कुलुस्सी 4 - नोयरी नोवलू नियम

मसीह अनुग्रह

¹ ऐ स्वामि आपाआ-आपाआ दासाआ आरी न्याय अने ठीक-ठीक व्यावारो कोआ ओ सोमजित का होर्गामेहे तुमाआ बी एक स्वामी होय.

² प्रार्थनाम कायम लागित रो अने जाहा तुमु प्रार्थना मुडोपो तेहलाम कायम परमेश्वरोओ धन्यवाद कोईत रो,

³ तियाआ आरी आरीज आमा कोअता बी प्रार्थना कोईत रो याकोअता का परमेश्वर आमाहा आपाआ संदेशाला प्रचारा कोअता द्वार खुले तेहलूज ख्रिस्ताआ ओल्खाती मेहे रहस्य पूर्ण खोरो प्रवचनाचा प्रचारा कोअता वेल मिळूहुजोवे काहाके ह्याकाजेज आय जेलूम होय,

⁴ प्रार्थना को का आय तियाहा एहलो स्पष्ट शब्दाम गोगेहे आवे का जेहलो माहु गोगीला जोवे.

⁵ बारथेए मांहाआरी बुद्धी पुरो व्यवहार को संधीआ पुरो वाप्रिलो का.

⁶ तुमाआ गोगीला कायम अनुग्रह होय अने तुमाआ ज्ञान वादिलोहो याकोअता तुमु जाईत लेदलेए का कोडाआ केहलो उत्तर आपलो होय.

आखरी नमस्कार

⁷ आमाआ प्रिय पाही तुखिकुस जो एक विश्वासु सेवक अने प्रभू माय आरी सेवक होय तुमामे माविषयी आखे वर्तमान कोत आपही.

⁸ आय तियाहा तुमा कोअता याकोअता मोकलित का तुमामे तीयावाही आमाहा सालसालुणूक मालुम उवे ते तुमाआ ह्रदयाआ प्रोत्साहन कोअनारू.

⁹ आय आपामेहे विश्वास तेहलूज प्रिय पाही उनेमिउस ला तियाआ आरी मोकलित होय जो तुमा मेहेज एक होय ते इही जे थोडो उवनारा होय ते आखे तुमामे कोय.

¹⁰ अरिस्तर्खुस जेली मेहे माआरी रोला होयातोच बरनबासआ पाही मार्क आ तुमामे नमस्कार (तियाआ विषयामे तुमु आज्ञा जुळाविते होय का जर तुमापोओ आव्ये तेहलाम तियाआ स्वागत को),

¹¹ युसतूस कोअहो जात्लुके येशुउ बी तुमामे नमस्कार यहुदी सुंता माहुमेहे फक्त ओच परमेश्वरोओ राज्याकोअता माआरी काम कोईत होय अने माकोअता आनंदाआ भाग होय.

¹² इपफ्रास आ पोन तुमामे नमस्कार तो तुमामेऱ्या एक होय अने ख्रिस्त येशुउ सेवक होय तो कायम तुमा कोअता त्रस लेत तुमाआ काजेज हमेशा प्रार्थना कोईत होय का तुमु आध्यात्मिक रुपोमे पुरो बोणीत विकास कोईत रो पुरु विश्वास पुर्वोज परमेश्वरोओ इच्छेनुसार कोईत रो.

¹³ आय तिया साक्षी होय का तो तुमा कोअता अने लौदिकीय तेहलूज हिस्रापुलीस आ रोलाकोते परिश्रम कोईत होय.

¹⁴ प्रिय चिकित्सक लुक तेहलूज देमास बी ताहु नमस्कार कोयु होय.

¹⁵ लौदिकीया माय रोनारा पायहो तेहलूज नमुफ्रास अने तिया मंडली जे तियाआ कोओहो जोडीत जात होय नमस्कार कोजि.

¹⁶ अने पाला, पत्र जाहा तुमा आगाडी वाचले जाइअलो तेहलाम याआ गोठीकोता निश्चिय कोईत ल्या का याआ लौदिकीयाआ मंडलीम पोन वाचले जालो अने लौदिकिया त्यापोरोत तुमामे पत्र मिलुजोवे याहा तुमु पण वासित लेदलेए.

¹⁷ अरखिप्पुस पण कोआ का तो याआ गोठीकोता लक्ष्य आप का प्रभू मेहे जी सेवा तियाहा आप्यी गोयी होय ती सेवा निश्चयाने तिये पुरो कोईली.

¹⁸ आय पौलुस स्वतः आपाआ लेखणी काहाके नमस्कार कोयु होय, ओर मेका का आय जेलूम होय अनुग्रह तुमाआरी राहो.