इब्रानि 7 - नोयरी नोवलू नियम

मल्किसिदिक याजक

¹ ओ मलिकिसिदक शालेमाआ राजा अने महान परमेश्वरोओ याजक कायम याजक बीनित रोतलू, जांहा अब्राहम राजाहा माईत वापस आवतु ओतु, ताहा ओओ तियाआ भेट कोईत तियाहा आशीर्वाद आपलू.

² यामेहेज अब्राहम आखा वस्तूऊ दहावू भाग आप्यू ओ सुरवातीती आपाआ नावोओ अर्थानुसार धर्माआ राजा अने फासाडी शालेम म्हणजे शांतीचा राजा होय.

³ ज्याआ बाह्हू नाहा किंवा याह्ही नाहा वंशावळी नाहा ज्याआ दिहाआ न सुरवात होय अने न जिवनाआ आखिर होय पण परमेश्वरोओ पोऱ्याहोस बोणीत तो कायमो कोअता याजक बोणीत रोतलू.

⁴ ओमे यापो लक्ष्य लागाडा का तो केहलु वोडू ओतु ज्याहा पिढीही अधिपती अब्राहम लुटलाम रोत उत्तमातून उत्तम वस्तूउ दहावू भाग आप्यू.

⁵ लेवीई पोऱ्याआ तीही जे याजकाचे जागा मेलविलो ताहा तियाहा आज्ञा जोडीहो होय का मांहो कोअतीज आपाआ पायहोपो रोत जरी तो अब्राहम पोरोत बी जन्मूला ओय पण व्यवस्थेच्या नियमाप्रमाणे दहावू भाग लेई जोवे.

⁶ पोन इये जो तियाआ वंशावळी मधला पण ने ओतू अब्राहमोप रोत दहावू भाग लेदो अने ज्याहा प्रतिज्ञा जोडयेहे ओते तियाहा आशीर्वाद आप्यू.

⁷ यामे शंका नाहा का हानू वोडो त्यापोरोत आशीर्वाद मिललू.

⁸ अने इही ते मरणहार मांहो दहावू भाग लेत होय पण तीइही तोज लेहो त्या जीवाणु साक्ष आप्यी जाहो का तो जीवतु होय.

⁹ ताहा आमाहा ओ पण कोहू शकतो का लेवी बी पण दहावू भाग लेहो अब्राहमोओ आरी दहावू भाग आप्यू.

¹⁰ काहाके ज्यावेळी मलिकिसिदक तियाआ बाह्हा आरी भेट लेदि त्या टायमोहो तो आपाआ बाह्हाआ डीलोम ओतु.

एक नवला याजकोओ आवश्यकता

¹¹ जर लेवी याजक पदावालू पूर्णता मिलीलो होय (ज्याच्या मदतीवाही मांहो व्यवस्था जोड़ी ओती) ताहा फासाडी की जरुरी ओते का दिहरु याजक मलिकिसिदकाआ रीतीपो उबु रोअला आवे अने हारूनाआ रीती मेहे कोयू जात ने ओय?

¹² काहाके जाहा याजकाचे जागा बोदालीत गोयो जाहो ताहा फासाडी व्यवस्थाआ पण बदलीलो जरुरी होय.

¹³ काहाके ज्याआ विषयी आव गोठी कोयु जातेहे तो दिहरा कुलाम रोत होय ज्या कोडूच वेदी आरिजे काम कोल्यु नाहा,

¹⁴ ताहा उघड होय का आमाआ प्रभू यहूदांच्या कुलोमरोत उगवियोहो होये आने आव वंशाआ विषयाम मोशेई याजक पदाच्या किबी चर्चा कोअयी नाहा.

¹⁵ आमाआ दावा फासी पण स्पष्ट पणे उघड उवनारा होय का जांहा मलिकिसिदक हारका फासी एक याजक उत्पन्न उवनारा होय,

¹⁶ जो शारीरिक आज्ञा व्यवस्थे प्रमाणे नाहा पण नाश उवे नाहा एहलो जीवनाआ सामर्थ्याआ अनुसार ठर्विलो होय.

¹⁷ काहाके तियाआ विषयाम ए साक्ष आप्यी गोयी होय, “तू मलिकिसिदकाआ रीतीपो कायम याजक होय”

¹⁸ या प्रकारे, पेल्ली आज्ञा निर्बल अने निष्फळ ओत गोयी ती लोप उवी होय

¹⁹ (यामुळे का व्यवस्थेने कोडलाज गोठीई पुरावत्लू कोअयी नाहा) अने तियाआ जागापो एक एहली उत्तम आशा मेकल्यी गोयी होय जीयीवाही आपु पर्मेश्वरारी जाऊ शकतो.

नवला महायाजकोओ महानता

²⁰ ख्रिस्ताची नियुक्ती बिगर करार ओवयी नाहा,

²¹ काहाके ते ताहा करार लेधलो नाहा तेहलूज याजक ठेरवीही गोयू के नाहा ओ नियुक्त त्यापोरोत ठेरव्यो गोल्यो जीआ तियाआ विषयी कोयु गोये, “प्रभू लेतजा करार लेदि, अने तो तियाआ त्यापोरोत फस्ताय की तू कायम याजक होय.”

²² यावाही येशु एक उत्तम कराराचा साक्षीदार ठरवील्यु.

²³ ते ताहा जास्तीज वोडो संख्या मेहे याजक बोनावोओ आव्ये याआ काहाके ओओ ते का मरण तियाहा रोहू आपित नाहाओती,

²⁴ पोन ओ कायम रोत होय त्यापोत तियाआ याजकपद अटल होय.

²⁵ यामुळे जे तियाआ त्यापोरत पर्मेश्वरारी आवत्ले तो त्याआं पुरो पणे तारण कोहू शकतो काहाके तो त्याकोअता विनंती कोअला सर्वकाल जिवंत होय

²⁶ कोईत एहलो महायाजक आमाआ योग्य ओतु जो पवित्र अने किजने अने निर्मळ अने पापी जनोपोरोत जुदो अने स्वर्गाहून पण उचो कोअल्यू जोवे.

²⁷ तिया महायाजका होस तियाहा जरुरी नाहा का दारीजे पालील्यो आपाआ पापो कोअता फासाडी मांहाहा पापो कोअता अर्पण काहाके तिये स्वतःहा बळी चोढावीन एकुजवा पुरो कोहू आप्लु.

²⁸ नियमशास्त्र दुर्बल आशा मांह्हू महायाजक नेमतो पण नियमशास्त्रा पसाडी शपथ वोहीत उचलेले वचन कायम पुरोओत कोईलो पोऱ्याहा नेमतो.