इब्रानि 10 - नोयरी नोवलू नियम

पशुउ बलिदान अपर्याप्त

¹ काहाके व्यवस्था ज्यामें ओ ओवनारी होय हाजी वास्तुउ प्रतिबिम्ब होय पोन तियाआ खोरो स्वरूप नाहा याआ कोअता ती एकुज सावा बलिदानोंओ द्वारा जो हर साल अचूक सोडविले जातले, आहने आवनाराहा कदापि सिद्ध नाहा कोइत सेकती.

² नाहा ताहा तियाआ चोडविलो काहा बंद उवनारा नाहा? त्यापोत उपासना कोअनारे एकुजवा शुध्द ओत जातेहे ताहा तियाआ बुद्धी तियाहा पापी ठरावीत नाहा.

³ पोन तियाआ त्यापोरत ताहा दर वोरहे पापोओ ओर उवनारा ओते.

⁴ काहाके एहे नि ओत सेके का बोयलो अने बोकडाआ रक्त पाप सेटे कोईत सेके.

मसीह बलिदान पर्याप्त

⁵ यामुळे तो मसीही जगात आविलावेले कोयु, बलिदान अने अर्पणाचे तू इच्छा कोल्यु नाहा पण माकोअता एक डीले तीयार कोल्यु.

⁶ होमबलि अने पापार्पणाने तू प्रसन्न ओवयू नाहा

⁷ तेहलाम आय कोयु, पाला आय आविलो गोल्यो होय पवित्र शास्त्रात माविषयी लेखाल्या होय कोअतीज ओ परमेश्वरा ताआ इच्छा पुरो कोओ.

⁸ उसे ताहा कोयु होय तू बलिदान अने अर्पण अने होमबलि अने पाप शक्ती तू इच्छा कोअयी नाहा तू त्यावाईही खुश ओवयू, म्हणजे ओ बलिदान ताहा व्यवस्थेनुसार चोढावीत जातेहे.

⁹ फासी ओ पण कोत्लू पाला आय आवित लाग्युहु म्हणजे ताआ इच्छा पुरो कोहू आखरी तो पहिल्याला उठवीत आपोहो म्हणजे दिहीराहा नियुक्त कोअनारू.

¹⁰ तियाआ इच्छावाहि आमू येशु ख्रिस्ताच्या डीलोओ एकुजवा बलिदान सोडविलोओ सी पवित्र कोल्यु गोये होय.

¹¹ हर एक याजक ताहा उबुरोत दाडीई सेवा कोअता अने एकाच प्रकारोओ बलिदान होये जे पाप केधीज सेटे कोईत नाहा फासी-फासी चढविल.

¹² पण ओ मसीही ताहा पापाआ बोदलाम एकुज वाआ बलिदान कायमो कोअता सोडवित परमेश्वरोओ हुदा आथो वोल जात बोहयु.

¹³ अने तिया टायमोआ त्यापोरोत तियाआ वात पालीलो होय का तियाआ दुश्मन तियाआ गुडानिसे पिढी उवूंहू जोवे.

¹⁴ काहाके तोओ एकुच बलिदान तियाहा जे पवित्र कोल्यु जातेहे कायमो कोअता सिद्ध कोई देदु.

¹⁵ अने पवित्र आत्माआ पण आमाहा एज साक्ष आपित होय काहाके तिये पेल कोयु ओतु.

¹⁶ प्रभू कोयु होय का जो करार आय तियाअ दिहो नंतर तियाआ आरी बानदेहे तोओ होय का आय आपाआ नियम तियाआ मोनापोओ लेखनारो अने आय तियाआ बुद्धी बुद्धीमेहे टाकही.

¹⁷ फासी ओतो कोयु होय आय तियाआ पापोहो अने तियाआ अधर्माआ कामोहो फासी ओर कोअनारू नाहा.

¹⁸ जाहा याहा क्षमा ओत गोयी होय ताहा फासाडी पापाहा बलिदान रोला नाहा.

साहसोरी परमेश्वरो जागे जाआ

¹⁹ यामुळे ऐ पाही, जांहा आमाहा येशुउ रक्तवाही तिया नव्यो अने जिवंत मार्गा पासून पवित्र स्थानात प्रवेश कोईत हिमंत जोडयेहे होय,

²⁰ जो तिये पडदू कोअतीज आपाआ डिला मेहे आमा कोअता आशीर्वाद कोल्यु होय,

²¹ अने यामुळे का आमाआ एहेलू वोडू प्रमुख याजक होय जो परमेश्वरोओ कोओओ अधिकारी होय.

²² ताहा आव आपु खोरो मोनाकोईत अने पुरो विश्वासा अने विवेकाचा दोष सेटे कोइला कोअता मोनापोओ छिड़काव रोयाहा कोईत अने डीला शुद्ध पअयोंवाही तोवीत मागित परमेश्वरोओ जागे जायलो.

²³ अने आपु आपाआ आशेच्या तोअले मजबुते तोईत रोअलो काहाके जीआ प्रतिज्ञा आप्लु होय तो खोरो विश्वासयोग्य होय.

²⁴ अने प्रेम अने हाजा कामोम उत्सुक कोअला एक दिहराआ चिंता कोईत रो,

²⁵ अने एक दिहराआरी एकठे उवे सोडीत नाहा जेहलो केताहा रिती होय एक दिहीराहा होमजाडीत रो; अने जेहलो-जेहलो तियाअ दिह्याहा जागे आविलावेले पाल्हा तेहलूज-तेहलूज फासी जाखो ओ कोईत रो.

²⁶ काहाके सत्य ओळखत जोडल्यो तिया फासाडी जर आमाहा जान जुवित पाप कोईत रोल्या ताहा पापो कोअता फासी कोडलो बलिदान उरलो नाहा.

²⁷ ओ दंड एक भिवाडनारू वात पालीत रोअला अने अग्नीचे भडक बाकी होय जी विरोधो नाश कोईत टाकही.

²⁸ तेहलाम मोशेए व्यवस्थेला न कोनारो बेन किंवा तीन व्यक्तीई साक्षीवाइहि दया न कोअता माईत टाक्यू जात्लू,

²⁹ ताहा विचार कोईत तो केतो फासी शिक्षेस पात्र ठरेल जीआ परमेश्वरोओ पोऱ्याहा गुडावाही तुडव्या अने कराराच्या रक्ताआ ज्यावाही तो पवित्र ठरवील्यु ओतु अपवित्र होमाज्या होय अने कृपेच्या आत्माआ अपमान कोअयु होय.

³⁰ काहाके आमू ज्याहा ओलखीत्लू जीआ कोयु, बदलू घेणे माआ काम होय आयुज बदलू आपी अने फासी ओ का प्रभू तियाआ मांहोओ न्याय कोए.

³¹ जिवंत परमेश्वरोओ आथोमेहे पोडलोओ भयानक घुठ होय.

³² पोन तिया फासाडीई दिहोहो ओर को ज्याआ माय तुमु प्रकाश मिलवीत वोडो संघर्षा मध्ये स्थिर रोल्या.

³³ कोयो-कोयो ताहा ओ का तुमु निंदा अने दुख सहन कोला कोअता तमाशा बोन्यो अने कोयो ओ का तुमु तियाआ सहभागी ज्याआ दूर्दशा कोअयी जात ओती.

³⁴ कोईत तुमु बंदिवानाच्या दुखो मेहे पण दुखी उवे अने आपाआ धनदौलत आनंदावाही साडाळल्यो आप्यी ओ जाईत का तुमापोओ एक फासी पण उत्तम अने आखे काळा रोणारी धनदौलत होय.

³⁵ त्यापोत तुमाआ धीरज सोडीत नाहा काहाके तिया प्रतीफळ वोडू होय

³⁶ काहाके तुमामे धीरज तोअतलू जरुरी होय म्हणजे परमेश्वरोओ इच्छाहा पुरो कोईत तुमु वायदाचे फोल मिलीजावू.

³⁷ काहाके ओमे जास्तीज कोम वेल रोत गोल्यो होय जांहा आवनारू आवे अने वाआ नि लागाड़े.

³⁸ पोन माआ धोर्मी जोओ विश्वासा जिवंत रोनारू जर तो फासाडी ओत जानारू ताहा माआ मोन तियापो खुश उवे नाहा.

³⁹ पोन आमू फासाडी फिरित जानारे नाहा का नाश ओत जाजे, पण विश्वास कोअनारे होय का आपाआ जीवोहो वासाडा.