प्रेरितो काम 14 - नोयरी नोवलू नियम

पौलुस अने बरनाबासो इकुनियुम मेहे विरोध

¹ इकुनियुम मेहे ऐहलो उवे का ते यहुदीयाआ मंदिरोमेहे आरी-आरी गोये ऐहली गोर्दी उवी का ते यहूदी अने यूनानी बेनु मेहे खोब जोओ विश्वास कोअयू.

² पोन विश्वास नाहा कोअनारे यहुदीयाआ अन्यजाति मोन पाही वर्गा विरुद्ध दुषित कोल्यु.

³ ते खूप दीही पर्यंत तीइही रोल्या अने आगाडी भरोसाआ निर्भीडपणे गोगीत ओते अने ते तियाआ आथोवाही चिन्ह अने अदभूत काम कोराळीत आपाआ कृपापो वचनापो साक्ष आपित ओतु.

⁴ पोन नगरामेहे मांहुंमे फुट पोडीत गोयी ओती ह्याआ केते जोओ ताहा यहुदी जागे अने केते प्रेषिताहि ओतगोयु गोये.

⁵ पण जांहा दिहरे जाती अने यहुदीया अपमान अने तियापो डोन्योमार कोइला कोअता आपाआ मुख्य याजकआरी तियाआ जागे नाह्ये,

⁶ ताहा ते आव गोठीई होमजीत गोये, अने लुकवनिया प्रांतामे लुस्त्र अने दर्बे नगरामे अने आहाने पाहने प्रांतात निहित गोये

⁷ अने तीइही सुवार्ता प्रचार कोहू लागाडीत.

लुस्रा मेहे एक लेंग्डू हाजु ओवयु

⁸ लुस्त्रमध्ये एक मांहु बोहयु ओतु तो गुडावांही लेगडू ओतु तो जन्मापोतच लेंगडू ओतु कोईत तो केधी जातलू ने ओतू.

⁹ तो पौलाहा गोठी कोअत्लू तेहलाम होमलित ओतु पौलाने तिया जागे टक लागाडी पाल्लये, का तियाहा हाजो उविला विश्वास होय,

¹⁰ अने वोडा शब्दाम कोयु, आपाआ गुडापो वारुई उबु रो.

¹¹ माहु पौलाचे ओ काम पालीत लुकवानियाआ भाषम वोडा आवाजोमें कोयु, देव मांहाहा रुपोमे आमापो उतरित आव्ये होय.

¹² तिये बरनबासला ज्यूस अने पौलाहा हर्मास एहलो कोयु, काहाके तो गोठी कोअलाआ मुख्य ओतु.

¹³ ज्यूसोओ मंदिराआ पुजारी जो तियाआ नगरआ आगाडी ओतु बोयलो अने मालू बाअनापाही लाविले अने ते माअहाआ आगाडी बलिदान कोईलो ओते.

¹⁴ पण बर्णबा अने पौलुस प्रेषिताआ जांहा ओ होमल्यु ताहा आपाआ कापडे फाडीलो अने माहुंमे शिरून अने आयडीत कोहू लागाडीत,

¹⁵ अरे माहुहू, तुमु नाहाकोत कोईत होय? आमाहा पण ताहा तुमा सारखा दुख हुख देखणारो मांहु होये आने तुमामे सुवार्ता प्रचार होमलित ओते का तुमु आव व्यर्थ वस्तुवाही अलग ओतगोयु जिवंत परमेश्वराही फिरा जीयेतीये होर्गा अने धोरती अने दर्या अने जे किबी त्यापोरोत बोनाडहि होय.

¹⁶ तिये गोईल्या वेळेला आखे जातीही आपाआ-आपाआ सोडकोपो चालीलो आप्लु.

¹⁷ तेबी पण तिये आपाआ माह साक्षी विरहित रोहू आप्लु नाहा पण तो हाजो कोईत रोल्या अने जुगोम पर्जन्य अने फोल आपनारो ऋतू तुमामे आपित तुमाआ मनाहे रोटू अने आनंदावाही कोईत रोला.

¹⁸ ओ कोत पण तिये माहुंहु वोडा कठीनमेहे बलि तियाहा प्रयत्नाआ तोअये.

¹⁹ फासाडी अंतुखिया अने इकुनियुम ईहिरोत केते यहुदी आव्ये तिये महुअ मोन वाडीत पौलाहा डोन्योमार कोअयु अने तो मोल्यु एहलो होमजीत तियाहा नगराबाहेर खेचीत टाकीत आप्लु.

²⁰ तियाआ भोवती शिष्य एखातेदेवतांहा तो उठ्यू अने नगरामे निहित आवयू फासाडी दिहरा तेदीही बरनबास आरी दर्बेस निहित गोल्यो.

सीरियाआ अन्ताकीया आवलोओ

²¹ अने तिया नगरामे सुवार्ता कोहू अने शिष्य बोनाडीला फासाडी ते लुस्त्रा इकुनियुम अने अन्ताकीया मेहे फिरित आवये,

²² अने शिष्याआ मनाहे स्थिर कोईत अने विश्वासामेहे स्थिर बोणीत रोअलाकाजे ओ कोत प्रोत्साहित कोईत रोल्या आमाहा वोडो दुख विसित परमेश्वरोओ राज्याम प्रवेश कोईओलो होय.

²³ फासाडी तिये हर एक मंडली डाये नियुक्त कोईत उपास आरी प्रार्थना कोअयी अने तिये ख्रिस्ताच्या आथोमेहे होपित आप्लु ज्यापो तिये विश्वास कोअयु ओतु.

²⁴ तेहलाम ते जाआत्लू पिसिदियामधून पंफूलिया पुग्या,

²⁵ फासाडी पिरगामध्ये वचन कोत इटली माय गोये,

²⁶ तीहीरोत ते जहाजाने अन्ताकीया माय गोये जीही परमेश्वरोओ कृपेमध्ये तियाअ कामा कोअता होपिल्ये गोये ज्याहा तिये पुरो कोल्यु ओते.

²⁷ तीही पोतडहु तिये मंडली एकठे कोल्यु अने जे किबी परमेश्वराने तियाहा पोरोत कोल्यु ओते ते कोत देखाये ओते अने ओ पण का तेहे परमेश्वराने जे अन्य जाती नाहा त्याकोअता विश्वासाआ दरवाजू उगाडीत आप्यू.

²⁸ तेहलाम ते शिष्याआरी जास्तीज दीही रोल्या.