इफिसी 4 - नोयरी नोवलू नियम

मसीह देह मेहे एकता

¹ याआ कोअता आय जो प्रभु मेहे बन्दी होय तुमाहा विनंती कोओहो का ज्याहा हादीई लाआ से तुमु हादाडये गोले होय तियाआ हाजी चाल साला,

² म्हणजे पुरो नम्रतेने अने सौम्यतेणे, अने धीर तोईत प्रेमोवाही एक दिहराआ सहन कोईलो;

³ अने शांती बंधनाणे आत्माआ एकता मिकिलो यत्न कोईलो.

⁴ एकुच डील होय, अने एकुच आत्माआ; एहलो तुमामे जे हादाडल्यो गोये ओते एकुच आशा होय.

⁵ एकुच प्रभू होय, एकुच विश्वास, एकुच बाप्तिस्मे,

⁶ अने आखाआ एकुच देव अने बाह्हू होय जो आखाजपो अने आखा मेहे अने आखाम होय.

आत्मिक वरदान

⁷ पोन आमामेरोत प्रत्येकाहा ख्रिस्ताआ दानोओ परिणाम नुसार कृपा जोड़ी होय.

⁸ याकोअता तो कोतले उसे सोढयू अने बंदिना बांधित लेत गोल्यो, अने माहुहुं दान आप्लु.

⁹ (तियाआ सोडलोओ, अने की जोड्यो फक्त का तो धरती निसे जागामे उतरीलो बी ओतु.

¹⁰ अने जे उतरीत्ले गोये ओतो तोज होय जो पुरो जुगोम सोडवीत बी गोल्यो का थोडो किबी पुरोओत कोयु).

¹¹ तोओ थुडाहा जनाला प्रेषित नेमित, अने थुडाहा सुवार्ता होमलिलो नेमित, अने थुडाहा रखवाला अने उपदेशक नेमित आप्लु,

¹² ज्याही पवित्र मांहे पूर्णता उवनारा जायलो अने सेवेए काम कोयु जालो अने ख्रिस्ताआ डील उन्नति जोडे,

¹³ जावु जाका आमू आखाहा आखे विश्वास अने परमेश्वरोओ पोऱ्यापो ओलखेए एक न उवनारा जानारू, अने एक सिद्ध मांहु न बोणीत जालो अने पूर्णता जोडयो उवे.

¹⁴ म्हणजे आमू या आगाडी पोऱ्ये नाय रोही जे माहांआ ठोग विद्या अने चतुराईनी, भ्रातिई मार्गा युक्तीवाही अने उपदेशरुपी हर एक वाराआ आल्तलो अने इही तीही फिरीविलो जाहो.

¹⁵ पोन प्रेमा माय खोरोवाही सालीलावेले आखे गोठीमेहे तियाआ माय जो बारी होय, म्हणजे ख्रिस्तामेहे वोदतो जालो,

¹⁶ ज्याही पुरो डील, हर एक सांध्याच्या योगे एकठे होतगोयो अने एकठे गडकर, तिया-तिया प्रभावाआ अनुसार जो हर एक अंगआ वारुहू हारकीज काम कोइलाआ व्दारे तियाआमे आपाआ माह कोतली का तो प्रेमोमेहे उविला कोअता उन्नति कोईत ओते.

नवलो मांहो

¹⁷ याकोअता आय ओ कोत्लू अने प्रभूमे आग्रह कोअत्लू का जेहलो अन्यजाति मांहे आपाआ मोनोमेहे भ्रष्टतेत सालत्ले तुमु ओमोरोत फासी एहलो नाहा चालीलो.

¹⁸ काहाके तियाआ बुद्धी आंदाराम उवनारा गोयी होय, अने तिया मोनो अज्ञाच्या कारनो कोईत ते देवाच्या जीवनामे रोत अलग कोयु होय,

¹⁹ अने ते ठावकू उवनारा लबाडीमेह लागित गोये होय का आखे प्रकारोओ वाईट काम लालुस सी कोअया कोए.

²⁰ पोन तुमु ख्रिस्तआ एहली शिक्षाम नाहा जोड़ी.

²¹ पोन तुमु खोरोज तीयाआज होमलित अने, जेहलो येशुमेहे खोरो होय, तीयाम हिकाडये बी गोये

²² का तुमु फासाडी चाल नोरो जूनो जुनो मांहाहा तो कपटाओ वासनावाही युक्त ओमेत तिया नाश उवनारा जात होय, उतरित टाका

²³ अने आपाआ मोनोमेहे आत्मिक स्वभावोमे नवो बोनावोओ जालो,

²⁴ अने नवो मांहाहा पेईत लेवा जो देवाआ धार्मिकता अने पवित्रता यांनी युक्त रोहू.

आत्माहा शोकित मा कोअहा

²⁵ कोईत ठग सोडीत एकमेंकारी खोरो गोगे, खोटो गोगोहो कायना, काहाके आपु एकादिहरा अवयव होय.

²⁶ खोत ते को, पोन पाप नाहा कोहू; दिह मावळे तोपोरोत तुमाआ खोत न रोअलो,

²⁷ अने न शैतानोहो जागू आपा.

²⁸ चोरी कोअनारू ईजि चोरी नाय कोईओलो, पोन हाजो काम कोईलावाही आपाआ आथोसी परिश्रम कोईलो याकोअता का ज्याआपो आय तियाहा आपलो तियाआ जागे किबी रोहू.

²⁹ कोडली वाईट गोठी तुमाआ सोबिमरोत नाहा निगोये, पण गरजो अनुसार तोज निहीकोयी काजे प्रगती याकोअता उत्तम होय, म्हणजे तियाआ होम्लिनारा पोओ कृपा होय.

³⁰ देवाआ पवित्र आत्माहा खिन्न नाहा कोहू, ज्याही तुमापो छुटकारा दिहे पर्यंत मुद्रित ओवयू होय.

³¹ तीन आखेज प्रकारे कटूत्व, अने खोतलाघी अने राग अने कलकलाट, अने निंदा, आखे दृष्टपणा सुद्धा तुमाआ सेटे कोयु जाल.

³² एक दिहरापो उपकार अने कीव कोअत्लू व्हा, अने जेहलो देवूही ख्रिस्तामध्ये तुमाआ अपराध क्षमा कोल्यु, तेहलूज तुमु पोन एक दिहराआ अपराध क्षमा को.