प्रेरितो काम 4 - नोयरी नोवलू नियम

पतरस अने युहन्नाआ गिरफ्तारी

¹ जाहा ते मांहाहा ओ कोतू ओतु ते याजक अने मंदिरोओ सरदार अने सदुकी तियाआ पोओ चोढीत आवे.

² ते तियापो याआ गोठी उपो रागाकोहे ओते का पेत्र अने योहान माहुंहु संदेश आपित ओतलू येशुउ मोल्यानंतर जिवंत ओवील्या पुनरुस्थान विषयी प्रचार कोईत ओते.

³ तिये तियाहा अटक कोअयी तेहलाम ती वेल हांजेपो उवी ओती त्याकोता आगाडी दिहेजा तियाहा चौकीत मेक्ल्ये.

⁴ परंतु जिये तो संदेश होम्लालू तीयामरोत जास्तीज माहु विश्वास कोअयु ओतु तियाआ संख्याआ सुमारे पाच हजार माहु पर्यंत ओती.

पतरस अने युहन्ना यहूदी सभा सामने

⁵ आगाडी तेदीही त्याआं मुख्य याजक, डायु अने यहुदी धर्म शास्त्री यरुशलेम माय एकठे उवे

⁶ महायाजक हन्ना, कैफा, योहान, सिकन्दर अने प्रमुख याजाकाआ कोऱ्याम आखे मांहे पण उपस्थित ओते.

⁷ ते तियाअ प्रेषितांहा तिया आगाडी उभे कोईत फुसिलो लागाडीत, तुमु कोडला शक्तीवांही अथवा कोडला अधिकाराआ ओ काम कोईत होय?

⁸ फासाडी पवित्र आत्माम रोत पुरो ओतगोयु पेत्र तियाहा कोयु, ओ मांहाहा मुख्य याजक अने डायु माहु,

⁹ जर आज आमापोरोत होमला लंगड्या माअहुहू कोईओलो हाजा विषयी ओ विसारपूस कोअयी जात होय का, तो हाजू केहलु ओवयू?

¹⁰ ताहा तुम्हाआ आखाहा अने इस्राएलाआ मांहोओ मालुम उवे का ओ काम नासरी येशु ख्रिस्ताच्या नावामेहे उवे होय ज्याहा तुमु क्रूसापोओ चोढावीन आप्लु अने परमेश्वराने मोल्यानंतर फासी जिवंत कोल्यु तीयावाही ओ पुरो हाजू ओवयू होय जो तुमा आगाडी उबु होय.

¹¹ येशु तोज, जो डोणो ज्याहा तुमु बाधनाआ तुच्छ माग्यू तोज डोणो अत्यंत महत्वपूर्ण (कोनशीला) डोणो बोल्यू.

¹² काहाके तारण दिहरापोरोत नाहा काहाके जुगोओ निसे मांहोहो एहलो दिहरे नाव आप्लु नाहा ज्यावाही आमाहा तारण उवे.

येशु नाव कोअता चेलाहा धमकी

¹³ जांहा तिये पेत्र अने योहान याहा धैर्य पालील्यो अने ओन वाचना-लेखता गोगत्ले अने ओ साधारण मांहु होय तेहलाम तियाहा जास्तीज आश्चर्य वाटेम फासाडी तियाहा कोलेहे का ओ येशुआरी रोहीत्ले होय.

¹⁴ काहाके जो माहहू हाजू ओवयू ओतु तियाहा त्याआरी उबु असलेला पालीत ओते कोईत तियापो किबी कोअला उरलो नाहा.

¹⁵ तिये तियाहा यहुदी न्यायसभेमेरोत निहित जाहु आज्ञा कोयु अने फासाडी आपसामेहे विचार विनिमय कोअहू लागाडीत.

¹⁶ याआ मांहाआरी केहलु व्यवहार कोईओलो? काहाके यरूशलेमरोत रोनारू हर एक माअहुहू मालूमे ओते का ह्यांच्याद्वारे एक उलेखनीय चिन्ह उवे होय अने आमाहा तियाहा नकार आपुहू शकत नाहा.

¹⁷ परंतु आमाहा तियाहा चेतावणी आपुहू का याआ नावाबारामे कोडा ए चर्चा कोहू कायना याकोअता लोकापोरोत याआ गोटीविषयी जाखा प्रचार कोईलाकाजे थाबाडीहि सेकेले जाइअलो.

¹⁸ तिये तियाहा जागे हादाडये अने आज्ञा आप्यी का येशुउ नावामें कोडोबी चर्चा कोहू नाहा अने संदेश पण आपुहू नाहा.

¹⁹ परंतु पेत्र अने योहान इये उत्तर आप्लु, तुमुज कोआ, नाहाकोत परमेश्वरा आगाडीही ओ आमा कोअता योग्य होय का परमेश्वरोओ होमला कायना अने तुमाआ होमला?

²⁰ आमाहा जे किबी पालील्यो होय अने जे किबी होमल्यु होय ते कोओला आमाहा थोब नाहा शेकता.

²¹ फासाडी तिये तियाहा जाखा धमकाव्यो अने सोडीत आप्लु तियाहा शिक्षाम कोईलाकाजे तियाहा किबी मार्ग जोड्यू नाहा काहाके जी घटना घोडीही ओती त्याकोता आखे मांहे परमेश्वरोओ स्तुती कोईत ओते.

²² ज्या माअहुहू हाजो कोअलाआ चिन्हआव्ये ओते तियाआ वय सालीह वर्षापेक्षा जाखा ओते.

चेलाआ प्रार्थना

²³ जांहा तियाहा सोडीत आपलो आव्ये ते आपाआ मित्राआरी फासी आव्ये अने तियाहा जे किबी मुख्य याजकांवाही अने डायु अधिकार्यांवाही जे किबी कोयु ते आखे तियाहा कोयु.

²⁴ जांहा तिये ओ होमल्यु तेहलाम आखे मिलीत परमेश्वरोओ आवाज आपित कोयु, मालिक, तांहुज जुग, धोरती, समुन्द्र अने तीयाम जे किबी होय तियाआ रचना कोअयी होय.

²⁵ तांहुज पवित्र आत्माआ द्वारा आपाआ सेवक, आमाआ आगाडी डाये दाविद याआ सोबिमेहे कोयु ओते, अन्यजाति माहु काहा अहंकार देखाड्यो अने देश-देशो माहु व्यर्थ योजना काहा कोअल्यो?

²⁶ धरतीइ राजांई याआ विरूध युद्ध कोईलाकाजे तीयारी कोअयी अने शासक प्रभू अने ख्रिस्ताच्या विरोधा मेहे एकठे आव्ये.

²⁷ खरोज, हेरोद अने पुन्तियुस पिलात पण आव नगरामेहे अन्यजाति अने इस्रायला आरी मिलून ताआ पवित्र सेवक येशुउ विरोधाम ज्याहा तुमु ख्रिस्ताच्या रुपोमे अभिषेक कोल्यु ओते, वास्तव एकजूट उवे ओते,

²⁸ ते एकठे उवे याकोअता का ताआ शक्ती इच्छेनुसार जे किबी पालील्यो निच्छित उवे ते पुरो उवे.

²⁹ अने ओमे ओ प्रभू तियाआ धमकीईही लक्ष्य आप अने आपाआ सेवकांआ निर्भयतावाही ताआ वचन कोइला शक्ती आप.

³⁰ जांहा हाजो कोईलाकाजे तू आपाआ आथे आगाडी कोअनारू अने चिन्ह तेहलूज अदभूत काम ताआ पवित्र सेवकांद्वारे येशुउ नावामें कोल्यु जालो.

³¹ जांहा तिये प्रार्थना पुरो कोअयी तेहलाम ज्या जागापो ते एकठे ओते ती जागू आल्यी अने तियाअ आखांम पवित्र आत्मावांहि वास कोल्यु अने ते निर्भयतावाही परमेश्वरोओ वचन गोगू लागाडीत.

विश्वासीई सहयोगी

³² विश्वासी माहुहु ओ मदत कोअनारे जमाव एक मोन अने एक तन ओतु कोडोबी एहलो कोयु निमिले का ए माआ वस्तु होय, तियापो जे किबी ओते ते आखे मिलून वाटीत लेत ओते.

³³ अने प्रेषित योग्य शक्तीवांही प्रभू येशुउ फासी जिवंत झाल्याचे साक्षी आपित ओते परमेश्वरोओ महान अनुग्रह वरदान तियाअ आखा मेहेरोत ओते.

³⁴ तीयाम कोडाहि काहीही धाकनाय पोडीत निमिले काहाके ज्या कोडापो खेतू अने को ओते ते तियाहा वेसेत आपित ओते अने तीयावाही जे धन मिलीअलो ओते ते घेऊन.

³⁵ प्रेषिताआ गूडाम मेकीत ओते अने ज्याहा जेवडे गोरोज ओते तियाहा तेवडो धन आप्लु जात ओते.

³⁶ उदाहरना कोता यूसुफ नाव कुप्र बेटाम जन्म उवलू एक लेवी ओतु ज्याहा प्रेषित बर्णबा अर्थात शांतीचा पोऱ्या पण कोयो ओते.

³⁷ तिये एक खेतू वेसेत आप्यी, तो तिया मालिक ओतु अने ते धन प्रेषिताआ गूडाम मेकल्ये.