इफिसी 5 - नोयरी नोवलू नियम

प्रेम मेहे साला

¹ याआ कोअता प्रिय पोर्याआ हारके परमेश्वरा अनुकरण कोआ,

² अने प्रेमाम साला जेहलो ख्रिस्ताने बी तुमापो प्रेम कोल्यु, अने आमा कोअता आपाआ स्वतःहा दुखदारात हाजाकोअता परमेश्वरा आगाडीही भेट आपित बलिदान कोईत आप्लु.

³ जेहलो पवित्र महुअ योग्य होय, तेहलूज तुमामे जारकर्म अने कोडनीबि प्रकारोओ अशुध्द काम किंवा लोभाश्या चर्चा बी उवूंहू नाहा,

⁴ अने नाहा निर्लज्जता, नाहा मूढ़ता गोठी कोअल्यो, नाहा रिकामी कोअयी; काहाके का याआ गोठी होबा आपित नाहा, नहाते धन्यवादच होमल्यु जाइअलो.

⁵ काहाके काआ तुमु जाआत्ले कोडु जारकर्मी किंवा अशुध्द जोओ, किंवा लोभी माहांआ, जे मूर्ती पुजिलो आरी होय ख्रिस्त अने परमेश्वरोओ राज्यामेहे वारसा नाहा.

⁶ कोडु तुमामे व्यर्थ गोठीही धोका आपुहू कायना को इयाच कामाआ कारनोवाही परमेश्वरोओ राग आज्ञा न पाडणारापो खाकार होय

⁷ याकोअता तुमु तियाआ सहभागी ओवुहू नाहा.

ज्योति मेहे साला

⁸ काहाके का तुमु ताहा पहीले आंदाराम ओते परंतु ओमे प्रभू माय प्रकाश असो शेवट उजवाडामे संतानाआ एकहरको साला

⁹ काहाके का उजवाडामे फोल आखे प्रकारोओ हाजो, अने धार्मिकता अने खोरो होय,

¹⁰ अने ओ पारखिल्यु का प्रभूहु की गोमतो.

¹¹ आधाराआ निष्फळ कामोमे सहभागी न ओवो नहाते तियापो प्रतिकार को.

¹² काहाके का गुप्त का माहा चर्चा बी लाज गोठी होय.

¹³ पोन जेतेहे का मापो प्रतिकार आप्यू जात्लू, ते आखे उजवोडावाही प्रकट ओये काहाके का जो आखे कोडोबी प्रकट कोअत्लू, तो प्रकाश होय.

¹⁴ आव कारनोवाही तो कोत्लू, “ऐ, हुवानारा जागू अने मोल्यामेहे रोते जिवंतु व्हा, म्हणजे ख्रिस्ताआ प्रकाश तापो चमकीनारा.”

बुद्धि मेहे साला

¹⁵ याकोता लक्ष्य आपित देखू का केहली चाल सालतेहे अज्ञाना समान एकहरको नाहा पण बुद्धीमानापो रोते एकहरको चाल्यो.

¹⁶ टाईमोहो मोल्यावान सोमजा काहाके दीही वाईट होय.

¹⁷ आव कारनोवाही निर्बुद्धी न होय पोन लक्ष्य आपित समजीलो का प्रभूऊ इच्छा नाहाकोत होय

¹⁸ द्राक्षरसावाही मस्त ओवा नाहा काहाके वांही ठग पण ओतू पोन आत्माआ पुरोओत उवनारा जा,

¹⁹ अने आपसामेहे रोटू अने स्तुतिगीत अने आत्मिक गीत गावित जा अने आपाआ मोनुमे प्रभूउ आगाडी गावित अने किर्तन कोईत रो.

²⁰ अने सदा आखे गोठीपो आमाआ प्रभू येशु ख्रिस्ताच्या नावामेहे परमेश्वर बाह्हाआ धन्यवाद कोईत रो

²¹ ख्रिस्ताआ बिक सी एक दिहरा आधीन रो.

पति पत्निही आदेश

²² ओ बुईया, तुमु तुमाआ माट्योह एहलो आधीन रो जेहलो प्रभूउ.

²³ माटी लाडीई बारी होय जेहलो का ख्रिस्त मंडलीही बारी होय अने खुद देहाचा उद्धारक होय.

²⁴ पोन जेहलो मंडली ख्रिस्ताच्या आधीन होय, तेहलूज पत्न्या पण हर एक गोठीमेहे आपु आपाआ माट्योह आधीन रोअलो.

²⁵ अने माट्योह, तुमु तुमाआ लाडी पोओ प्रेम को, जेहलो ख्रिस्ताने बी मंडळीवर प्रेम कोईत स्वतःहा त्याकोअता आपित आप्लु

²⁶ ऐने तियाआ वचनाआ त्यापोरत शुध्द स्थानाने हाजो कोईत पवित्र बोनाडा,

²⁷ अने तियाहा एक एहलो तेजस्वी मंडली बोणाडीत आपाआ स्वतःहा उभे को, ज्याम नाहा डाग, नाहा सुरकुती, नाहा कोडली एहली वस्तू होय अने पवित्र अने निर्दोष रोयो.

²⁸ या प्रकारे होय का माटी आपाआ-आपाआ लाडी त्यापोरोत आपाआ डीलोओ प्रेम कोईलो जो आपाआ लाडीई प्रेम कोअत्लू तो आपाआ मापो जे प्रेम कोअत्लू.

²⁹ काहाके का केधी कोडु डीलोओ द्वेष कोईत नाहा नहाते तियाआ पालीत पोषणाआ कोअत्लू जेहलो ख्रिस्त पोन मंडली आरी कोअत्लू.

³⁰ याकोअता काआमु आमाहा तियाआ देहाचे डील होय.

³¹ “या कारनोवाही मांहु आपाआ याह्ही बाह्हाआ सोडीत आपाआ लाडीआरी मिलीत रोही, अने ते बेन एक डील होय”

³² ओ भेद वोडो होय पोन आय ख्रिस्त ऐ मंडली याआ संबंधाने गोगीत होय.

³³ पोन तुमामे हर एक आपाआ माटी आपाआ एक सारखो प्रेम को अने लाड़ी बी आपाआ डोहाआ बिक माने.