कुलुस्सी 2 - नोयरी नोवलू नियम

¹ माआ इच्छा होय का तुमु जाईत लेवा का तुमाआ अने आखाआ लौदीकिया कोअता जे माआ शारीरिक मुख नाही पाल्यो आय केहलु मेहनत कोअहो,

² याकोअता का तियाआ मनाहे प्रोत्साहन जोडी ते परस्पर प्रेमाम बानदल्यो जालो तेहलूज विश्वासाआ जो आखो धन जो खोरो ज्ञानाने जोडयो ओते तियाहा मिलुजोवे तेहलूज परमेश्वरोओ गूढ पुरो खोरो तियाहा जोडयो उवे तो गूढ पुरो खोरो स्वतः ख्रिस्त होय.

³ ज्याम बुद्धी अने ज्ञानात आखी निधी लिकाली होय.

⁴ एहलो आय याकोअता कोत्लू का कोडु तुमामे गुल्यो-गुल्यो तर्क पुरो युक्त्या आपित धोखा न आपे.

⁵ जेबी आय जल्मामेहे आवली रुपोमे तुमामे नाहा पोन अध्यात्मिक रुपोमे आय तुमापोओ होय आय तुमाआ जिवनाआ अनुशासन अने ख्रिस्तामेहे तुमाआ विश्वासाआ दृढता पालीत आय खुश होय.

मसीह मेहे टिकित रोवा

⁶ याकोअता का जेहलो येशुहू ख्रिस्त अने प्रभूऊ रुपोमे ओ ग्रहण कोयु होय तुमु तीयाम तेहलूज बोणीत रो,

⁷ तुमाआ जोड त्याज माय रोहीना आय तुमाआ विकास तियाहा होय तेहलूज तुमु आपाआ विश्वासामेहे दृढता मेलवीलो रो जेहलो तुमामे हिकाड्ये गोये होय परमेश्वरोओ प्रती जाहाकोज आभारी रो.

⁸ ध्यानाम मेका का तुमामे आपाआ तिया भौतिक विचार कोईलो अने खोल्यू परम्परा कोडु धोखा न जोळे जे मांहाहा रीती अने संसारो त्यापोरोत जोडयो ओतु जे ब्रम्हांडला अनुशासित कोनारी आत्माआ आपही होय न ख्रिस्ताआ.

⁹ काहाके परमेश्वर आपाआ आखो परिपूर्णता सदैव तियाहा निवासाहा कोईत रोतो,

¹⁰ अने तियाहा स्थिर ओत तुमु पुरोओत बोन्यो होय तो हर एक अधिपती अने अधिकारो शिरोमणी होय.

¹¹ तुमाआ सुंता बी तियाहा ओवयू होय ए सुंता मांहाहा ओतु कोईत संपन्न उवी नाहाकोईत ए सुंता जाहा तुमु तुमाआ पाप पुरो माहू डीलो प्रभावही सुटीत आपलो आवयी ओती तेहलाम ख्रिस्ताद्वारे संपन्न उवे,

¹² ओ याकोअता उवे का जाहा तुमु बाप्तिस्मे माय त्याआरी रेट्यो गोये तेहलाम ज्या परमेश्वराने तियाहा मोइलोम रोत जिवंतु कोयु तिया परमेश्वरोओ कामोम तुमाआ विश्वासा त्याआरी फासी जिवंतु कोयु गोये.

¹³ आपाआ पापांआ अने सुंता रोत्लू डीलोवाही तुमु मोल्या ओते पोन तुमामे परमेश्वराने ख्रीस्ता बरोबर जीवोन प्रदान कोयु तेहलूज आमा आखे अपराध रोत मुक्त रुपोमे क्षमा कोयु होय,

¹⁴ परमेश्वराने तिया अभिलेखोहो आमामेरोत टाकत ग्येल्यू ज्याम तिया विधिही उलेख कोअयु गोल्यो होतुजे आमाहा प्रतिकूल अने आमाहा विरूध ओते तिये तियाहा खोलोवाही क्रूसपो सोडवीत देदलो.

¹⁵ तिये अधिपती ऐ अधिकाऱ्यांना नाडीदेदु त्यांविरुद्ध वधस्तभापोओ जायोत्सव कोईत त्याआं उघड-उघड प्रदर्शन कोयु.

¹⁶ त्याकोता खाअलो पीअलो वस्तु किंवा पूर्वी नवो चांद के पर्व किंवा शब्बाथ दिह्याहा लेत कोडु तुमामे आवोह न कोईओलो.

¹⁷ ओ ताहा ज्या गोठी उवे होय तियाआ सावलू पो होय पोन आव सावलु वास्तविक का या ताहा ख्रिस्ताआ च होय.

¹⁸ कोडु मांहु जो स्वतःहा प्रताडीत कोनारी काम किंवा स्वर्गदूत उपासना कामोम लागाडीत होय तियाहा तुमु तुमाआ प्रतिफलो मेलविलो बाधक न बोनीलाकाजे आपलो एहेलू माहहू कायमच तिया दिव्य दर्शनाआ डिग देत रोत रोतो ज्याहा तिये पालील्यो होय अने आपाआ डीलो रीतीवाही विचार माकोतो खोरो अभिमानो सी पोल्यो रोतो,

¹⁹ तू स्वतः ख्रिस्ता आधीन मेकीत नाहा जो मुख्य होय जो जोड़ो अने नखं संबंधाने तेहलूज समर्पित ओत आखे डीलाआ उपकाराआ कोईत रोतो अने तीयावाही आध्यात्मिक हाजाकोअता अनुभव ओत रोतो.

मसीह री जीवलो अने मोअलो

²⁰ काहाके तुमु ख्रिस्ता आरी मरण पाण्यो ओते अने संसाराआ बुनियादी शिकल्याप रत सुटीत आप्यू गोल्यो होय तेबी याआ प्रकारोओ आचरण काहा कोईत होय जेहलो की तुमु आव जगाआच होय अने एहलावाही नियमांची पालीत कोईत होय

²¹ याहा आथे लागाडहु नाहा, याहा चव चाखू नाहा, किंवा याहा स्पर्श कोहू नाहा?

²² ई आबी वस्तु ताहा काम कोईत-कोईत नष्ट उविला कोअता रोतेहे एहलो आचरण व्यवहारूम तुमु ग्रहण कोईत तुमु मांहाआ बोनाडल्ये आज्ञा अने शिक्षणच अनुसरण कोईत होय.

²³ मानवाहि उपासना आपाआ डीला प्रताडीत कोईत अने आपाआ कायाला मेहनत आपित संबधित नियम ओ बुद्धीपोओ आधारित प्रतिक उवनारा होय पोन वास्तव माय आव मुल्यांअ थोडी किमोत नाहा ओ नियम ताहा माहुंहु पापपुर्ण तियाआ मानवाहि भक्तीमेहे लागाडी आपत्ले.