प्रेरितो काम 27 - नोयरी नोवलू नियम

पौलुसोहो रोम मेहे मुकल्या

¹ जाहा ओ खोरोज ओत गोयो का आमू जहाजो मेहेरोत इटली जाहू तो ते पौलुस अने दिहरा थोड़ा बोंन्दीह बी युलीयुस नावाआ अगुस्त साआ टोलाआ एक सुबेदाराआ आथे होपीत देदो.

² अद्रमुतीयच्या होमला जहाजपो जी आशियाआ किनारापो जागापो जाण्यावर ओतु, सोडवीत आमाहा तियाहा उगाडीत आप्लु अने अरिस्तर्खुस नावाआ थेसलनिका एक मकिदुनिया आमा आरी ओतु.

³ दिहरा तेदीही आमाहा सिदोनामेहे लंगर टाक्यी अने युलीसने पौलापो कृपा कोईत तियाहा दोस्ता जागे जाऊ आप्लु का तिया सत्कार कोअयु जावा.

⁴ तीहीरोत जहाज उगाडीत साइप्रस च्या विरूध उविलाआ कारनोवाही आमाहा कृपेच्या आड माय सालीलो,

⁵ अने किलीकीया अने पंफूलिया जागेण्या समुद्रामे निहित लुक्या प्रांतामे मुर्या माय उतरीलो.

⁶ तीइही सुबेदाराआ सिकंदरिया याआ एक जहाज इटलीहि जाअला वेले मिल्ये अने तियाहा आमाहा तियापो चोढावीन आप्लु.

⁷ जांहा आमाहा जाअखो दिहेजा बागे-बागे चालते कुप्राच्या कनिदासो समोर पुग्या ताहा याकोअता का वारू आमाहा आगाडी जाऊ आपित नाहाओती सलमोनाआ समोरण आविलो क्रेते आड होय,

⁸ फासाडी आमाहा वोडा प्रयत्नाआ तियाआ काठोकाठ हाजी किनाराआ नावोओ जागापो आवयू तियाआ जागे लसया नगर ओते.

पौलुसोओ सलाह नजर अंदाज

⁹ जांहा जाअखो दीही ओत गोल्यु गोये अने पाअयो यात्रा मेहे जोखिम याकोअता ओवती ओती की उपासो दि खूब ओत गोया ओता आखरी पौलाने तियाहा ओ कोत समजाडीला,

¹⁰ ओ प्रीयांनो, माहु एहलो देखात्ले का आव प्रवासाम विपत्ती अने जाअखो नुकसान, नाहा फक्त माहु अने जहाजाआ नहाते आमा प्राणाआ पण उवे होय.

¹¹ पोन सुबेदाराहा पौलाआ गोठीहिई अने जाहा जाआ स्वामिना गोठीहिई वोदित मान्ये.

¹² तो किनाराआ थंडी कालीला कोअता हाजू ने ओतू, यकोअता जाअखो जोह विचार आवयू का तीहीरोत जहाज उगाडीत केधी कोडला रीतीवाही ओवुहू गोयो ताहा फिनिक्स पोतडहु हिवाळा कालविला ओ ताहा क्रेत चा एक किनाराआ होय जो दक्षिण पश्चिम अने उतरे जागे पोत्ली.

समुद्र मेहे वादुउ

¹³ जाहा थोडो-थोडो दक्षिणी वारू चालीलो उवी तेहलाम ओ होमजीत का आमाआ बेत पुरो ओतगोयु गोल्यो होय ओल विसित अने मेरो तोईतीज क्रेते जाऊ लागाडीत.

¹⁴ पोन थोडो टायमोमे जमिनिमेने वोडो वादोल उठे, जे युरकुलोन कोयु जाहो.

¹⁵ पोन वादोल जहाजपो आवहू लागाडीत तेहलाम ते तियाहा थाबाडीहि सेकेले नाहा आखरी आमाहा तियाहा वोहुहू आप्लु अने आव रीतीवाही वोहीलावेले निहित गोल्यो.

¹⁶ तेहलाम कौदा नावाआ एक उहाणू बेटाआ आड माय वोहती-वोहती आमाहा मेहनत को अने आमाहा घेडीला वंशात कोहू लेहु.

¹⁷ फासाडी योजनेने विसित आमाहा उपाय कोहू घेडीला निचोरोते बानदल्यो अने ते सुर्ती जहाजओ भाटीपो टेकाडीलाआ भिईत शीड अने एकहरको उतारीत वोहीलावेले निहित गोये.

¹⁸ जाहा आमाहा वादलामोरोत जाखो धक्के खाले तेहलाम दिहरा तेदीही ते जहाजाचे माल टाकहु लागाडीत,

¹⁹ अने तिसऱ्या तेदीही तिये आपाआ आथोवाही जहाजाचे आरन्यो एकहरको पण टाकीत आप्लु.

²⁰ जाहा जाअखो दिहेजा नाहा दिह नाहा चांदणे देखायो अने वादोल सालतीज रोल्या, ताहा आखरी आमाआं वासलोओ आखे आशा जात गोयी.

²¹ जाहा ते जाखो दीही पर्यंत फुकल्यो रोत गोये तेहलाम पौलाने तीयाम उभे रोत कोयु, याआ लोकाहा माआ होमलिलो जोवे ओते का क्रेत पोरोत नाहा नाव सोडीत ओते अने ए विपती आवयी ओते अने नाहा ए नुकसान विशिलो लागीई ओते.

²² परंतु ओमे आय तुमामे सोमजेत का धीर तोआ, काहाके तुमाआ मायरोत कोडाआ नुकसान उवे नाहा पण फ़क्त जहाजो उवे

²³ काहाके का परमेश्वर ज्याचा आय होय अने ज्याआ नमन कोअता तियाआ स्वर्गदूतोवाही आज राती मा आहने आविलो कोयु,

²⁴ ओ पौला बित नाहा, ताहु कैसरआ आगाडी उभे रोहिलो आवश्यक होय, पाला, परमेश्वराने अनुग्रह जे माआआरी होय प्रवास जाआलो कोईत ओते तियाहा ताहु आप्लु होय.

²⁵ याकोअता ओ पाहीही, धीर तोआ काहाके का परमेश्वरोओ विश्वास कोअत्लू, का जेहलो माहु कोयु गोये होय तेहलूज उवे.

²⁶ परंतु आमाहा कोडला तेबी बेटापो जात थोबा लागे.

जहाज टूटी गोयी

²⁷ जांहा चौदावी रात आवयी अने आमाहा आद्रिया समुद्राम फिरेहे रोयोजे तेहलाम आर्दी रातीई सुमारास निसरयु माहुंहु जाअये का आमाहा कोडलो तेबी देशो जागे पुग्यु होय.

²⁸ बुडीत टाक्ये तेहलाम वीस वाटे पाअये, अने थोडो आगाडी वोदित फासी मोजला तेहलाम पंधरा वाटे आव्ये.

²⁹ तेहलाम डोळा जागाने ठोकर लागीला बितकोइत तिये नावेए फासाडी चोर ओल टाक्ये अने वेगीई होऊला कामना पाल्हू लागाडीत.

³⁰ पोन जाहा मल्याह नावेमरोत पालुहू इच्छित ओते अने नालीपो ए ओल टाकीला बहानाआ खलाशी समुद्राम उतारीत आप्यी,

³¹ तेहलाम पौलाने सुबेदार अने सैनिकांआ कोयु, केधी ओ जहाजपो न राहो, तुमु पण तीयाम वासई शकत.

³² तेहलाम सैनिकाआ दोरी वाडीत नाव पोडहू आप्यी.

³³ तेहलाम वेगीवेल उविलापो ओती तेहलाम पौलाने ओ कोत आखाहा रोटू कोईलाकाजे होमजाद्योहो आज चौदा दीही उवे का तुमु वात पालीत-पालीत फुकल्यो रोल्या अने किबी खाले नाहा.

³⁴ याकोअता तुमामे होमजाडीलो का किबी खात ल्या, ज्याआपोरोत तुमाआ बचाव उवे काहाके का तुमाआ मुनकापे एक सिंज्ये पण कोम उवे नाहा.

³⁵ ओ कोत तिये आखा आगाडी परमेश्वरोओ धन्यवाद कोअयु अने तोडीत खाहुं लागाडीत.

³⁶ तेहलाम ते आखे धाडस बांधीत रोटू कोअला लागाडीत.

³⁷ आमू आखे मिलून जहाजापो बेनहोव शत्तीस जोओ ओते.

³⁸ जाहा ते रोटू कोईत तृप्त उवे, फासाडी तिये गवोओ समुद्राम टाकीत जहाज ओलको कोहू लागाडीत.

³⁹ जाहा दीही निहीलानंतर तिये तियाअ देशुई ओलखे नाहा परंतु एक खाडी देखल्यी तीई हारको मेरो ओतु, अने विचार कोअयु का केधी उवहू गोयो ताहा याआपो जहाजाआ टेकाळ.

⁴⁰ तेहलाम तिये लंगर सोडीत समुद्राम सोडीत आप्लु, अने तियाआ टायमोमें सुकानाची बंधने ढिली कोअयी अने हवे आगाडी आगाडीई शिढ चोढावीन किनाऱ्यापो निकलीलू.

⁴¹ पोन बेन समुद्राआ संगमाआ जागापो तोईत तिये जहाजाआ टेकाडये अने नाळ ताहा धक्का खात गच्च उवी अने तालई शकली नाहा परंतु आराम लहराआ जोरेज टूटीत लागीई.

⁴² तेहलाम सैनिकांआ ओ विचार ओवयू का कैदी होय तियाहा माईत टाकिलो एहलो न ओवो का कोडु तोरीत निहित जाइअलो.

⁴³ पोन सुबेदाराआ पौलाहा वासाडीला इच्छावाहि का जो पाल्हू शकतो तिये झेफित पहीले किनारावपो निहित जालो,

⁴⁴ अने बाकी किबी फोलापो अने किबी जहाज फोलापो निहित जा आव रीतीवाही आखे किबी धरतीपो वासित गोये.