गलाती 4 - नोयरी नोवलू नियम

मसीह मेहे परमेश्वरोओ स्वतंत्र सुउ

¹ आय ओ कोहो का वारिस जाहा जाआ पोरयो होय ताहा जाआ आखी वास्तु तो मालक होय तेबी तियामेहे अने दासो मेहे कीबी भेद नाहा.

² पोन बाह्हाआ ठर्विलो टायमो पोअजा तियाहा किबी कारभारी अने मास्तराआ होपित रोलो ओते.

³ तेहलूज आमाहा पण जांहा पोऱ्यो ओते तेहलाम जगामेरया पालील्यो सिकाइलोकोता होपित ओतगोयु दास बोन्यो ओते.

⁴ पोन जाहा काळा पुरो ओवयू तियाअ परमेश्वराने आपाआ पोऱ्याहा मोक्ल्यीत जो बुई त्यापोरोत जन्मूला अने नियमशास्त्राआ होपित उत्पन्न ओवयू,

⁵ म्हणजे नियमशास्त्राआ होपित होय तियाहा वेसातो घेऊन वासाडीत अने आमाहा वारस उविला हक्क मिळूहुजोवे ओ उद्देश ओतु.

⁶ अने तुमु जे पुत्र होय त्यापोत परमेश्वराने पोऱ्याआ आत्माहा जोओ ओबा, अने ओ ओबा एहलो कोत आवाज देत्लू.

⁷ त्यापोत तू ओमे सेवक नाहा पण पोऱ्या होय अने जांहा पोऱ्या ओवयू ताहा परमेश्वरोओ त्यापोरत वारस पण ओवयू.

कलीसिया कोअता पौलुस चिंता

⁸ पहीले तुमामे परमेश्वरोओ ओळखत नाहाओती कोईत तुमु तियाआ दास ओते जो स्वभावो वाही ईश्वर नाहा,

⁹ पोन ओमे ज्या परमेश्वरोओ ओलखीत लेधलो होय एवडोज नाहा ताहा परमेश्वराने पण तुमामे ओलखीत लेधलो ताहा तियाअ निर्बल अने बेन कामोओ पाल्या शिक्षाआ गोठीरी काहा फिरीवलो जीई तुमु फासी दास बोनहू इच्छितात?

¹⁰ तुमु दिह्याहा, मोहिनाहा, नेमल्या मेहे टामो अने वोरोहो मानतेहे.

¹¹ आय तुमाआ विषयाम बित्लू का एहलो उवूंहू नाहा का जी मेहनतो आय तुमा कोअता कोअयी होय ती व्यर्थ ठराविलो.

¹² ऐ पाही आय तुमामे विनंती कोअत्लू का तुमु माआ सारखो बन्यो; काहाके आय पण तुमा होस ओत गोल्यो होय; तुमु माआ किबी बिघडावीत्लो नाहा

¹³ पोन तुमामे मालुम होय का पहिलुच आयुज डीलोओ निर्बल त्यावाईहि तुमामे सुवार्ता आप्यी.

¹⁴ अने तुमु माआ शारीरिक स्थितीला जी तुमाआ परीक्षाए काहाके ठर्विल्यो तुमु तुच्छ होमज्ये नाहा; अने धिक्कार पण कोअयु नाहा अने परमेश्वरोओ नाहा ताहा स्वर्गदूत स्वतः येशु ख्रिस्तासारखे माहु ग्रहण कोल्यु.

¹⁵ ताहा तो तुमाआ आनंद कोअला का गोये? आय तुमाआ साक्ष होय का शक्य उवे ओते ताहा तुमाआ डोउ पण माहु काढीत आप्यू ओतलू.

¹⁶ ताहा की खोरो कोल्यावाही आय तुमाआ दुश्मन होय के?

¹⁷ ते तुमामे हेगांति बनाडूहु मागतले खोरो पण हाजा उद्देशाने नाहा पण तुमामे अलग कोइला कोअता ओ कोईत होय का तुमु तियाहा हेगांति बोणाडीत ल्या.

¹⁸ पोन ओओबी हाजो होय का हाजा गोठीमेहे सदा हरेक टेमे हेगांति बनविलो प्रयत्न कोअला जोवे नाहा ताहा जांहा आय तुमाआरी रोतलू तोयोज कोअनारू.

¹⁹ ऐ माआ पोऱ्या जोपोरोत तुमामे ख्रिस्ताचे रूप बोनावोओ नाहा तोपोरोत आय तुमा कोअता फासी प्रसुती वेदना होसे तारास खेटेहे.

²⁰ इच्छा ताहा एहली ओते का ओमे तुमापोओ आविलो दिहराआ प्रकाराने गोगू काहाके तुमा बारामे आय उलझन पडिलो होय.

बेन वाचा-सारा अने हाजिरा

²¹ तुमु जे नियमशास्त्राआ होपित ओवुहू इच्छितात ताहा माहु कोआ की तुमु नीयमशास्त्राचे होमलित नाहा?

²² ओ लेखिलो होय का अब्राहम सी बेन पोऱ्ये उवे; एक दासी त्यापोरोत अने दिहरु स्वतंत्र बुई त्यापोरोत.

²³ पोन जो दासिही देखू ओवयू तो डीलो रीतीवाही जन्मला होय अने जो हाजो बुई त्यापोरोत जन्मूला तो प्रतिज्ञा प्रमाने.

²⁴ आव गोठी माय दाखलू होय आव बोई म्हणजे बेन करार होय एक ताहा सीनै डोगों जीही सेवक उत्पन्न ओये अने ती हागार होय.

²⁵ अने हागार जेहेकाय अरबाची सीनै डोगो होय अने आधुनिक यरुशालेमा सारखी होय काहाके ती आपाआ पोर्यआरी दासत्व मेहे होय.

²⁶ पण उसेरोत यरुशलेम हाजो होय अने ती आमाआं याह्ही होय.

²⁷ काहाके खिलो होय पोऱ्ये उवनारा कायनाहां बाय आनंद को, “ज्या ताहु प्रसूती तारास उवनारा नाहा, एखटो खलिते जयजय को, काहाके टाकीत देदिलो पोऱ्ये माटी ओतल्या बोहीही पोऱ्यापोरोत खूप होय”

²⁸ ऐ पाही, आमाहा इसहाक सारखे प्रतिज्ञा पोऱ्ये होय.

²⁹ अने जेहलो त्या टायमोहो शरीरा प्रमाणे जन्म उवलू आत्मा परत जन्म लेदलों छळ कोईत ओते तेहलूज ओमे पण उवनारा होय.

³⁰ पोन पवित्रशास्त्र काहा कोयु होय? दासी अने तिया पोऱ्याहा काढीत आप काहाके दासीचा पोऱ्या हाजो बुई च्या पोऱ्या आरी वारस उवे नाहा.

³¹ ताहा पाही, आपु दासीइ पोऱ्ये नाहा ताहा स्वतंत्र बुई तियाआ पोऱ्ये होये.