इफिसी 2 - नोयरी नोवलू नियम

मृत्युम रोत जीवनों वोल

¹ तो तुमाहा बी जीवाडल्यु होय जे आपाआ अपराधोओ अने पापाआ कारन मोइत गोयो ओते

² ज्याम तुमु पालील्यो आव संसारो रीतीपो अधिकार अने जुगोओ सरदार अर्थात तिया आत्मा अनुसार चालते ओते, जे ओमेभी आज्ञा न कोनारामे काम कोअता.

³ यामे आमू बी आखे च्या आखे पहीले आपाआ डीलोओ वासानामे चालते ओते, अने डील अने मोनाआ इच्छा पुरो कोईत ओते अने दिहरे माहुहूस स्वभावाहि क्रोधाचे पोऱ्ये ओते.

⁴ पोन परमेश्वराने जो दया मालक होय, आपाआ तिया प्रमोओ वोडा कारनोवाही त्याआरी तिये आमाहा प्रेम कोयु,

⁵ जाहा आमू अपराधाआ कारनोवाही मोल्या ओते ताहा आमू ओमे ख्रिस्ता आरी जिवंत (कृपेनेच तुमाआ उद्धार ओवयू होय),

⁶ अने ख्रिस्त येशुमेहे तियाआ आरी उठविले गोये होय अने होर्गाआ स्थानामेहे तियापरोत बोहाडील्ये

⁷ का तो आपाआ कृपेणे जो ख्रिस्त येशुमेहे आमा उपो होय, आवनाराआ टाईमा मेहे आपाआ कृपाच्या अनंत धनदौलत देखाडीलो.

⁸ काहाके का विश्वासाआ त्यापोरत कृपेने वाईच तुमाआ उद्धार ओवयू होये आने ओ तुमापोरोत नाहा, ताहा ओ परमेश्वरोओ दान होय,

⁹ अने नाहा कर्म कोनारू कारनोवाही, एहलो बी ओवो का कोडु खोत कोअही.

¹⁰ काहाके का आमू तियाआ बोनाडल्ये होय, अने ख्रिस्त येशुमेहे तिया हाजा कामा कोअता बोनाडहि गोयल्यु चिन्ह परमेश्वराने पेलरोत आमाहा कोइला कोअता तीयार कोल्यु.

मसीह मेहे एक

¹¹ आव कारनोवाही स्मरण कोआ का तुमु जे डीलोओ रीतीवाही अन्यजाति होय अने जे मांहे आगोमेऱ्यो आथे कोयु सुंतारहित कोतेहे,

¹² तुमु मांहे तिया टाइमाह ख्रिस्तापोरोत अलग अने इस्राएल प्रजाआ पापांनी अलग कोयु गोये, अने प्रतिज्ञाआ वाचाआ भागी नि ओते अने आशाहीन अने जगुमे ईश्वरविना ओते.

¹³ पोन ओमे ख्रिस्तमेहे तुमु जे पेल्ले सेटे ओते, ख्रिस्ताआ रक्ताआ त्यापोरत जागे आविलो गोये होय.

¹⁴ काहाके का तोज आमाआ मेल होय जिये बेनुहू एकठे कोईत लेधलो अने आंगेज कोनारी जी माय भितडो ओती ती पोडीत टाक्यी,

¹⁵ अने आपाआ आगोमेऱ्यो वाईट अर्थात ती परिस्थितोई ज्याआ आज्ञा विधीऐ रीतीपो ओती, सेलाइत गोयो कोईत आप्यी का बेनुप आपाआ माय एक नवो मांहु उत्पन्न कोईत मिलवीत आप्लु,

¹⁶ अने क्रूसपो सेलाइत गोयो कोईत ज्याआ त्यापोरत बेनुहू एक देह बोणाडीत परमेश्वरा आरी मेलविते.

¹⁷ तिये आवीत आपु जे सेटे ओते, अने जे जागे ओते बेनुहू भेटी सुवार्ता होम्लाड्यू

¹⁸ काहाके का तीयावाही आपाआ बेन जोआआ एक आत्माम रोत बाह्हाआ जागे प्रवेश ओते.

मसीह आपाआ खुणाआ दोग्डू

¹⁹ याकोअता तुमु ओमे विदेशी अने पार्के नाहा रोल्या, पोन पवित्र मांहाहा आरी परमेश्वरोओ ओत गोये.

²⁰ अने प्रेषित अने संदेष्टाआ पायापो, ज्याचा कोडाआ डोणो ख्रिस्त येशु खुद होय अने बनविल्यो गोल्यो होय.

²¹ ज्यामेहे आखे रचनेत एकठे मिलीत प्रभूमे एक पवित्र मंदिर बोनावोओ जाहो

²² ज्यामेहे तुमु बी आत्माआ त्यापोरत परमेश्वरोओ निवासाहा स्थान उविला कोअता एकठे बोनाडल्ये जात होय.