयो कोअयु.

¹³ काहाके जाहा बुकडाआ अने बोयलो रक्त अने कलराची रोवा तियाआ अपवित्र माहुपो साटीलो डीलोओ शुद्धी करणासाठी तियाहा पवित्र कोईत रोतो,

¹⁴ ताहा येशु ख्रिस्ताआ रक्त जीआ स्वतःहा सार्वकालिक आत्माआ त्यापोरत परमेश्वरा आगाडी निर्दोष अर्पण कोल्यु, तुमाआ विवेक बुद्धीला मरण पाविल्यो का मापोरोत काहा शुद्ध कोअनारू नाहा तुमु जिवंत परमेश्वरोओ सेवा को.

¹⁵ यामुळे तो नव्यो कराराचा विसमेहेज होय, म्हणजे तियाआ मोईत गोल्यो जे पाल्या कराराच्या टाइमो अपराधो छुटकारु त्यापोरोत हाजो उविला कोअता ओवयू होय, हादाळल्यु मांहे वोचाना प्रमाने सार्वकालिक वारस प्राप्त कोओ.

¹⁶ काहाके जीही करार बांध्यू होय तीइही करार बाधनारु मरण होमजीत घेणे पण जरुरी होय.

¹⁷ काहाके एहेलू करार मरण पावताना नक्की उवनारा ओते, अने जोपोरोत करार बांधनारु जिवंत रोतलू तोपोरोत करार कामा रोत नाहा.

¹⁸ त्यापोत पेल्लु करार पोन रक्ता वांही बांध्यू गोल्यो नाहा.

¹⁹ काहाक जाहा मोशेई आखे मांहो व्यवस्था वासित आज्ञा देखाडल्ये ताहा तिये कोकरू अने बुकडाआ रक्त घेऊन पाई अने लाल करमीजी लोकर अने एजोब साळो आरी तियाअ पुस्कापो अने माहुपो शिपटीलो आप्लु

²⁰ अने कोयु ओ तियाअ कराराआ रक्त होय ज्याआ आज्ञा परमेश्वराने तुमा कोअता आप्यी होय.

²¹ अने यावाही तिये मंडप अने सेवाआ आखे साहित्यापोर रक्त सिपडीलो.

²² खर ताहा ओ होय का व्यवस्थेनुसार म्हणजे आखे वस्तु रोगुतरी शुद्ध कोअल्यो जातेहे अने रक्त आवल्याताहा पापोओ क्षमा उवनारा नाहा.

मसीह बलिदानों द्वारा पाप क्षमा

²³ त्यापोत जरुरी होय का होरगा मेरयो सामाना हारखेज आव बलिदानोकोता शुद्ध कोल्यु जाहू जोवे पण होर्गामेरोते वस्तु स्वतः यामे श्रेष्ठ बलिदानाने शुद्ध उवे जरुरी होय.

²⁴ काहाके ख्रिस्ताने तियाअ ओतु कोईत बोनावित मेक्यो पवित्र स्थानात जो खोरो पवित्र स्थानाआ उदाहरण होय तीयाम प्रवेश कोअयु नाहा पण होर्गा मेज प्रवेश कोअयु म्हणजे आमा कोअता परमेश्वरा आगाडी देखिलो जोवे.

²⁵ ते नाहा का तो स्वतःहा फासी-फासी चोडविलो जेहलो महायाजक दरवर्हे दिहराआ रक्त घेऊन पवित्रस्थान प्रवेश कोईत रोतलू,

²⁶ नाहा ताहा जुगाआ स्थापने पासून तियाहा फासी-फासी दुख सहन कोईओलो लागाडीत ओते; पण युगाआ संपली मायतो एकुजवा प्रकट ओवयू होय म्हणजे आपाहाज बलिदानाने पाप सेटे कोईत आपी.

²⁷ अने जेहलो मांहाकोअता एकवा मोईलो अने तिया फासाडी न्याय उवे ठेरव्यो होय.

²⁸ तेहलूज ख्रिस्तपण केताजोहो पापाआ घेण्यासाठी एकाच टायमोमें बलिदान ओवयू; अने जे मांहे तियाआ वात पालल्ते तियाआ उद्धारो जेहे दिहरीवेले पाप न विसित देखाईलो.