प्रेरितो काम 5 - नोयरी नोवलू नियम

पवित्र आत्मा सी ठोग्लोओ

¹ हनन्याआ नावाअ एक माहू अने तियाआ कोवाली सफीरा थोडू जागु वेच्यु

² अने आपाआ लाडीई जाणकारी कोईत त्यामेरयू किबी स्वता जागे घेऊन लेधलो अने किबी धन प्रेषिताआ गुडाजागे मेकल्ये.

³ यापो पेत्राई कोयु, ओ हनन्या शैतानाला तू आपाआ मोनुमे याआ गोठीपो काहा जागू आप्यी का तू पवित्र आत्माहा ठोग कोयु, जमीन वेसेत जोडणारो धनामेरोते किबी धन स्वता जागे मेकीत लेधलो?

⁴ ते वेसीला आगाडी नाहाकोत ताआज नाहाओती? अने जांहा तू ती वेसाई तेहलाम ते धन नाहाकोत ताआज अधिकार निमिले? तू याविषयी काहा मोन मेहे विचार कोअयु? तू मांहाहा नाहा परमेश्वरोओ ठोग बोलतुल्यो होय.

⁵ हनन्या लेतजा जांहा ओ शब्द होमल्यु, तेहलाम तो निसे पोडीत अने जीव सोडयु ज्या कोडु याविषयी होमल्यु, आखाहा बित वाटहु लागाडीत.

⁶ फासाडी जुवान माहु आविलो तियाहा विसित अने वेटालीत अने बारथे जात तियाहा पुरोज.

⁷ सुमारे तीन तासावाही जे किबी घोडये ओते ते न मालूमे ओतलू तियाआ लाडी जागे आवयी.

⁸ पेत्राई तीही कोयु, कोअलो, नाहाकोत तुमु तुमाआ खेत एवढाम वेचीअलो? तीही कोयु होय, एवडाम.

⁹ तेहलाम पेत्राई तीही कोयु, तुमु बेन प्रभूउ आत्माआ परीक्षा काहा सहमत होय? पाला, ताआ डोहाहा पुरणाआ गुडू दरवाजापरोत आव्ये होय अने ते ताहु पण घेऊन जाय.

¹⁰ तेहलाम ती तियाआ गुडाजागे आवित निसे पोड्यी अने मोईत गोयी फासाडी जुवान जागे आविलो तीही मोल्या पालीत विसित लेत गोये अने तिया माती आहाने तीही पुरोज.

¹¹ योग्य मंडली अने ज्या कोडु ओ होमल्यु तियाहा जाखोज बित वाटेम.

प्रेरितों द्वारा चिन्ह अने चमत्कार

¹² प्रेषितांद्वारे माहुंमे जास्तीज चिन्ह प्रकट ओवुहू लागीई अने अदभूत काम कोईत ओते, ते आखे सलमोनाच्या देवडीपाही एकटा ओते.

¹³ तीयाम सहभागी उविला कोडाआ धैर्य उवनारा निमिले तेबी मांहे त्याआं प्रशंसा कोईत ओते.

¹⁴ तियाअ जागापो प्रभूपो विश्वास कोअनारे बुई अने माहु वोदिते ओते.

¹⁵ परिणाम स्वरूप मांहे आपाआ रोगी-दुख्यांहा घेऊन खाटलापो अने चादरापो गल्लीम हुवाडो लागाडीत याकोअता का पेत्र तियाअ वाटेमारोत जाइअलो तेहलाम तीयामोरोत काही माहापोओ तियाआ सावलू जेबी पोड्यी तेबी हाजो उवे.

¹⁶ यरुशलेम जागेरोत नगरामारोत आपाआ अने अशुद्ध आत्माआ त्यापोरोत पीडी माहुंहु घेऊन गटा गटावाही आवहू लागीई अने ते आखे हाजो उवनारा ओते.

प्रेरितोंहो बंदीगृह मेहे टाक्या

¹⁷ फासाडी महायाजक अने तियाआ आरीई आखे हेगांति म्हणजे आखे सदुकी तियाआ विरोद्धामे उभे रोल्या ते आअडित कोईत पाअये ओते

¹⁸ तिये प्रेषितांहा अटक कोईत लेधलो अने आखाकोता जेलूम टाक्ये.

¹⁹ परंतु रातीई समयी प्रभूउ स्वर्गदूतोवाही जेलोई बायणो उगाडीत आप्लु, तिये तियाहा बारथे घेऊन गोयेनतर कोयु,

²⁰ “जा, मंदिरोम उभे रो, अने याआ नवो जीवनोबोध्दल माहुंहु आखे कोआ”

²¹ जांहा तिये ओ होमल्यु तेहलाम तिये दीही उजाडताज मंदिरोम प्रवेश कोअयु अने संदेश आपुहू लागाडीत, फासाडी जांहा महायाजक अने तियाआ होबती त्याजागे पुग्या तेहलाम तिये यहुदी संघ तेहलूज इस्राएलो डायु याआ मिटीग लेदि फासाडी तिये जेलूम प्रेषितांहा हादाडये.

²² परंतु जांहा अधिकारी जेलूम गोये तेहलाम प्रेषित तियाहा तीइही मिल्ये नाहा तिये फासी आविलो ओ वर्तमान आप्लु अने,

²³ कोयु, आमाहा तुरुंगाचे सुरक्षाआ तालो लागाडल्यी अने बायनापाही सुरक्षा-शिपाई उभे ओते परंतु जांहा आमाहा दरवाजू उगडालू तेहलाम विसमे आमाहा कोडु देखाये नाहा.

²⁴ मंदिराआ शिपाया मुख्य याजक इये जांहा ओ होमल्यु तेहलाम ते त्याविषयी चिंता माय पोडये अने विचार कोहू लागाडीत, ओमे नाहाकोत उवे?

²⁵ फासाडी कोडु जागे आविलो कोयु, “ज्या माहु तुमामे जेलूम टाक्ये ओते ते मंदिरोम उभे रोत माहुंहु संदेश आपित होय.”

²⁶ मंदिराआ सुरक्षा शिपाया मुख्य आपाआ अधिकाऱ्याआरी त्याजागे गोये अने प्रेषितांहा जुलूम न कोअता फासी घेऊन आव्ये काहाके तियाहा भिईलो ओती का मांहे तियाहा (मंदिराआ हिपायांहा) डोणो माआहि कायना.

²⁷ ते तियाहा जागे घेऊन आव्ये अने सर्वोच्च यहुदी महा सभा आगाडी उभे कोल्यु अने फासाडी महायाजकांवाही तियाहा फुसीत कोयु,

²⁸ आमाहा तुमामे याआ नावामेहे संदेश आपुहू कठीण आज्ञा आप्यू ओतु अने तुमु फासी आखे यरुशलेमाहा आपाआ संदेशावाही पोईत आप्लु होय अने तुमु याआ व्यक्तीई रक्त अपराध आमाहा लेतआवीत होय.

²⁹ पेत्र अने दिहरा प्रेषितांनी उत्तर आप्लु, आमाहा महांआ पेक्षा परमेश्वरोओ गोठी कोअयु जोवे.

³⁰ तिया येशुहू आगलाआ परमेश्वर ईये फासी जिवंत कोईत उभे कोल्यु होय ज्याहा होमला वधस्तंभपे लोटकावित तुमु माअये ओते.

³¹ तीयाहा प्रमुख तारण कर्ता च्या रुपामे महत्व आपित परमेश्वराने आपाआ हुदिवोल बोहाडील्ये होय याकोअता का इस्राएल च्या माहुंहु बदलीत अने पापापो क्षमा प्रदान कोअयी जायलो.

³² याआ आखे गोटीविषयी आमाहा साक्षी होये अने तो पवित्र आत्माआ पण होय जो परमेश्वाराहा तियाहा आप्यू होय जे तियाआ आज्ञाआ पालीत कोअता.

³³ जाहा तिये ओ होमल्यु तेहलाम ते जास्तीज रागाकोहे अने तियाहा मोयईला प्रयत्न कोल्यु.

³⁴ परंतु माहास गमलीएल नावाआ एक परुसी जो धर्म शास्त्री ओतो तो आखे मांहे मानपान आपित ओते, महा सभा मेहे उबु रोला अने आज्ञा आप्यी का तियाहा थोडो वेळो कोअता बारथे कोईत दया.

³⁵ फासाडी तो तियाहा कोयु, इस्राएलोओ माहाआ, तुमु याआ मांहाआरी जे किबी कोअता ते उत्वाकोई कोईत होय विचार कोईत को.

³⁶ किबी काळाआधी स्वताला वोडो घोषित कोईत थियुदास प्रकट उवे ओते अने सुमारे चारहोव मांहे तियाआ फासाडी पण उवे ओते परंतु तो मारीलो गोल्यो अने तियाआ आखे शिष्याची वेराईत-वेराईत उवी ओती, परिणामी किबी उवे नाहा.

³⁷ याआनंतर जनगणनाआ टायमोमें गालील माय रोनारू यहुदा प्रकट ओवयू ओतु, तिये पण किबी माहुंहु तियाआ फासाडी आवूहू आकर्षित कोल्यु ओते तो पण माईत गोल्यो अने तियाआ शिष्याची वेराईत-वेराईत उवी.

³⁸ याकोअता याआ वर्तमानविषयी आय तुमामे कोयु होय का याआ मांहुपोरोत अलग रो यांहा ऐहलेच एखुल्योज रोहू दया काहाके तियाआ ए योजना अने होय काम मनुष्यामेरोत होय ताहा खुद समाप्त उवे,

³⁹ परंतु जर ओ परमेश्वारापोरोत होय ताहा तुमु थाबाडीहि शकत नाहा तेहलाम ओवुहू सेकोहो का तुमु स्वताला परमेश्वरोओ विरोधाम लोढीत पालीलो तिया सल्लो तिये माग्यू.

⁴⁰ अने प्रेषितांहा जागे हादीत तियाहा फटके माअये अने तियाहा ए आज्ञा आप्यी का येशुउ नावाबारामे काहीही चर्चा कोहू कायना अने तिये जाऊ आप्लु.

⁴¹ ते प्रेषित याआ गोटीविषयी आनंद कोईत ओतलू का तियाहा तियाआ नावा कोअता अपमान सहन कोअला योग्य महांआ गोये अने यहुदी महा सभामेहे निहित गोये.

⁴² मंदिर अने कोकोमे हर एक तेदीही ए सुवार्ता का येशु ओच ख्रिस्त होय शिक्षण दयायाआ अने संदेश दयायाआ तिये केधीज सोडये नाहा.