इब्रानि 4 - नोयरी नोवलू नियम

विश्राम मेहे प्रवेश

¹ याआ कोअता जहा का तियाआ आरामा मेहे प्रवेश कोइलाआ प्रतिज्ञा ओमे जाआ होय ते आमाहा भिईलो जोवे एहलो ने होय का तुमु मेह्रोत एखु जोओ त्याआसे वंचित रोतजाय.

² काहाके आमाहा त्या हारका सुवार्ता कोल्यी गोयी होय पण होमलित रोल्या वचनाने तियाहा किबी फायदा ओवयू नाहा काहाके होमलाडनारा मोनामे विश्वासाआरी बोह्ये नाहा.

³ पोन आमू जिये विश्वास कोअयु होय तियाअ आरामात प्रवेश कोअता जेहलो तिये कोयु, आय आपाआ क्रोध मेहे शपथ खादू का ते माआ आरामात प्रवेश कोहू सेकेहे नाहा म्हणजे जुगाआ पेलेरोत तियाआ काम पुरो उवे ओते.

⁴ काहाके सातवा दिहाआ विषयाम तिये का एहलो कोयु होय परमेश्वराने सातवा दीही आपाआ आखे कामोहो पुरो कोईत आराम कोल्यु.

⁵ अने आव जागापो फासी ओ कोयु होय ते माआ आरामात प्रवेश कोहू सेकेहे नाहा.

⁶ ताहा जाहा ए गोठी बाकी होय का केतो फासी होय का ते तियाअ आरामात प्रवेश कोअनारू अने ज्याहा तियाआ सुवार्ता पेल्ली कोल्यी गोयी तिये आज्ञा न मानल्याने तियाआ माय प्रवेश कोअयु नाहा,

⁷ त्यापोत तो कोडलो तेबी विशेष दिह्याहा ठेरवीत ओतो दिहो नंतर दाविदाआ पुस्तकाम तियाहा “आजेऐ दीही” कोयु होय जेहलो पालील्यो कोयु गोये, “जर आज तुमु तिया शब्द होमलीनारू, ताहा आपाआ मोनोहो कोठर कोहू नाहा”

⁸ काहाके जर यहोशू तियाहा आरामात प्रवेश कोईत लेदो रोत्लो ताहा तिया फासाडी दिहरा दीहीओ चर्चा नि ओवती.

⁹ कोईत होमजीत ल्या का परमेश्वारच्या मांहो कोअता शब्बाथाचा आराम बाकी होय,

¹⁰ काहाके जिये तियाआ आरामात प्रवेश कोअयु होय तिये पोन परमेश्वरा सारखेच आपाआ काम पुरो कोईत आराम कोल्यु होय.

¹¹ कोईत आपु तिया आरामात प्रवेश कोअलाआ प्रयत्न कोईलो एहलो उवूंहू नाहा का कोडु तियाआ सारखो आज्ञा न माजित पोडीत जालो.

¹² काहाके परमेश्वरोओ वचन जिवंत अने प्रबळ अने हर एक दोनधारी तलवारीप रोत पण जाखो तेज होय अने जीव अने आत्माहा अने गाठ-गाठ आने गूदे-गूदे हा अलग कोईत आर-पार जात्लू अने मोन भावना अने विचारोहो जाच कोअत्लू.

¹³ सृष्‍टिई उत्पन्न कोअली कोडलीस वस्तु त्यापोरोत निकाली नाहा पण ज्याआ आमाहा काम होय तियाआ डोआ आगाडी आखे वस्तु उघड अने प्रकट होय.

आपाआ महान महायाजक

¹⁴ त्यापोत जांहा आमाआ एहेलू वोडू महायाजक होय जो स्वर्गाहून गोल्यो होय कोअतीज परमेश्वरोओ पुत्र येशु ताहा आव आपु आपाआ तोअले मजबुते तोईत रोअलो.

¹⁵ काहाके आमाआ एहेलू महायाजक नाहा जो आमा कोमजोरी मध्ये दु:खी उवे नाहा पण तो आखे गोठीमे आपा होस पारखायू तेबी पण निष्पाप निघाल्यू.

¹⁶ त्यापोत आव आपु कृपेच्या सिहासनापो हीमत बांधीत साला का आपापो दया उवे अने ती कृपा जोडीत जी गरजो टायमोमें आमाहा मदत कोअनारू.