इब्रानि 3 - नोयरी नोवलू नियम

मूसा विश्वासयोग्य दास-मसीह विश्वासयोग्य सुउ

¹ याआ कोअता ऐ पवित्र पाही तुमु जे होर्गाआ हादिलामेहे भागी होय तियाआ प्रेरित अने महायाजक येशु पोओं ज्याहा आमू अंगीकार कोअतले होय द्यान कोआ.

² तो आपाआ नेमणूक कोअनारापो विश्वासनीय ओतु जेहलो मोशे पोन परमेश्वरोओ आखा कोअमे ओतु.

³ काहाके येशु मोशे पेक्षा एतु जाखू गौरवोअ योग्य होमाज्या गोल्यो होय जेतोहो का कोओहो बनीवणारा पेक्षा जाखो मान मेकोहो.

⁴ काहाके हर एक जोओ कोओहो कोडूबी बोनावनारु रोतो पोन जीआ आखे किबी बोन्यो तो परमेश्वर होय.

⁵ मोशे ताहा परमेश्वरोओ आखा कोअमे सेवको होस विश्वासनीय रोला का ज्या गोठीही वर्णन उवे ओते तियाआ साक्ष आपीली.

⁶ पोन ख्रिस्त पोऱ्याहोस परमेश्वरोओ कोओ अधिकारी होय अने तियाआ को आपु होये जर आपु हिमत ओयताहा अने आपाआ आशेच्या अभिमानापो शेवटपोरोत स्थिर रोल्या ताहा.

अविश्वासो प्रति चेतावनी

⁷ कोईत जेहलो पवित्र आत्माआ कोत्लू जर आज तुमु तिया शब्द होमलीनारू,

⁸ ताहा आपाआ मोन कडक कोहू नाहा जेहलो राग आपापोजे अने परीक्षेच्या दिहोम जंगलामेहे कोल्यु ओते.

⁹ जीही तुमाआ पेला बाबदादा माहु तोपासित परीक्षा कोअयी अने सालीह वर्ष पर्यंत माआ काम पाल्लये.

¹⁰ यामुळे आय तियाअ वेलाआ मांहाआरी क्रोधित रोयु अने कोयु याहा मोन फिरेहे रोनारे अने यांहि माआ मार्गा ओलखे नाहा.

¹¹ तेहलाम आय खत मेहे आविलो शपथ खादू तेए माआ आरामात प्रवेश कोहू सेकेहे नाहा.

¹² ऐ पाही, सावध रो, का तुमामे एहलो वाईट अने अविश्वासी मोन रोहू कायना जे तुमामे जीवतो परमेश्वरप रोत सेटे घेऊन जाइलो.

¹³ पोन ज्या दिहेजा आजेऐ दीही कोयू जात्लू हर एक दीही एक दिहीराहा होमजाडीत रोवा अने एहलो उवूंहू नाहा का तुमामेर्ये केते जोओ पापाआ छळात आविलो कडक ओत जानारू.

¹⁴ काहाके आमू ख्रिस्ताचे सहभागी उवे होय जर आमाहा पेल्लाठीच भरोसापो शेवटपोरोत मजबुते स्थिर रोल्या.

¹⁵ जेहलो कोयु जाहो जर आज तुमु तियाआ शब्द होमलीनारू ताहा आपाआ मोन कठोर कोहू नाहा जेहलो का राग आपलो टायमोमें कोल्यु ओते.

¹⁶ हाजो कोडला माहु होमलित सुद्धा चीढविले की तियाअ आखाहा नाहा काजे मोशेद्वारे मिसरमधून निकलीलू ओते?

¹⁷ अने तो सालीह वर्ष पर्यंत कोडला माहामे खोत रोला? की त्याकाजे नाहा जिये पाप कोल्यु अने तियाआ डीले जंगलूम पोडीतरोल्या?

¹⁸ अने तिये कोडाआरी शपथ निसे का तुमु माआ आरामात प्रवेश कोहू सेकेहे नाहा की फक्त तियाआ आरी आरीज नाहा जिये आज्ञा कोयु नाहा

¹⁹ कोईत आपु पालत्लू का ते अविश्वासोवाही प्रवेश कोहू सेकेले नाहा.