इब्रानि 12 - नोयरी नोवलू नियम

धिरजोओ बुलाहट

¹ ऐ कारन जाहा का साक्षीई एहलो वोडो वादलो आमाहा घेरित मेक्लो होय, ताहा आवा हर एक रोकनारी वास्तु अने उलझाने वाले पापहा सेटे कोईत ती दौड़ जीयामेहे आमू दौवाड़ीलाआ होय धीरज से दौवडा.

² अने विश्वास निर्माण कोअनारू अने पुरो कोअनाऱ्या येशु जागे पालीत रोअलो जीआ तियाअ आनंद जो त्याआगाडी तोअलु ओतु, लाजीई किबी चिंता न कोईत क्रूसचा दुख सहन कोअयु अने सिहासन पोओ परमेश्वरोओ हुदिवोल जात बोहयुहू.

परमेश्वरो द्वारा ताड़ना

³ याकोअता तियापो लक्ष्य लागाडा जीआ आपाआ विरोधाम पापाआ ऐतू विरोध सहन कोईत लेदो का तुमु नाराज ओत धीरज सोडूहू नाहा.

⁴ तुमु पापीरी लोढाई कोअत्लू तेहलाम तियाआरी एहेलू प्रतिकार कोअयु नाहा का तुमाआ रक्त वोहयो ओय.

⁵ अने तुमु तिया उपदेश जो तुमामे पोऱ्याहोस आप्यू जात रोतो विहराइत गोये होय, ऐ माआ पोऱ्या, प्रभूउ शिक्षेला फवरुजे होमज्यू गोठी नाहा अने जांहा तापो दोष लागाड्यू जानारू तेहलाम धीरज सोडीत नाहा.

⁶ काहाके प्रभू ज्याहा प्रेम कोअत्लू तियाहा शिक्षाम पण आपित रोतो अने ज्याहा पुत्र बोणाडीत लेहो तियाहा फटके पोन मोतुलो.

⁷ तुमु दुखोह शिक्षाम होमजीत सहन कोईत ल्या; परमेश्वर तुमामे पोऱ्या होमजीत तुमाआरी एहेलू वागीलो तो कोडु पोऱ्या होय ज्याचा बाह्हू शिक्षाम कोईत नाहा?

⁸ जर ती शिक्षाम जीई सहभागी आखे ओये जर तुमाआ उवे नाहा ताहा तुमु तियाआ पोऱ्ये नाहा पण व्यभिचाराचे पोऱ्ये ठराविलो.

⁹ फासाडी जर आमाहा डीलो बाह्हू सुद्धा माहु शिक्षाम आपित रोलो अने आमाहा तियाआ मान मेकल्ये ताहा की आत्माआ बाह्हाआ फासी जाखो अधीन रोंहु नाहा ज्यावाही आमाहा जिवंत रोंहु जोवे.

¹⁰ ते ताहा आप आपाआ इच्छावाहि तियाहा योग्य लागे तेहलूज थोडो दिहोकाजे शिक्षाम आपित ओते पण तो ताहा आपाआ फायदा कोअता कोईत होय का आमाहा पण पवित्रता मध्ये भागी ओवुहु जुवे.

आत्मिक जीवनोंओ नवीनीकरण

¹¹ अने वर्तमान टायमोने आखे प्रकाराआ शिक्षाम आनंदाआ नाहा पण दुखाआ गोठी देखाहे होय; तेबी पण जे तियाहा सहन कोईत-कोईत मजबुते ओत गोये होय फासाडी तियाहा शांती आरी धर्माआ प्रतिफोल जोडे.

¹² याकोअता डिल्ला आथोहो अने कोमजूर घुटनाहा हुदा कोआ.

¹³ अने आपाआ गुडाकोता हीदू वाट बोनाडा यकोअता का लेंगळाआ भटकुहु नि जुवे पोन उलटो तो हाजू उवे.

¹⁴ आखा आरी मिलून मिलीलू रो अने तियाअ पवित्रतेला होदणारे व्हा याकोअता कोडूच प्रभूहु केहलो ए पालहू सेकेहे नाहा.

¹⁵ अने ध्यान लागाडीत पालीत रो, का कोडु परमेश्वरोओ कृपेणे रोत जानारू नाहा किंवा कोडु कडवी मुळ फुटीत त्रास आपुहू कायना अने तियाआ त्यापोरत केते मांहे अशुद्ध ओवुहू कायना.

¹⁶ एहलो नाहा उवूंहू जोवे का कोडु व्याभिचारी किंवा एसावो सार्खू अधर्मी होय जीआ होमला वेलाआ रोटा कोईते आपाआ ज्येष्ठ पनाओ जागा वेसेत टाक्ये.

¹⁷ तुमामे मालुम होय का फासाडी तिये आशीर्वाद मीडवीहे प्रयत्न कोअयु ताहा अयोग्यो गणला गोल्यो अने आहवे पोडीत होदिलापो पण तियाहा पश्चातापाची संधी जोड़ी नाहा.

¹⁸ तुमु ताहा तियाअ डोगा आरी ज्याहा स्पर्श कोहू शकत ओते अने आगीवाही पेटाडीलोहो ओतु अने जास्तीज काली, निबिड आंदारो अने वादोल,

¹⁹ अने नरसिंगाआ आवाज अने गोगणारा जागे एहलो शब्द आव्ये नाहा ज्याआ होमलिनारे विनंती कोअयी का ओमे आमा आरी गोठी कोअयी जाऊ कायना.

²⁰ काहाके ते तिया आज्ञाहा सहन कोहू सेकेले नाहा जर सिडे पोन तिया डोगोहो स्पर्श कोअनारू ताहा तियापो पथराव कोअलाआ आवे.

²¹ अने ते दर्शन एहलो जाहके ओते का मोशेई कोयु, “आय जास्तीज बिहोहो अने कापीत होय”

²² पोन तुमु सियोनाहा डोगो आरी अने जिवंत परमेश्वरोओ नागरामेरोत होर्गाआ यरुशलेमा जवळ अने लाख स्वर्गदूत,

²³ अने तिया पेल्लू उब्जीलेले साधारण मिटीग अने मंडली ज्याआ नाव होर्गाम लेखिलो होय अने आखाआ न्याय कोअनारा पर्मेश्वरारी अने पुरो कोईलो धार्मिकांची आत्मा,

²⁴ अने नवो करारांचा मायतोमे येशु अने सिपडिलो रोगोते आरी आव्ये होय जो हाबेलाच्या रक्तादेखू श्रेष्ठ गोठी कोत्लू.

²⁵ सावध रो, अने तियाअ कोनारापो रोत आपाआ सोब फेरवूहू नाहा काहाके ते मांहे जांहा धरतीपअ सुचना आपनाऱ्या सुब देखुहू आपाआ सोब फेरवित वासई सेकेले नाहा ताहा आमाहा होर्गामरोत सुचना आपनाराप रोत आपाआ सोब फेरवित केहलो वासई?

²⁶ त्या टायमोहो ताहा तियाआ शब्दावाही जुगे आलाडीत आप्लु पण ओमे तिये ओ प्रतिज्ञा आप्लु होय, “एकवा फासी आय फक्त धोरतीलाच नाहा ताहा झोडे पण आलाडीत आपी”

²⁷ अने ओ वाक्य एकवा फासी आव गोठीकोता उघड कोईत होय का जी वस्तु आलाळीत जाहो ती बोनाविलो वस्तु होयकोत ती नाश ओत जानारू; म्हणजे ज्या वस्तु आलविल्या जात नाहा तियाअ वस्तु टीकित रोत्ले.

²⁸ यामुळे आमाहा आव राजाहा मिलवीत जे हालनारो नाहा उपकाराआ मानु आदरा कोईत अने बिखीकी परमेश्वरोओ एहली उपासना कोअनारू तीयीपो रोत तो खुश ओतू,

²⁹ काहाके आमाआ परमेश्वर नाश कोअनारू आग होय.