प्रेरितो काम 25 - नोयरी नोवलू नियम

फेस्तुसोओ सामने

¹ फेस्तुस त्या देसामेहे पोचीलाआ तीन देहो फासाडी कैसरीया मेहेरोत यरूशलेम मेहे गोयु.

² तेहलाम मुख्य याजक अने यहुदी माहाआ प्रमुख आगाडी पौलाआ फिर्याद कोअयी,

³ अने तियाहा विनंती कोईत तियाआ विरोधाम ओ इच्छिले, का तो तियाहा यरुशलेम माय बोलावला, काहाके का ते तियाहा वातेम माईत टाकीला घात कोईत ओते.

⁴ फेस्तुस लेतजा उत्तर आप्लु पौलुस कैसरिया माय अने आय स्वतः वेगु तीइही जोलो.

⁵ फासाडी कोयु, तुमामे जो अधिकार मेकात्ले तिये आरी सालीलो अने केधी आव मांहुहू किबी हादाड्यू काम कोल्यु होय ताहा तियापो दोष लागाडा.

⁶ तीयाम कोडु आठ दहा दीही रोत तो कैसरियाहा निगीत गोल्यो अने दिहरा तेदीही न्याय आथरील्यापो बोहित पौलाहा दिहरे जातीइ आज्ञा आप्यी.

⁷ जांहा तो आवयू तेहलाम ते यहुदी यरुशलेमो आव्ये ओते तिये आसेपासे उभे रोत तियापो जाअखो एहलो जाखोज एहलो आरोप लागाडले ज्याआ प्रमाण ते आपुहू शकत ओते.

⁸ पोन पौलाने उत्तर आप्लु आय जे नहाते यहुदी नियमशास्त्राआ अने नाहा मंदिराआ, अने नाहा कैसराच्या विरोद्धामे कोडु अपराध कोअयु होय?

⁹ तेहलाम फेस्तुस यहुदी माहुंहु खुश कोइला कोअता इच्छाआ पौलाहा कोयु, नाहाकोत तू इच्छितो होय का यरुअशलेमाहा जा अने तीइही माआगाडी ताआ ओ मुकदमा निच्छित कोअयु जावा.

पौलुस केय्सरोहो आअड्यू

¹⁰ पौलाने कोयु, आय कैसरआ न्याय आसनाहुमुर उबु होय माआ मुकदमा ओ कैसारला उवूंहू जोवे जेहलो का तू हाजा रीतीवाही ओलखित्लू, का यहुद्याआ आय किबी अपराध कोअयु नाहा.

¹¹ केधी आय अपराधी होय अने माईत मेकल्या जालो योग्य कोठले काम कोल्यु होय ताहा मोयईला नाहा अन्याय परंतु ज्या गोठीई ओ मापो दोष लागाडीत होय केधी त्यामेरयू कोडु पण ए गोठी खोरी ठराविलो नाहा, ताहा कोडु माहु तियाआ आथोमेहे निवरोवित शकत नाहा आय कैसराआ न्याय आपित होय.

¹² तेहलाम फेस्तुस मसलत घेऊन मिटीग हादिलो अने याआ गोठी कोत उत्तर आप्लु, तुमु कैसराचा न्याय मागल्यू होय, तू कैसरापो जाही.

अग्रिप्पाआ सामने पौलुस

¹³ किबी दीही निवराबादमे आग्रीपा राजा अने बिरनीका लेतजा कैसरीयामेहे आविलो फेस्तुस माय भेट आप्यी.

¹⁴ तियाहा जाअखो दीही तीइही रालाबादमे फेस्तुसने पौलाचआ विषयामे राजाहा कोयु, एक मांहु होय तियाहा फेलिक्स बांधीलखानाम सोडीत गोल्यो होय.

¹⁵ जाहा आय यरुशलेमो ओते ताहा मुख्य याजक अने यहुदी पूर्वजाआ तियाआ न्यायाधिशाहि इच्छिलेकि तियापो दांडाज्ञा आप्यी जायलो.

¹⁶ पोन आय तियाहा उतार आप्लु का रोमी ए रिती नाहा का कोडनीबि मांहु दंडाला होफहोपिन आपिजेवी पर्यंत वादी अने आरोपी होमरा होमोर उभे रोत मुद्दा घेऊन दोष देखाडीला उत्तर आपित नाहा.

¹⁷ आखरी जे इही एकठे ओतगोयु तेहलाम नाहाकोत आय किबी वेल नाहा लागाडयोबाळी दिहराआ तेदीही न्याय आथरील्यापो बोहित तियाअ मांहाहा आविलाहा आज्ञा आप्यी.

¹⁸ जाहा तियाआ वाडी उभे रोल्या तेहलाम तिये हादाड्यू गोठीही दोष लागाडले नाहा जेहलो आय होमजाडीत ओतू.

¹⁹ पोन ते आपाआ मतोवाही येशु नाव कोडला मांहाहा विषया माय जो माईत गोल्यो ओतु अने पौलाने जिवंत देखाये ओते वाद कोईत ओते.

²⁰ आय चौकशीतच ओतू, का आव गोठीई पत्तू केहलु लेतआण्याआ आय तियाहा फ़ुस्ल्याआ, नाहाकोत तू यरुशलेमाहा जाही का तीइही आव गोठीई निर्णय ओवो?

²¹ पोन जाहा पौलाने न्याय आप्यू का तियाआ कोरटामेने निर्णय महाराजाधिराज याआ इही ओवो तीइही आय ए आज्ञा आप्यी का जो पर्यंत तियाहा कैसरियाम मोकलित नाहातीया कैदाम मेकिलो.

²² तेहलाम अग्रीपाने फेस्तुस कोयु, आय पण तियाअ मांहाआ होमला इच्छितो तिये कोयु, तू उद्या होमलित ले.

²³ आखरी दिहरादीही जांहा आग्रीपा अने बर्निंआ वोडा धुमधामामे आव्ये अने फिरीते सरदार अने नगराहा प्रमुख माहुआरी दरबारोम पुग्या तेहलाम फेस्तुसाहा आज्ञा आप्यी का ते पौलाहा घेऊन आवे.

²⁴ फेस्तुसाहा कोयु, ओ राजा अग्रीपा, अने ओ आखे महांआ, जो आमा इही आरी होय, तुमु आव माहुहीई पालल्ते ज्याआ विषयाम आखे यहुदीयाआ यरुशलेम मेहे अने इही पण आयडीत-आयडीत विनंती कोअयी का याआ जिवंत रोहिलो उचित नाहा.

²⁵ पोन आय ओलखीत लेधलो का तिये एहलो किबी कोल्यु नाहा का तियाहा माईत टाक्ये जावा का जांहा तिये स्वतः च ओ महाराजाधिराजाने न्याय आप्यू तेहलाम म तियाहा मोकलीणारे नीर्णय कोअयु.

²⁶ आय तियाआ विषया माय कोडलीस निच्छित गोठी देखल्यी नाहाके आपाआ स्वामी जागे लिखेहू याकोअता आय तियाहा तुमा आगाडी अने विशेष कोईत राजा अग्रीपा, ताआ आगाडी लाविलो होय का चेककोल्यो नंतर माहु किबी लिखुहुं मिलुजोवे.

²⁷ काहाके का बंदित मेकल्यो मोकलीत अने जे दोष तियापो लागाडले गोये तिये नाहा कोओलो, माहु व्यर्थ जाअलो पोडत्ल्ये.