प्रेरितो काम 26 - नोयरी नोवलू नियम

अग्रिप्पाआ सामने स्पष्टीकरण

¹ अग्रीपा पौलाहा कोयु ताहू आपाआ विषयामेहे गोगीलाआ आज्ञा होय ताहा पौलुस आथ आगाडी कोईत जापाप आपुहू लाग्यु,

² ऐ राजा अग्रिप्पा जेवढया गोठीमेहे यहुदी मापो दोष लागाड आज ताआ आगाडी तियाहा उत्तर आपुहू ते आपाहा धन्य उल्लासीत,

³ विशेष कोईत यकोअता का तू यहुदीयाहा आखे रीतीरिवाज अने वाद विषयी बाबी उल्लासीत आय आखिर विनंती कोअत्लू का धीर तोईत माआ होमला.

⁴ माआ चाल सालनुक पाल्या पोरोत आपाआ जातीमेहे अने यरुशलेम एहलो ओते ते आखे यहुदीयांना मालुम ओते.

⁵ जर ते साक्ष आपुहू इच्छिता ताहा पाल्या पोरोत माहु ओलखीत का आय परुसी ओतगोयु आपाआ धर्माच्या आखाम खोरो पंथाप्रमाणे जातलू.

⁶ अने आखे आव प्रतिज्ञा माय का आशाआ कारनोवाही जे परमेश्वर पूर्वजांहि आमा आगलाहा कोअयी ओती मापो न्याय चालते होय.

⁷ तियाआ प्रतीक्षा पुरो होऊला आशा तोईत आमाहा बारा वंश आपाआ आखे मोनोवाही रातदीही नमन कोईत आव्ये होय राजा याज आशेच्या विषयामे यहुदी मापो दोष लागाड.

⁸ जो का परमेश्वरआ मोल्याहा जिवंत कोअत्लू ताहा तुमाआ इही ए गोठी नाहाकोत विश्वासयोग्य नाहा होमज्ये जाहो?

⁹ आय पोन होमज्ये ओते का येशु नासरीच्या नावापो विरोधाम माहु जास्तीज किबी कोअला जोवे.

¹⁰ अने आय यरुशलेमो मेहे ऐहलेच कोल्यु अने मुख्य याजकाआरी अधिकार मिलवीत जास्तीज पवित्र माहुंहु बंदि कोओमे टाक्ये अने जांहा माअये जानारू ओते ताहा ते पण तियाआ विरोधाम आपाआ धनदौलत आपित ओते.

¹¹ हर एक प्रार्थना कोआत आय तियाहा नेहमी शासन कोईत येशुउ निंदा कोईत लेत ओतु त्याशिवाय आअडित कोईत एहेलू वेल घेऊन गोल्यो का बारथे नगरामे पण जात तिये त्रास आपित ओतु.

¹² याज आवाजोमें जांहा आय मुख्य याजकाही अधिकार अने आज्ञा पत्र घेऊन दमिश्काहि जात ओतू,

¹³ ताहा ओ राजा नेहमी दिहेए टायमोमें जुगोपेक्षा सूर्याहा उजवोडो पेक्षा एक पेक्षा आपाआ अने आपाआ आरी सालनाऱ्या चारीपो चमकताना देखल्यी.

¹⁴ जाहा आमू आखे धरतीपो पडिलो ताहा आय इब्री भाषम माहु ओ कोयु एक शब्द होम्लालू, ओ शौला, ओ शौला माहु काहा त्रास आपोहो? परिणाम तियाहा माईलो ता कोअता जाखो कठीण होय.

¹⁵ आय कोयु ओ प्रभू तू कोडू होय? प्रभू कोयु आय येशु होय ज्याहा तू त्रास आपित होय.

¹⁶ पोन तू उठ, आपाआ गुडापो उबु रो काहाके आय ताहु यकोअता दर्शन आप्लु होय का ताहु आव गोठी चा पण पावर अने साक्षी उवे जे तू पहीले होय अने तियाआ पण याकोअता आय ताहु दर्शन आपी.

¹⁷ अने आय तुमामे ताआ माहुंहु अने अन्य जातीम रोत वाचाडलो रोही ज्याआपो आय ओमे यकोअता मोकलित का,

¹⁸ का तू तियाआ डोआं उगड्यो का ते अंधारामे प्रकाशापोरोत अने शैतानाहा अधिकारा मेरोत देवाकडे वोलीलो म्हणजे पापोओ क्षमा अने तियाअ मांहाहा आरी जे मापो विश्वास कोईलावाही पवित्र कोल्यु गोये होय वतन मिलुजोवे.

¹⁹ आखिर; ओ राजा अग्रिप्पाआ, आय तियाअ स्वर्ग से राजाआ दर्शनाआ गोठी टालीलो नाहा,

²⁰ पोन पहीले दमिश्कात, फासाडी यरुशालेमाहा अने जांहा यहुदीयाहा आखे तियाहा रोनाराआ अने अन्यजाति मांहाहा समाजात रोला, परमेश्वरो कोअता पश्चाताप को अने हाजो काम ते को.

²¹ आव गोठीइ कारनो कोईत यहुदी मंदिरोम माहु माईत टाकीलाआ यंत्र रोचीत ओते.

²² पोन देवाच्या कृपेणे आय ओमेजा होय अने वोडो हानू आखे आगाडी साक्ष आपोहो अने आव गोठीहिई सोडीत किबी नाहा कोयु जो संदेष्टाआ अने मोशेई पण कोयु ओते का ओ उवे होय,

²³ का ख्रिस्ताहा दुख भोगिलो लागे अने तोज पहीले मोल्यामरोत जिवंत उठावल्यु आमा लोकामेहे अने अन्यजाति माय उजवोडाआ प्रचार कोअनारू.

²⁴ जाहा तो आव रीतीवाही उत्तर आपित ओतु तेहलाम फेस्तुस वोडा आवाजोमें कोयु, ओ पौला तू वेढा होय, जास्तीज ज्ञानाने तू माहु गांडे कोईत आप्लु होय.

²⁵ पोन पौलुस कोयु, ओ महाराज फेस्तुस, आय वेढा नाहा पण खोरो ते अने आगाडी गोठी कोयु होय.

²⁶ राजा पण ज्याआ आगाडी प्रशस्तपणे गोगीत होय ए गोठी समाजात होय अने माहु विश्वास होय का आव गोठीमेहे किबी तियाआ पोरोत निकाली नाहा काहाके ए घटना कोडला कोपरामे उवी नाहा.

²⁷ ओ राजा अग्रिप्पाआ, नाहाकोत तू संदेष्टाआ विश्वास कोअत्लू? होय, माहु मालुम होय का तू विश्वास कोअत्लू.

²⁸ तेहलाम अग्रिप्पाआ पौलाहा कोयु, तू जाहाकोज कोम होमजाडीअते माहु ख्रिस्त बानडह इच्छितो?

²⁹ पौलाने कोयु, परमेश्वरोओ माआ प्रार्थना होय का नाहाकोत कोम माय नाहाकोत मजार्तीम फक्त तांहुज नाहा परंतु जेवडे मांहे आज माआ होमलित, पाही बंधन सोडीत ते माआहोस ओतगोयु जालो

³⁰ तेह्लाम राजा अने सुभेदार, बर्निंआ अने तियाआ शी बोहितरोलो उठित उभे रोल्या,

³¹ अने अलग जात आपा परोयीन कोहू लागाडीत, ओ मांहु ताहा किबी कोईत नाहा जो कैद कोअता आवे अने तुरुंगामे टाक्ये जानारू.

³² अग्रिप्पाआ लेतजा फेस्तुसोहो कोयू, जर याआ माहुंऊ कैसराहि न्याय माग्ये कायना ओतो ताहा तियाहा मोकले कोल्यु ओते.