इब्रानि 6 - नोयरी नोवलू नियम

भट्किलोओ परिणाम

¹ याआ कोअता आवा मसीहई शिक्षाआ सुखातीई गोठीही सोडित कोईत आमू सिद्धता वोगे आगाड़ी वोड़ते जाऊ अने मोअला कामासे मोन फीरावीलो अने परमेश्वराआ पोओ विश्वास कोइलो,

² अने बाप्तिस्मे अने आथे मेकिलो अने मोल्याहा जिवंत कोअला अने अनन्त न्याय शिक्षणाचा स्वरूपअ गुडू फासी टाकुहू कायना.

³ जर परमेश्वरोओ गोमे ताहा आपु ओच कोहू.

⁴ काहाके जिये एकवा प्रकाश प्राप्त ओवयु अने जे होर्गाआ वरदानोओ चव साखीत लेदेहे अने पवित्र आत्माआ सहभागी उवे.

⁵ अने परमेश्वरोओ श्रेष्ठ वचनाआ अने आवनाराआ कालोंओ सामर्थ्याआ चव साखीत लेदेहे.

⁶ जर ते बहकून जानारू ताहा तिये मोन फिरविला कोअता फासी नवो बोनारो नेउवे होय; काहाके ते परमेश्वरोओ पोऱ्याहा आपाआ याकोअता फासी कृसापो चढवीतले उघडपणे तियापो दोष लागाड.

⁷ काहाके जी जमीन पायो पाण्याहा जे तियाआ उपो फासी-फासी पोडीत ओते पित-पित ज्या मांहो कोअता ती जुपल्यु कोईत पेहे जात ओते, तियाआ कामा साळो उगाडल्यु, तीही परमेश्वारापो रोत आशीर्वाद मिललू.

⁸ पोन जर ती साडे अने काटो कुसळे उगाडल्यु बेन कामोओ अने शापित उवे होय अने तीई आखिर पेटाडीत टाक्लू होय.

⁹ पोन ऐ प्रीयांनो, जेबी आमाहा याआ गोठी कोयु होय तेबी तुमाआ विषयी यापोरोत हाजा अने तारणाच्या गोठीई भोरुसो मेकीत रोतो.

¹⁰ काहाके परमेश्वर जुलूम कोअनारो नाहा का तुमाआ काम अने तिया प्रेमाहा विहराइत जो तुमु तियाआ नावाकोअता यावाही देखाये होय ए पवित्र लोकांची सेवा अने कोअतुज होय.

¹¹ पोन आमू इच्छा कोअत्लू का तुम्हाहि रोते हर एक जोओ शेवटपोरोत पुरो आशा कोता ऐहलेच प्रयत्न कोईत रो.

¹² तुमु आळशी मा ओवाहा तियाआ अनुकरण कोजे विश्वास अने वायदाचे वारस ओये.

विश्वासनीय प्रतिज्ञा

¹³ परमेश्वराने अब्राहमोरी वचन आपलो वेले जांहा प्रतिज्ञा घेण्यासाठी कोडोबी खुदोप रोत वोडो पालील्यो नाहा तेहलाम आपाज प्रतिज्ञा घेऊन कोयु,

¹⁴ “आय खरोज ताहु आशीर्वाद आपी अने ताआ संततीला वोडावतु जाही.”

¹⁵ अने आव प्रमाणोओ तिये धीरज तोईत प्रतिज्ञा आप्योहो गोठी मेलवी.

¹⁶ मांहो ताहा खुदोप रोत कोडावोडू शपथ लेत रोत्ले अने तिया हर एक विवादों निर्णय आरी जाहू नक्की ओतू.

¹⁷ त्यापोत जाहा परमेश्वराने वचनाआ वारसावर फासी स्पष्ट पणे प्रकट कोअलाआ प्रयत्न कोअयु का तिया उद्देश बोदलीलो शकत नाहाकोईत शपथीला माय लाविले.

¹⁸ म्हणजे बेन बदलावणाऱ्या गोठीरी ज्याआ विषयी परमेश्वरोओ खोटो ठरविल्य नेउवे होय मजबुते आमाहा हिम्मत बांधीत जाहू जोवे जे आश्रय घेण्यासाठी यामुळे गुगदिलो होय का तियाअ आशाहा मेकली होय ती जोडली.

¹⁹ ती आशा आमा कोअता आमू जीवाकोता एहली ओल होय जी स्थिर अने मजबुते होय अने पडदु माय पर्यंत पोत्ली,

²⁰ जीही येशु मलिकिसिदक कायमो रीतीपो आखाआज महायाजक बोणीत आमा कोअता मार्ग देखाडनाऱ्या रुपात प्रवेश कोअयु होय.