इफिसी 3 - नोयरी नोवलू नियम

रहस्य प्रगट ओवयु

¹ या कारणों वाही आय पौलुस जे तुमु अन्यजातिई कोअता मसीह येशुउ बंधी होय

² जर तुमु देवोओ तियाअ कृपाचे तिया व्यवस्थे विषयी होमलित होय, जो तुमाआ याकोअता मांहु आप्या गोये,

³ म्हणजे ओ का ते भेद तुमापो प्रगटीकरणा व्दारे जोडयो ओवयू, जेहलो आय पहिलुच थोडोजे लेखिलो होय,

⁴ ज्याही तुमु वासित होमज्यू शकहू का आय ख्रिस्ताआ तो भेद काजा होमजीत्लू.

⁵ जे दिहरे टाईमोमें मांहाहा पोऱ्याहा ऐहलोच कोयु गोल्यो ओतो, एहलो का आत्माआ व्दारे ओमे तियाआ पवित्र प्रेषित अने संदेष्टानवर प्रगट कोयु गोये ओते.

⁶ म्हणजे ओ का ख्रिस्त येशुमेहे सुवार्ताआ व्दारे अन्यजाति मांहे मीरामेहे साक्षी, अने एकुच डीलोओ अने वचनाने सहभागी होय.

⁷ आय देवाची कृपाच्या तिया दानआ नुसार, जो तियाआ सामर्थाच्या कोअला नुसार, जो तियाआ सामर्थ्य कोअला नुसार माहु आप्या गोये, तिया सुवार्ताआ सेवक बोन्यु.

रहस्योंओ उद्देश

⁸ मापो जे आखे पवित्र माहुंमे पण हाणो हानू होय, ए कृपा उवी का आय अन्यजातीही ख्रिस्ताआ अगाध संपतीई सुवार्ता होमलावणार,

⁹ अने आखापो ए गोठी प्रकाशाम कोहू का तिया भेदचे व्यवस्था की होय, जो आखाहा सूजमहार देवो मेहे सुरवात सी गुप्त ओतो.

¹⁰ म्हणजे ओमे मंडळीच्या व्दारे, देवोओ बहूविध ज्ञान तिया अधिपती अने अधिकाऱ्यापो जे होर्गांम होय, प्रगट कोयु जालो.

¹¹ तिया सार्वकालिक मनसा अनुसार जो तिये आमाआ प्रभू ख्रिस्त येशु माय कोअयी ओती

¹² ज्यामेहे आमाहा तियापो विश्वास कोईलावाही धेर्य अने भोरुसो बी आव आरी देवोओ जागे आवीला अधिकार होय.

¹³ याकोअता आय विनंती कोअत्लू काजे त्रास तुमा कोअता माहु उवनारा होय, तियाआ कारनो कोईत साहस मा सूडाहा, काहाके तियामे तुमाआ गौरव होय.

इफिसियों कोअता प्रार्थना

¹⁴ आय या कारनावाही तिया बाह्हा आगाडी गुडघे टेकविलो,

¹⁵ जियासी स्वर्ग अने धोरती अने धोरतीपो, हर एक घरानाआ नाव मेक्ल्ये जाहो,

¹⁶ की तोओ आपाआ गौरवाच्या धन नुसार तुमामे ओ दान आप्लु का तुमु तियाआ आत्मावांहि आपाआ मायतो मनुष्यत्व मेहे सामर्थ मिलवीत ताकतवान उवनारा जालो;

¹⁷ अने विश्वासाआ व्दारे ख्रिस्त तुमाआ हृदय मह बोह्ये का तुमु प्रेमोमेहे मुळ तोईत अने गुडू कालीला,

¹⁸ आखे पवित्र मांहाहा आरी हाजो वाईट होमजीलो शक्ती मिलीजावू का तियाआ लांबी, अने रुदी, अने उचु, अने उंडो केतो होय,

¹⁹ अने ख्रिस्ताच्या तिया प्रेम होमज्यू सेकेहे जे ज्ञानाणी प्रार्थना होय का तुमु देवाआ आखे भरपुरी जाआ पुरोओत जावा.

²⁰ ओमे जो एहेलू सामर्थ होय का आमाआं विनंती अने होम्जीलो थोडो जाखो काम कोहू सेकोहो, तिया सामर्थाआ व्यवस्था जी आमा माय काम कोअते,

²¹ मंडलीम अने ख्रिस्त येशुमेहे तियाआ गौरव पिढ्यानपिढ्या पर्यंत कायम ओवती रोय आमेन.