प्रेरितो काम 3 - नोयरी नोवलू नियम

लेंग्डा भिकारिही चंगाय

¹ पेत्र अने योहान तीसरा प्रहराआ प्रार्थनाआ वेले मंदिरोमेहे जाते ओते.

² अने मांहे एक जन्मापोरोत लेंगडू ओयत्याहा लाविलो ओतो ते हर एक दीही मंदिराआ बाअणारी जो हाजी कोअहो जात्लू बोहाडीत आपित ओते का मंदिरोम जहापोरोत भिक मागे.

³ जांहा तिये पेत्राहा अने योहानाआ मंदिरोम जाआत्लू पालील्यो ताहा तिये भिक माग्ये,

⁴ पेत्राई योहानाआ आरी तिया जागे लक्ष्य आपित कोयु, आमा वोल पाल,

⁵ आखरी तो त्यापोरोत किबी जोडीला आशा कोईत त्याआरोत पाल्हू लाग्यू,

⁶ तेहलाम पेत्राई कोयू, चांदी अने हुनाआ ताहा माआ कोअता होय नाहा परंतु जे मांही होय ते ताहु आपित येशु ख्रिस्त नासरीच्या नावामेहे साल उठ,

⁷ अने तिया हुदू आथे तोईत तियाहा उठाडीलो अने लागेज तियाआ गुडाहा अने घुटन्यामेहे बल आव्ये.

⁸ तो उठित उबुरोत गोल्यो अने चालुला कोअता फिरुहू लाग्यू, अने चालते अने कुदत अने परमेश्वरोओ स्तुती कोईत तियाआ आरी मंदिरोम गोल्यो.

⁹ आखे माहु तियाहा सालीलावेले फिरीलावेले अने परमेश्वरोओ स्तुती कोअत्लू तेहलाम पालीत,

¹⁰ तियाहा ओलखीत लेधलो का तो तोज होय मंदिराआ हाजी फाटकापो बोहित भिक मागित रोत ओतु अने जी घटना तियापरोत उवी ओती ते जास्तीज नवल कोईत चक्कित उवे.

सुलेमानो ओसाराम पतरसो भाषण

¹¹ जांहा तो पेत्र अने योहान तोवीत ओते तेहलाम आखे मांहे जाखो आश्चर्य चक्कित उवे तियाअ वेले जे सुलैमान देवडीपाही गुगदिलो ओते,

¹² ओ पालीत पेत्राई माहुंहु कोयु, ओ इस्राएल माहुहू, तुमु आव मांहुंपो आश्चर्य कोअता अने आमापो काहा एहलो पालीत होय का आमुज आपाआ सामर्थ्य आव भक्तीमेहे चालुला कोअता फिरुहू योग्य बोणीत आप्लु होय.

¹³ आब्राहम इसहाक अने याकोबाआ परमेश्वर आमा पूर्वजाआ परमेश्वराने आपाआ सेवक येशुउ गौरव कोअयी ज्याहा तुमु तोईत आप्लु अने जांहा पिलातुसो वांही तियाहा सोहिला विचार कोअयु तेहलाम तुमु तियाआ आगाडी तिया नकार कोअयु.

¹⁴ तुमु तियाअ पवित्र अने धोर्मी तीयाआ नकार कोअयु विनंती कोअयी का एक हत्याराआ तुमा कोअता सोडीत आप्या जावा,

¹⁵ अने तुमु जीवनाआ कोअनाराहा माईत टाक्ये ज्याहा परमेश्वराने मोल्यामरोत जिवंत कोल्यु ओते अने याआ गोठीही आमाहा साक्षी होय.

¹⁶ अने त्याज नावामेहे तियाअ विश्वासाआ त्यापोरत जे तियाआ नावापो होय आव मांहाहा ज्याहा तुमु पालत्ले अने ओलखीत पण सामर्थ्य आप्लु, तियाआ विश्वासा जे तियाआ त्यापोरत होय तियाहा तुमु आखा आगाडी ओ डील धनदौलत उवी होय.

¹⁷ ओमे ओ पाहीही आय ओलखीत्लू का तुमु ओ काम अज्ञानामे कोल्यु होय अने तेहलूज तुमाआ सरदाराआ पण कोल्यु.

¹⁸ परंतु ज्या गोठीही परमेश्वराने आखे भविष्यवक्ताआ मुखोवाही पहिलुच कोत आप्लु होय का तियाआ दुख ख्रिस्त भोगिलो, तियाहा तिये आव रीतीवाही पुरो कोल्यु.

¹⁹ याकोअता मोन फिराविला अने फासी आव का तुमाआ पाप पुरोज जाय ज्याआपोरोत प्रभूऊ संमुखाने आराम मुख आवे,

²⁰ अने येशुहू मोकल्यीत जे तुमा कोअता पेलरोत ख्रिस्त निवड योजनाला गोल्यो होय.

²¹ आवश्यक होय का तो होर्गाम तियाअ टायमोपो रोत रोही जोपोरोत ते तियाअ जोपोरोत ते आखे गोठीई हुधाऱ्यो नाहाकोईत ओते ज्याआ चर्चा प्राचीन कालोलरोत परमेश्वरोओ आपाआ पवित्र भविष्यवकत्याआ सुबीवाहीच कोयु होय.

²² जेहलो का मोशेई कोयु होय, प्रभू परमेश्वर तुमाआ पाही मायरोत तुमा कोअता माअसारखू भविष्यवक्ता कोअयु जाइअलो जो किबी तुमामे कोअही तियाआ होमला.

²³ परंतु हर एक माहुहीई तियाअ भविष्यवक्ताआ होमल्यु नाहा माहुमेरोत नष्ट कोअयु जाइअलो.

²⁴ अने शमुवेल पोरोत तियाआ मागीलाकोत पर्यंत जिये भविष्यवक्ता गोगत्ले तियाहा आखाहा आव दिहिओ संदेश आप्यू.

²⁵ तुमु भविष्यवक्ताआ पोऱ्ये अने प्रतिज्ञाआ भागी होय जे परमेश्वराने तुमाआ आगला डायाहा पोरोत चालीलो होय जांहा तिये आब्राहमोहो कोयु ताआ वंशाद्वारे पृथ्वीई पुरो कोआ आशीर्वादित होय.

²⁶ परमेश्वराने आपाआ सेवकोहो उठवीत पहीले तुमाही मोकल्ये का तुमाआ मायरोत प्रत्येकाहा तियाहा वाईट सोडीत आशीर्वाद आप्लु.