प्रेरितो काम 21 - नोयरी नोवलू नियम

यरूशलेमोओ यात्रा

¹ जाहा आमू तियाआ आरी रोत अलग ओवीत जहाज उगाड्यु ते हीद्दो मार्ग्ये रोत कोसामेहे आव्ये अने दीहरे दीही रुदुस मेहे अने तीहीरोत पतरामेहे गोये.

² तीइही एक जहाज फेनिकेसला जाअला वेले जोड़ी अने आमाहा तियापो सोडवीत तियाहा उगाडीत आप्लु.

³ जांहा आमाहा कुप्र देखायो तेहलाम तियाहा आमाहा डावासाईटोहो टाक्ये, अने सीरिया कोते जात सोराला खालेआत, को तीइही जहाज मेहे रोत माल उतारीत ओते.

⁴ शिष्याआरी आमाहा तीइही सात दीही रोयोजे तिये आत्माआ त्यापोरत आमाहा हिकाडये पौलाहा कोयु का यरुशलेम ला गुडू पण मेकहु नाहा.

⁵ जांहा तेदीही पुरो ओतगोयु गोये तेहलाम आमाहा तीहीरोत निहयू अने आखे बोई अने पोऱ्ये आरी आमाहा नगराआ बारथे पर्यंत पोचाडीत अने आमाहा गुडघे टेक्यू दर्या किनारावपो प्रार्थना कोअयी,

⁶ फासाडी एक दिहरापोरोत सेटे ओतगोयु आमाहा जहाजमे सोढयू अने ते फासी आपाआ कोआ गोये

⁷ फासाडी आमू सोरारोते पाई प्रवास जाआलो कोईत प्रलमैसात पोत्यु अने पाही जनाला सलाम कोईत तियाआ आरी बेन दीही रोयोजे.

⁸ दिहरा तेदीही आमाहा तीहीरोत चालीत कैसरात आवयू अने फिलीप्प सुवर्ताआ कोआत जो सात मायरोत एक ओतो जाईते तियाआ कोआ रोयोजे.

⁹ तियाआ चार पोरीही कुवारी ओती तियाअ भविष्यवाणी कोईत कोयु.

¹⁰ जाहा आमू तीइही खूप दीही रोयोजे, तेहलाम तीइही अगबुस नावाआ एक संदेष्टा यहुदीमरोत आवयू.

¹¹ तो आमापो आविलो पौलाचे कोमरबोंद काल्यू एने आपाआ आथे गुडू तुवूहू लाग्यू अने कोयु, पवित्र आत्माआ ओ कोयु होय का ज्या मांहाआ ओ कमरबंध होय तियाहा यरुशलेम माय यहुदीयाआ प्रकारे बांधे अने अन्यजाति होफहोपिन आपे.

¹² जाहा आमू ए गोठी कोअयु तेहलाम माहु तियाहा होमजीत्लो रोंहु विनंती कोअयी अने कोयु यरुशलेम ला जाऊ नाहा.

¹³ पोन पौलाने उत्तर आप्लु, तुमु नाहाकोत कोअता का रोडीत-रोडीत माआ मोन दुखात्ले? आयताहा प्रभू येशुउ नावाकोअता यरुशलेमाहा नाय ताहा बांधण्या कोअता म्हणजे मयलाकोता पण का तीयार होय.

¹⁴ जांहा ओ होमलित आमाहा ओ कोत ठावकू रोयोजे “प्रभूऊ इच्छा पुरो ओवो”

¹⁵ आव दिहे फासाडी आमू तीयारी कोअयी अने यरुशलेमोमे गोल्यू.

¹⁶ कैसरातून पण किबी शिष्य आमा आरी आव्ये अने आमाहा म्नासो नावोओ कुप्रातील एक जुनो शिष्य ओतु तिया जागे घेऊन आव्ये का आमाहा तियाआ इही रोअलो.

यरूशलेम मेहे पौलुस आवयु

¹⁷ जाहा आमू यरुशलेमाहा पुग्यु तेहलाम पायहोरी माहु वोडा आनंदाम आमाहा मिल्ये.

¹⁸ दिहरा तेदीही पौलुस आमाहा याकोबापो रोत घेऊन गोल्यो तीइही आखे डाये वर्ग एकठे ओते.

¹⁹ जाहा तिये तियाहा नमस्कार कोईत जे-जे काम देवूही तियाआ सेवाआ त्यापोरत अन्यजाति माय कोल्यु ओते एक-एक कोईत आखे कोयु,

²⁰ तिये ओ देवोओ गौरव कोल्यु, फासाडी तो कोयु, ऐ पाहीही, तू पालीत होय का यहुदीयाआ ह्जारोही विश्वास कोअयु होय अने आखे नियमशास्त्राआ होमजीलो होय.

²¹ तियाहा ताआ विषयाम हिकाड्ये गोये होय, तू अन्यजाति माय रोणारे यहुदीयाआ मोशेच्या त्याग कोईलाकाजे हिकाडत्लू अने कोत्लू का आपाआ पोऱ्यामूळे सुंता कोहू कायना अने परिपाठा कोईत सालीलो कायना.

²² ताहा फासाडी नाहाकोत कोल्यु जालो? मांहे अवश्य होमलीनारू का तू आवयू होय.

²³ यकोअता जे आमाहा कोत्लू ओ को आमा इही चोर मांहु होय जिये मांता कोअयु होय.

²⁴ तियाहा घेऊन तियाआ आरी आपाआ स्वतःहा शुद्ध को, अने त्यांकोअता खोर्चू आप का ते टालगी कोईली कोईओलो तेहलाम आखे होमजीत जानारू का जी गोठी तियाहा ताआ विषयी कोल्यी गोयी होय परंतु तू नियमशास्त्राआ मानीत तियाआ नियमाप्रमाणे वागीलो.

²⁵ परंतु तियाअ दिहरे जातीई विषयी जिये विश्वास कोअयु होय, आमाहा निर्णय घेऊन ओ लेखित मोक्ल्यीत का ते मूर्ती आगाडी अर्पण कोयु मांस अने रक्त व्याभिचाराआरी वासित रो.

²⁶ तेहलाम पौलुस तियाअ मांहाहा घेऊन अने दिहरा तेदीही तियाआ आरी शुद्ध ओतगोयु मंदिरोम गोल्यो अने तीइही कोत आप्लु का शुद्ध उविलाआ तेदीही म्हणजे तीयामरोत हर एक जनाला अर्पण दीही कांहा पुरो उवे.

मंदिर मेहे पौलुसोओ गिरफ्तारी

²⁷ जांहा ते सात दीही पुरो उविलापो ओते ताहा आशियामे यहुदी यांहि पौलाहा मंदिरोम पालीत आखे माहुंहु चेतवले अने खेचीत तियाहा तोओईलो,

²⁸ ऐ इस्राएल मदत को, ओ तोज मांहु होय मांहाहा अने नियमशास्त्राआ अने आव स्थळाआ विरोधाम हर एक जागापो आखे माहुंहु हिकाडत्लू शिवाय यूनानी पण मंदिरोम लेतआवीत तिये आव पवित्र स्थानाआ अपवित्र कोल्यु होय.

²⁹ तिये पहीले इफिसकर त्रुफिमुस तियाआ आरी नगरामे पहीले ओते अने होमजाडीत ओते का पौलुस तियाहा मंदिरोम घेऊन आवयू ओतु.

³⁰ तेह्लाम पुरो नगरामेहे गळबलुन ओवयू अने मांहे धावून इही आव्ये अने पौलाहा तोईत मंदिराआ बारथे निह्कीत लाविले अने वेगु बायणो बंद कोल्यु जालो.

³¹ जाहा ते तियाहा माईत टाकही ओते तेहलाम ते शिपाई अने सरदाराहा माहिती जोड़ी का पुरो यरुशलेमोमे गडबड उडाली.

³² तेह्लाम ते वेगु शिपयांना अने सुबेदाराहा घेऊन तिया जागे निसे गुगदीत आवयू अने तिये शिपायाआ सरदाराहा अने सैनिकाहा पालीत पौलाहा माईलो सोली सोडीत आप्लु.

³³ तेह्लाम शिपायाआ सरदाराआ जागे आविलो तियाहा तोईत लेधलो अने बेन हाकूलवाही बाधीतमेकने आज्ञा आपित फुसिलो लाग्यू, ओ कोडू होय अने इये नाहाकोत कोल्यु होय?

³⁴ पोन गर्दीमोरोत किबी नाहाकोत ताहा किबी नाहाकोत आळीही लागाडीत, जांहा गलबल्यावाही तो हारकीज खोरो न्याय होमज्यू शकला ताहा तियाहा गढ़ मेहे घेऊन जाईला आज्ञा कोअयी.

³⁵ जाहा तो पायऱ्यापो पुगीतगोयू तेहलाम एहलो उवे का गर्दीवही शिपायाआ तियाहा विसित घेऊन गोये

³⁶ जाहा काहाके लोकांची गोर्दी ओ आअडित तियाआ फासाडी चालते ओती, तिया नाश कोईत आपा.

³⁷ जाहा ते पौलाहा गढीत घेऊन जानारू ओते तेहलाम तिये शिपायाआ सरदाराहा कोयु, नाहाकोत माहु आज्ञा आपलो काहा का आय तियाहा किबी कोहू? तियाआ कोयु, नाहाकोत ताहु युनानी भाषा येत काहा?

³⁸ का तू तो मिसरी नाहा जो आव दिहाआ पहीले बंड उडाडीत चार हजार माआनाराहा जंगलूम घेऊन गोल्यो?

³⁹ पौलुस कोयु, आयताहा किलीकीयाम तरसुसो यहुदी होय, आय ताहु विनंती कोअत्लू का माहु माहुआरी गोठी कोहू आपा.

⁴⁰ जाहा तिये हुकुम कोअयी तेहलाम पौलुस पायऱ्यापो उबुरोत माहुंहु आथोवाही संकेत कोईत देखाड्यो जांहा ते ठावकू तेहलाम ते इब्री भाषम गोगू लाग्यू.