इब्रानि 8 - नोयरी नोवलू नियम

स्वर्गीय महायाजक

¹ ओमे जी गोठी आमू कोअताहा तियामेहे रोत वोडी गोठ ऐ होय का आमाआ एहलू महायाजक होय जो होर्गा पोओ महामहिमोओ सिहांसनोओ हुदिवोल जात बोहयुहू.

² अने पवित्र स्थानाच्या अने तियाअ खोरो तंबूउ सेवक ओवयू ज्याहा कोडु प्रभूऊ उबु कोअयु होय.

³ काहाके हर एक महायाजक अर्पण अने बली सोडावूहू कोअता ठेरवीही जात्लू तियामेहे जरुरी होय का आव याजकाआरी पण किबी तेबी सोडावूहू कोअता रोंहु जोवे.

⁴ जर तो धोरतीपो रोला ओतलू ताहा केधीज याजक ओवयू नसते यकोअता व्यवस्थेनुसार अर्पण कोनारे ते होय.

⁵ ते होर्गाआ मेरयो वस्तूआ अने सावलु सेवा कोअता जेहलो जांहा मोशे मंडप बोडाविही ओतु तेहलाम तियाहा ए आज्ञा जोड़ी जेहलो नमुना ताहु डोगोपो देखाड्यो ओतु तेहलो आखे किबी बोनाविलो.

⁶ पोन तिया याजका पेक्षा श्रेष्ठ सेवा येशुहू जोड़ी काहाके तो फासी उत्तम कराराचा मायतोमे ठरवील्यु तो फासी हाजा वायदा मेहे सहायाने बांध्यू गोल्यो होय.

नवली वाचा

⁷ काहाके जर तो पेल्लु करार निर्दोष रोती ताहा दिहरा करारा याकोअता योग्य वेल होदल्यो गोल्यो नसते

⁸ पोन तो तियापो दोष लागाडी कोयु होय पाला प्रभू कोयु होय तेदीही आवीत होय का आय इस्राएलो घरानारी अने यहूदाच्या घरानारी नवो करार बांदीही.

⁹ ए तिया वाचा होस उवे नाहा जी आय तियाअ पुर्वजा आरी तियाअ टायमोमें बादयोहो ओती जांहा आय तियाआ आथे तोईत तियाहा मिसर देशोमेरोत काढीत लाविले काहाके ते माआ करारावर स्थिर रोल्या नाहा त्यापोत आय तियाआ देखभाल कोअयु नाहा, प्रभू ओच कोत्लू.

¹⁰ फासी प्रभू ओ कोत्लू का जो करार आय तियाअ दिहो नंतर इस्राएलोम घरानारी बांदीही, ते ओ होय का आय आपाआ व्यवस्थेला तियाआ मोनुमे टाकही अने तियाआ मोनापोओ लेखनारो अने आय तियाआ परमेश्वर ठराविलो अने ते माआ मांहे ठराविलो

¹¹ अने हर एक आपाआ देसामे रोत अने आपाआ पायहोहो ए हिकवन आपी नाहा का तू प्रभूहु उलखे काहाके हानापोरोत वोडाप जाआ आखे माहु जाईत लेय.

¹² काहाके आय तियाआ अधर्मा विषयाम दयालु रोही अने तियाआ पाप फासी ओर कोअनारू नाहा.

¹³ नव्यो कराराआ बनावल्या तिये पाल्या कराराओ जुनो ठेरवीत आप्लु अने जी वस्तु जुनो अने जीरल्यो ओत जाहे तियाहा नाहीसे ओनारो होय.