इब्रानि 2 - नोयरी नोवलू नियम

उद्धारोओ उपेक्षाआ विरुद्ध चेतावनी

¹ या कारन जोवे का आमू तो गोठीही पोओं जे आमू होमबली ही अने फाशो बी मोन लागाड़े एहलो ने होय का बोहकीत तियाआ रोत सेटे जाते रोय.

² काहाके जे वचन स्वर्गदूत कोयु ओते जाहा ते स्थिर रोल्या अने हर एक अपराध अने आज्ञा न मानणारा बराबर फोल जोडयेहे,

³ ताहा आपु एहलो वोडो तारणा पासून सेटे पालत्लु कोईत केहलो वासई शकतो? ज्याआ गोठी पेलाठीच प्रभूउ त्यापोरत उवी अने होमलिनारे त्यापोरत आमाहा तियाआ खात्री पटली.

⁴ अने आरी परमेश्वर पण आपाआ इच्छावाहि चिन्ह अदभूत काम अने अनेक प्रकारोओ पराक्रमाआ काम अने पवित्र आत्माआ वरदानोहो वाटीलो मेहे याआ साक्ष आपतु रोयु.

⁵ तिये तिया आवनाराआ जगाला ज्याआ गोठी आपु कोईत होय स्वर्गदूताआ होपित कोल्यु नाहा.

⁶ पोन कोडु का ए साक्ष आप्यी होय मांहु कोडू होय का तू तियाआ ओर कोअही? किंवा माअहा पोऱ्या कोडू होय का तू तियाआ चिंता कोअत्लू?

⁷ तू तियाहा स्वर्गदूताहून थोडोजे कोम कोल्यु; तो तियापो गौरव अने थोरवी याआ मुकुट मेकलू अने तियाहा आपाआ आथाआ का मापो अधिकार आप्यू.

⁸ तू आखे किबी त्या गुडा थुडी कोईत आप्लु त्यापोत जर तिये आखे तियाआ अधीन कोईत आप्लु ताहा तिये किबी राखीत मेकल्ये नाहा जे तियाआ अधीन नाहा पण आमाहा ओमे पर्यंत आखोज तियाआ अधीन पालीलो नाहा.

⁹ पोन आमू येशुहू जो स्वर्गदूताहून थोडोज कोम कोअयु ओतु मोईलो दु; ख उसलीलो कारन गौरव अने आदरो मुकुट पेअलु पालत्लू म्हणजे परमेश्वरोओ कृपेवाही तो हर एक मांहाकोअता मोईला चव साखित.

¹⁰ काहाके याकोअता आखे किबी होय अने ज्यावाही आखे किबी होय तियाहा ओच हाजो लागेहे का जास्तीज पोऱ्याहा गौरवात पोताळिहि ताहा तियाआ तारण कर्ताहा दु:ख उठलीताहा सिद्ध कोईलो.

¹¹ काहाके पवित्र कोअनारू अने जे पवित्र कोल्यु जातेहे आखे एकुच मुल मेहेरोत होय; या कारनोवाही तियाहा पाही कोयु ओ लाज नाहा.

¹² तो कोत्लू आयताआ नाव आमा पायहोहो कोनारू सभा माय आयताआ भजन गानारू.

¹³ अने फासाडी ओ तियापो आय विश्वास मेकही अने फासाडी ओ पाला आय तियाअ पोर्यआरी जाअलो परमेश्वराने माहु आप्लु.

¹⁴ याकोअता का जाहा पोऱ्ये माहा अने रोक्तारी सहभागी होय ताहा स्वतःपण तियाआ सारखू तिया सहभागी ओतगोयु म्हणजे मरणो द्वारा तियाहा मरणोपो शक्ती जोड़ी ओती म्हणजे शैतानोहो निकम्मा कोई देय,

¹⁵ अने जेवडे मोईला बिकसी आयुष्य मेहे गुलामा मेहे गुंतले ओते तियाहा सोडवीत ले.

¹⁶ काहाके तो ताहा स्वर्गदूतो नाहा ताहा अब्राहम वाडवडील सम्भात्लू.

¹⁷ यामुळे तियाहा जोवे ओते का आखे गोठी आपाआ पायहो होस बोनिलो जोवे याकोअता तो तियाअ गोठीमेहे जे परमेश्वरा बरोबर संबध मेकात्ले एक दयालु अने विश्वास महायाजक सेवक बोनिलो जोवे म्हणजे माहु पापो कोअता पश्चताप कोअनारू.

¹⁸ काहाके जाहा तिये परीक्षेच्या टायमोमें दु:ख सहन कोल्यु ताहा तो तियाआ पोन मदत कोहू शकतो ज्याआ परीक्षा उवनारा ओते.