इब्रानि 11 - नोयरी नोवलू नियम

विश्वासों नायक

¹ ओमे विश्वास आशाआ उवली वास्तुउ निश्चय अने अनदेखी वस्तुहु प्रमाण होय.

² काहाके यामे विषयाम पूर्वजांहि हाजो साक्ष आप्यी होय.

³ विश्वासा सी आमाहा होमजीत जात्लू का आखे जगाओ स्थापना परमेश्वरोओ वचनाने उवी होय पण ओ नाहा काजे किबी पालीलो येत ते पालल्या बिडारापो रोत बोणावले होय.

⁴ विश्वासोमेहे हाबेलाने कैन पेक्षा श्रेष्ठ बलिदान परमेश्वरा कोअता चोढावीत अने तिया द्वारा तियाआ धोर्मी ओनारो साक्ष पण आप्यी गोयी, काहाके परमेश्वराने तियाआ अर्पणा विषयात साक्ष आप्यी; अने तियाआ मुळे तो मरनोपो तेबी ओमेजा गोगीत होय.

⁵ विश्वासोमेहे हानोक विशिलो गोल्यो का मोईलाकाजे पाल्हू कायना अने तो जोड्यू नाहा काहाके परमेश्वराने तियाहा विसित लेधलो ओते अने तियाआ विसित जाअला आगाडी त्याविषयी ए साक्ष आप्यी ओती का तिये परमेश्वरोओ खुश कोल्यु होय.

⁶ अने विश्वास बिना तियाहा खुश कोअला अनहोना होय काहाके पर्मेश्वरारी आवणाराहा विश्वास कोअला जोवे का तो होय अने तियाहा होदणाराहा तो प्रतिफोल आपत्लु.

⁷ विश्वासोमेहे नोहाने तिया गूठीई विषयी जी तियाआ टायमोमें देखाहे नाहाओती, सुचला जोडल्यापो भक्तीमेहे आपाआ घरानाहा वासाडूहू जहाज बोनाडल्ये अने तियाआ मुळे जगाला दोषी ठेरव्यो अने तियाअ नितीमत्वाचा वारस ओवयू जो विश्वासा ओतू.

⁸ विश्वासा सी आब्राहम जांहा हादल्यो गोल्यो तेहलाम एहलो जागापो निहित गोल्यो जीही वारसात लेही ओतु अने ओ मालुम निमिले का आय कोठे जात होय तेबी पण निहित गोल्यो.

⁹ विश्वासा तिये वचन आपल्या तियाहा दिहरा देशोओ मांहाहोस रोत इसहाक अने याकोब आरी जे त्याआरी तियाआ प्रतिज्ञा वारीस ओती सहभागी ओते मंडपा मेहे रोये.

¹⁰ काहाके तो तिया स्थिर पायु ओतल्या नगराआ वाट जुवित ओतु, ज्याआ योजना कोअनारू अने बांधनारु परमेश्वर होय.

¹¹ विश्वासोमेहे साराने पण स्वतः डाई ओयताहा पण गर्भधारनाची शक्ती मेलवी काहाके तीही प्रतिज्ञा आपणाराहा खोरो होमाज्या ओतु.

¹² यामुळे होमला एकासी जो मोअला होस ओतु, आकाश चांदणे समुद्र तटो रेअका होस, अनगिनित वंश उत्पन्न ओवल्यु.

¹³ ओ आखे विश्वासाच्याच दशेत मोअये; अने तिये वचन आपल्या वस्तु मेलविल्यो नाहा पोन तिये सेटेरोत पाल्या अने खुश उवे अने मानीत लेधलो का आमाहा धोरतीपो दिहरा देशोओ अने बाहरी होय.

¹⁴ जे एहलो गोठी कोअता ते उघड कोअता का आमाहा आपाआ स्वतःआ देशाआ होदित होय.

¹⁵ अने ज्या देशोमेरोत ते निहित आव्ये ओते जर तियाआ राखावली कोअयी ओते ताहा तियाहा फासी फिरीत जाआला संधी ओती.

¹⁶ पोन ते एक उत्तम कोअतीज होर्गाआ देशोओ इच्छुक होय त्यापोत परमेश्वर तियाआ परमेश्वर सांगण्यात लाजवात्लो नाहा काहाके तिये त्याकोअता एक नगर तीयार कोल्यु होय.

¹⁷ विश्वासा सी अब्राहम परीक्षेच्या टायमोमें इसहाकला अर्पण कोल्यु; अने जिये प्रतिज्ञाहा खोरो मान्यु ओते

¹⁸ अने ज्याहा ओ कोयु गोये ओते इसहाक पासून ताआ वंश कोयु जाइअलो तोज आपाआ एखोलोज अर्पण कोहू लाग्यू.

¹⁹ काहाके तिये माजित लेधलो का परमेश्वर सामर्थी होय का तियाहा मोईलामरोत जिवंत कोअनारू; आखरी तिआमेरीते उदाहरण स्वरूप फासी मिल्यू.

²⁰ विश्वासोमेहे इसहाकाने याकोब अने एसावला आवनाराआ गोठी विषयी आशीर्वाद आप्यू.

²¹ विश्वासोमेहे याकोबाआ मोईला टायमोमें योसेफाच्या बेनु पोऱ्याहा होमला एकाहा आशीर्वाद आप्यू अने आपाआ ढेंगारेइ टोकोहपे मदत कोतु घेऊन देवोहो नमन कोल्यु.

²² विश्वासोमेहे योसेफाने जांहा तो देही ओतु इस्राएलोओ वाड्यो निहित जाआला गोठी कोअयी अने हाड़ो विषयाम आज्ञा कोअयी.

²³ विश्वासोमेहे मोशेए याह्ही बाह्हू तियाहा जोल्मो उवलानंतर तीन मोयनु पर्यंत निकाडीत मेकल्ये काहाके तिये पाल्लये का पोऱ्यो हाजी होय अने राजाहा आज्ञा सी ते बिही नाहा.

²⁴ विश्वासोमेहे मोशेई हुशार ओत फारो पोरीही पुत्र उविला नकार कोअयु.

²⁵ यामुळे का पापाहाम थोडो दिहोम रोहोलोकाजे परमेश्वरोओ मांहाआरी दुख सहन कोअला जाखा हाजो वाटेम.

²⁶ तिये ख्रिस्तामुळे निंदा सहन कोअला मिसराच्या भांडाराम रोत वोडो धन होमज्ये काहाके तियाआ नजर फोल जोडलेलोज लागाडीत ओते.

²⁷ विश्वासा सी राजाआ क्रोध सी बिही नाहा तोओ मिसरला सोडी देदु न देखानारो पालीत-पालीत मजबुते रोला.

²⁸ विश्वासोमेहे तिये वल्हांडण अने रक्त शिंपडण्याची विधी मान्य कोअयी का पेल्लू जन्म लेदलों नाश कोअनारू एस्राएलपो आथे टाकुहू कायना.

²⁹ विश्वासोमेहे ते लाल समुद्राआ तिवोल एहलो उतरित गोये जेहलो कोओळा धरतिपो रोत उतरित जातेहे; अने जांहा मिस्री माहु तेहलूज कोअला पालील्यो तेहलाम आखे बुडीत मोईत गोये.

³⁰ विश्वासोसी यरीहाचा भितडो जांहा ते सात दीही त्यापरोत फेऱ्या मार्ये ताहा तो भितडो पोडी गोयो.

³¹ विश्वासोमेहे राहाब वेश्या आज्ञा न मांननाऱ्या आरिजे नाश उवी नाहा यकोअता का हेराना तू शांतीई कोल्यु ओते.

³² ओमे ईजि की कोहू? काहाके वेल रोला नाहा का गीद्योनाचे अने बारख लेताविलो शोमसनाआ अने इफताह अने दाविद अने शमुवेल अने भविष्यवक्तांचे वर्णन कोहू.

³³ यांहि विश्वासोमेहे राज्य जीक्यू; नीतीचे काम कोल्यु; वचन आपल्या वस्तु मेलविल्यो; सिहआ सोब बंद कोल्यु,

³⁴ आगीई भोडकील्यो हेलो कोल्यु; तलवारीई तारकी वासित निकलीलू; लुलोहो शक्तीवान उवे; भांडण पराक्रमी निकलीलू; दिहरा देशाआ सैन्यांना माईत पाडी देदलो.

³⁵ बुईही आपाआ मोल्याहा फासी जिवंत पालील्यो; किति तर मार खाय-खाय मोई गोये; अने छुटकारु न स्वीकारली यामुळे का श्रेष्ठ पुनरुस्थानाचे सहभागी उवे.

³⁶ कोडु ताहा चेष्टा अने फटके खाअलोअ बानदल्यो जालु, जेलूम जाआत्लू ओलखे गोये.

³⁷ पथराव कोल्यु गोये; करवतसी चिरी देदलू गोये; तियाआ परीक्षा कोअयी गोयी तलवारी कोईत माअये गोये ते गोरीबे अने दुख सहन कोअत्लू तेहलाम मेंढाआ अने बुकड़ाआ सांबळो फंगीत ईहिरोत तीही फिऱ्ये;

³⁸ अने जगलूम अने डोगोम दोरोमेहे अने धरतीई दोरा मेह फिरेहे फिऱ्ये जग तियाआ योग्य ने ओतू.

³⁹ विश्वासा मुळेच आव आखा आरिजे हाजी साक्ष आप्यी गोयी तेबी पण तियाहा वचन आपल्या वस्तु जोड्या नाहा.

⁴⁰ काहाके परमेश्वराने आमा कोअता पेलेरोत एक उत्तम गोठी ठरविलो का ते आमापोरोत पूर्णते पर्यंत पुग्या नाहा.