इफिसी 6 - नोयरी नोवलू नियम

याह्ही बाह्हू अने सोऐ

¹ ऐ पोर्या, प्रभु मेहे आपाआ याह्ही बाह्हाआ होमलनारा बोना काहाके ओ उचित होय.

² आपाआ याह्ही बाह्हाआ मान कोओ ए पेल्ली आज्ञा होय ज्याआरी प्रतिज्ञा बी होय

³ का ताआ हाजो उवे, अने तू धोरतीपो जाअखो दीही जिवंत रोही.

⁴ का बाह्हू, आपाआ पोऱ्याहा चिडवू नाहा परंतु प्रभूऊ शिक्षण अने बोध आपित ओतुताहा तियाप पालीत पोषण को.

स्वामी अने दास

⁵ ऐ दासाहा, जे मांहे या जगुमे तुमाआ मालक होय, आपाआ मोनोमेहे भावना बिक माना अने कापीत-कापीत जेहलो ख्रिस्ताआ आज्ञा पाडीलोओ तेहलूज त्याआं पण आज्ञा पालीत जा.

⁶ माहुहुं प्रसन्न कोअनाराआ सारखो ऐ देखाडीला कोता सेवा कोहू नाहा पोन ख्रिस्ताच्या दासोओ एकहरको मोनाकोईत परमेश्वरोओ इच्चेप चाल्यो,

⁷ अने तिया सेवाहा माहांआ नाहा पोन प्रभूऊ होमजीत खोरो मोन लागाडीत को.

⁸ काहाके तुमु ओलखीत जो कोडु जेहलो हाजो काम कोअनारा दास होय का हाजो प्रभूकडून तेहलूज जोडीत.

⁹ ऐ स्वामि, तुमु पण धमकी देअलो सोडीत तियाआ आरी तेहलूज वागा काहाके का तुमु ए मानतेहे का तियाआ अने तुमाआ बेनुबी मालक होर्गाम होय, अने तो कोडाआ पक्षपात नि कोअनारू.

आत्मिक युद्धोंओ हत्यार

¹⁰ याकोअता प्रभू माय अने तियाआ शक्ती प्रभावही बलवान बोना.

¹¹ परमेश्वरोओ आखे हत्यार स्वतःहा बांधीत ल्या का तुमु शैतानाहा युकत्यां समोर उभे रोहू सेकेहे.

¹² काहाके का आमाहा ओ युद्ध रक्त मासा आरी नाहा ताहा अधिपती अने अन्धकार अने या संसारो अंधकाराया पुढारी अने जुगोमेरयो भूत आत्मारी.

¹³ याकोअता परमेश्वरोओ आखे हत्यार बांधीत ल्या के तुमु खराब दिहोम सामना कोईत सेकाहा आखो पुरो कोईत स्थिर रोत सेकाहा.

¹⁴ याकोअता सत्यांआ अने कंबर बंधित अने धोर्मी तियाआ झीलम कालीत,

¹⁵ अने गुडा मेहे मेलोओ सुवार्ताआ तीयार बूट कालीत,

¹⁶ अने तिया आखा आरी विश्वासाआ ढाल लेत स्थिर रो ज्याम तुमु तिया वाईटा आखा पेटात्ला बिलखाहा उलवित सेकाहा.

¹⁷ अने उद्धाराआ टोप अने आत्माआ तलवार जे परमेश्वरोओ वचन होय लेतल्या.

¹⁸ हर एक वेले हर एक एहलाम आत्मा मेहे प्रार्थना अने विनंती कोईत रो अने याकोअता जागतू रो का आखे पवित्र मांहो कोअता निरंतर विनंती कोईत रो,

¹⁹ अने माकोअता बी का तू माहु गोगीलावेले एहलो प्रबळ वचन आप्लु जावा का तुमामे हिमंत आरी सुसमाचारो भेद कोहू गोयो

²⁰ याकोअता आय हाकूलवाही बांदित मेल्यु होय, अने ओओबी का आय तियाआ विषयामे जेहलो माहु बी, हीमतवाही गोगनारू.

आखरी नमस्कार

²¹ तुखिक जो प्रिय पाही अने प्रभूमे विश्वासयोग्य सेवक होय तुमामे आखे गोठी कोअही का तुमु पण माआ परिस्थिती जाहा का आय केहलु रोतलू.

²² तियाहा आय तुमापोओ याकोअता मोक्ल्यीत होय का तुमु आमाआं परिस्थिती ओलखा अने तो तुमाआ मोनोहो शांती आपही.

²³ परमेश्वर बाह्हू अने प्रभू येशु ख्रिस्त वोगेरोथ न पायहोहो शांती अने विश्वासाआ आरी प्रेम जोळे.

²⁴ जो परमेश्वर प्रभू येशु ख्रिस्तात खोरो प्रेम कोअत्लू तीन आखापो कृपा उवनारा राहो.