प्रेरितो काम 2 - नोयरी नोवलू नियम

पवित्र आत्माआ उतरिलोओ

¹ जाहा पिन्तेकुस्त आ दीह आयु ते आखे एक जागा पोओ टोलवात गोये.

² अचानक जुगोमोरत वोडा वाराआ सुसाटया सारिखा शब्द आवयू, अने तियआ आखे को जीही ते बोह्ये ओते, कोंडीत लेधलो.

³ अने तियाहा आगीई जीभा फाटीलावेले देखल्या अने तीयामरोत हर एक जानाथोओ आविलो पोड्यी.

⁴ ते आखे पवित्र आत्माआ पोईत गोये, अने ज्या प्रकारे आत्मावांहि तियाहा गोगीलाआ सामर्थ्य आप्लु, ते जोर अलग भाषा गोगू लागाडीत.

⁵ जुगोओ ऐढली हर एक जातीमे भक्तिमान यहुदी यरूशेलेमा रोत ओतु.

⁶ जांहा ओ शब्द ओवयू ताहा गोर्दी जोम्यी अने मांहे घाबरील्यो गोये, काहाके हर एक जोह ओच उनालू आवीत ओते का काहाके हर एक जनास ओच होमला आवीत ओते का ओ माआ भाषम गोगीत होय.

⁷ ते आखे आश्चर्य अने नवल कोईत कोइत्लु लागाडीत, “पाला, ओ जे गोगीत होय नाहाकोत आखे गालीली नाहा?

⁸ ताहा काहा आमामेरोत हर एक जोओ आपाआ-आपाआ भाषा होमलित?

⁹ आमाहा जे पार्थी अने मेदि अने एलामी अने मेसोपोटामिया अने यहुदीया अने कप्पदुकियाआ अने पुन्तुस अने आसिया,

¹⁰ अने फ्रुगीया अने पंफूलीया अने मिसर अने लीबूवा देश जो कुरणेआआ आस पास वालो होय, आव आखे देशामेहे रोणारे अने रोमी प्रवासी,

¹¹ म्हणजे यहुदी अने यहुदी महत्कमे धारण कोअनारे, क्रेतीय अने अरब पण, पण आपाआ-आपाआ भाषाम तिये देवोओ वोड़े-वोड़े कामाला चर्चा होमलित.”

¹² अने ते आखे आश्चर्यचकित उवे अने घाबरील्यो एकमेकाआ कोइत्लु लागाडीत, “ओ नाहाकोत उवनारा होय?”

¹³ पण दिहरावाही मजाक उडाडीत कोयु, “ते ताहा नाहा मंदीराआ नगेती चूर उवे”.

पिन्तेकुस्तो दिह पतरसोओ भाषण

¹⁴ तेहलाम पेत्र तिया आकरा जना आरी उबु ओतु अने उचो शब्दामे कोइत्लु लाग्यू, “ऐ यहुदि अने यरूशलेमेहे आखे रोणारे, ओ होमजीत ल्या, अने कान लागाडीत माआ गोठी होमला.”

¹⁵ जेहलो तुमु होमजाडीत होय, ओ मांहे नशाम नाहा होय, काहाके ओमे ताहा पहीले प्रहर होय.

¹⁶ पण एती गोठी होय, जो योएल संदेष्टाआ व्दारे कोयु गोयी ओती.

¹⁷ देव कोत्लू, का शेवटच्या दिहोम एहलो उवे का आय आपाआ आत्माआ आखे मआहाचो पाईपोडेहे कोअही, अने तुमाआ पोऱ्ये अने तुमाआ पोयरयी भविष्यवाणी कोअनारू, अने तुमाआ जुवानोहो दृष्टांतमेहे स्वप्ने पोडे.

¹⁸ नाहा ताहा आय आपाआ दासास अने आपाआ दासिपो पण तियाअ दिहोम आपाआ आत्माआ पाईपोडेहे कोअनारू, अने ते भविष्यवाणी कोअनारू.

¹⁹ अने आय उसे जुगोम अदभुत काम अने निसे धरतीपो चिंन्हे, म्हणजे रक्त अने आग अने धृम्ररूप एहलो देखाडनारू

²⁰ परमेश्वरोओ महान अने प्रसिध्द दीही आविलाआ पेल्लुज दिह अंधकारमय अने चंद्र रक्तमय उवे.

²¹ अने जो कोडु प्रभूऊ नाव लेही, तियाआ तारण उवे.

²² ऐ इस्राएल, ओ गोठी होमला येशु नासरेथ, एक मांहु ओतु ज्याकोईत देवापो ओनारो प्रमाण तियाअ अदभूत काम अने चिन्हानाकी प्रगट होय, जे देवूही तुमामे तियाआ व्दारे मेलीते देखाये जे तुमामे मालुम होय.

²³ तियाआ येशुहू, जे देवूही नेमित मेकल्या योजना अने पूर्वज्ञाना प्रमाणोओ धोल्योओ गोल्यो, तुमु अधर्माआ आताई वधस्तभवर खिलून माअये.

²⁴ पोन तीयाहा देवूही मोईला बांधित मेकल्यामरोत सोडवीत उठविले; काहाके ओ उवे अवश्य ओते का तो तियाआ होपित रोतलू.

²⁵ काहाके दाविद तियाआ विषयी गोगत्लू, आय प्रभूहु हरेक टेमे आपाआ आगाडी पालीत रोही काहाके तो माआ हाजावोगे होय, यकोअता का आय ढळू कायना कोईत.

²⁶ आव कारनो कोईत माआ मोनाहा आनंदीत उवे, अने माआ जीभ उल्लासीत उवी; नाहा ताहा माआ डील पण आशामे निवासाहा कोअही.

²⁷ काहाके तू माआ जीव अधोलोकात नाहा सोडविणारू; अने नाहा आपाआ पवित्र जोआहा सोडुहू देहि.

²⁸ तू माहु जिवनाआ मार्ग देखाल्यु होय; तू माहु आपाआ दर्शनाआ व्दारे आनंदाने पोईत आपी.

²⁹ “ऐ पाही, आय कुलधिआ दाविदाआ विषयी तुमामे प्रशस्तपणे कोत्लू का तो ताहा मोईत गोल्यो अने गाडल्यु पण गोल्यो अने तियाआ कबर आज पर्यंत आमा इही होय.”

³⁰ ओतो संदेष्टा ओतु, तियाहा मालुम ओते का देवूही माहु शपथ लेदि होय का आयताआ पोऱ्याहा होमला माअहुहू ताआ राजासनापो बोहाडअलू;

³¹ तिये उवनारू गोठीही पहिलुच पालहु ख्रिस्ताच्या उठाडीला कोअता भविष्यवाणी कोअयी का नाहा ताहा तिया जीव अधोलोकोम मोकलील्या गोल्यो अने नाहा तियाआ डील सोडुहू आप्लु.

³² तियाआ येशुहू देवूही उठविले होय, ज्याआ आमाहा आखे साक्षीदार होय.

³³ आवा प्रकारे देवाच्या हुदिवोल उचो पदी मिलवीत, अने बाह्हू त्यापोरोत ते पवित्र जोडयो कोईत ज्याआ प्रतिज्ञा कोअल्यो गोयी ओती तिये ओ ओतीत आप्लु होय जे तुमु पालल्ते अने होमलित.

³⁴ कोईत दाविद ताहा स्वर्गापो नाहा सोढयू; पण तो स्वता कोत्लू, परमेश्वराने माआ प्रभूहु कोयु, माआ हुदिवोल बोह,

³⁵ जांहुजा का आयताआ वैऱ्यी ताआ गुडाहा आसन कोए तांहुंजा.

³⁶ यास्तव ओमे इस्राएलाआ आखे कोअवालावाही निश्चयपूर्वक होमजीत न ओवो का देवूही तियाआ येशुहू ज्याहा तुमु वधस्तभपो खिळले ओते, प्रभू पण ठेरव्यू अने ख्रिस्तपण.

³⁷ तेहलाम माननारा अंत मोनाहा छेद ओवयू, अने ते पेत्रस अने इतर प्रेषिताला फुसुहू लागाडीत, “ऐ पाहीही, आमाहा नाहाकोत कोहू?”

³⁸ पेत्रस तियाहा कोयु, मोनफिरावा को, अने तुमाआ मायरोत हर एक जणाला आपाआ-आपाआ पापापो क्षमा कोअता येशु ख्रिस्ताच्या नावामे बाप्तिस्मे दया; ताहा तुमु पवित्र आत्मावाही दान मेलविनारो.

³⁹ काहाके ए प्रतिज्ञा तुमु, अने तुमाआ पोऱ्ये पोय्रा, अने ते आखे सेटे-सेटे माआहुकोअता पण होय ज्याहा प्रभू आमाआ देव आपाआ जागे हादनारो.

⁴⁰ तिये जास्तीज किबी गोठीही पण साक्ष आपित होमजाव्ये का आपाआ माह कुटील पीडी पोरोत वासाडा.

⁴¹ यास्तव जिये तियाआ वचन ग्रहण कोल्यु तिये बाप्तिस्मे लेदो; अने तियाआ तेदीही तीन हजार मांहाहा लगभग तियाआमे मिलून गोये.

विश्वासीई साझा जीवन

⁴² अने ते प्रेषितापोरोत शिक्षाम लेई, अने संगति मेकिलो अने रुटू तोडूहु, अने प्रार्थना कोइला कोअता तीयार रोत.

⁴³ अने आखे माहुंहु बी जोडयो उवे, अने जास्तीज अदभूत काम अने चिन्हे प्रेषिता प्रगट उवनारा ओते.

⁴⁴ अने आखे विश्वास कोअनारे ऐखटे रोत ओते, अने तियाआ आखे वस्तू एखटे ओती.

⁴⁵ ते आपाआ-आपाआ धनदौलत अने सामान वेसीत-वेसित जेहलो ज्याआ गोरोज उवनारा ओती, वाटीत लेत ओते.

⁴⁶ ते हर एक तेदीही एक मोन ओतगोयु मंदिरोम एकठे उवनारा ओते, अने कोआ-कोआ रोटा, तोडीत आनंद अने सालस मोनाकोईत ओन खायलो ओते,

⁴⁷ अने देवाची स्तुती कोईत ओते, अने आखे मांहे त्याआरी प्रसन्न रोत्लो अने, जो तारण जोडयो कोईत ओते, तियाहा प्रभू हर एक तेदीही तीयाम मिलवीत आपित ओतु.