प्रेरितो काम 10 - नोयरी नोवलू नियम

कुरनेलियुसो दर्शन

¹ कैसरीया ईही कर्नेल नावाआ कोडू एक माहू इटालीक नावाआ टोलीई सुबेदार ओतु.

² तो भक्त ओतु अने आपाआ आखे कोअवालाआरी परमेश्वरोओ बित ओतु अने यहुदी माहुंहु जाअखो दान आपित ओतु अने तियापरोत परमेश्वरोओ प्रार्थना कोईत ओतु.

³ तिये तीन दिहाआ तिसऱ्या प्रहराआ आसेपासे दर्शनाआ स्पष्ट रुपात पहीले का परमेश्वरोओ एक स्वर्गदूत तियाआ जागे माय आविलो कोत्लू ओ कर्नेल्या,

⁴ तिये तियाहा गोगीलो पालील्यो अने घाबरील्यो कोयु, ओ प्रभू नाहाकोत होय? तिये तियाहा कोयु, ताआ प्रार्थना अने ताआ दान परमेश्वरा आगाडी पुग्या होय,

⁵ अने ओमे याफा माय मांहु मोकलित शिमोनाहा जो पेत्रस कोअहो जात्लू हादीत ले.

⁶ तो शिमोन सामडाआ धोन्धू कोअणाराआ इही गोवारो होय ज्याआ को समुद्राआ किनाऱ्याजागे ओते.

⁷ जजोयो तिये स्वर्गदूत जिये तियाआ आरी गोठी कोअल्यो तो जातलू गोल्यो तिये बेन सेवक अने जे तियाआ आरी उपस्थित रोत ओते तियाआ कोईत एक भक्तिमान शिपायाहा हादिलो,

⁸ अने तियाहा आखे गोठी कोत याफाला मोक्ल्यीत.

पतरोसो दर्शन

⁹ दिहरा तेदीही चालते-चालते नागरामेरोत पुग्या, दिहरा प्रहराआ जागे पेत्र प्रार्थना कोईलाकाजे कोअलापो सोढयू,

¹⁰ तियाहा भूक लागीई अने तियाहा योजेक खांहु जोवे ओते, परंतु ते तेहलाम तीयारी कोईत ओते अने तियाआ देहभाव खुच्ये,

¹¹ अने तिये पहीले जुग उगाडीत गोये होय, अने एक वोडू ताठ चादरी सारखो चारू केडामेहे लेतकोईत धोरतीही उतरीलो ओते.

¹² ज्यामेहे पृथ्वीई आखे प्रकारोओ चतुष्पाद अने होरकीज जतु अने जुगोमेरयो सिडे ओते

¹³ तियाहा एक एहेलू एक शब्द होम्लायु, ओ पेत्र उठ, माआ अने खा;

¹⁴ परंतु पेत्राई कोयु, नाहा प्रभू कदापि नाहा काहाके का आय केधी अपवित्र अने अशुद्ध वस्तू खादु नाहा.

¹⁵ फासाडी वेले तियाहा ओ शब्द होमला आवयू जे किबी परमेश्वराने शुद्ध ठेरव्यो होय तियाहा अशुद्ध मा कोही.

¹⁶ तीन वेले ऐहलेच उवे तेहलाम ते लागेज ते पात्र जुगोम विसित गोये.

कुरनेलीयुसो कोओ पतरस

¹⁷ फासाडी पेत्र आपाआ मोनामे विचार कोईत ओतु काजे दर्शन आय पालीलो ओते ते नाहाकोत असू शकेल तेव्हा जे मांहु कर्नेल्य याहा मोक्ल्यीत ओते, ते शिमोनाआ कोओओ बाअनाआरी आविलो उभे रोल्या,

¹⁸ अने आयडीत विचरू लागाडीत, नाहाकोत शिमोन पेत्र कोअहो जात्लू तो इहीजा गोवारो कोईत होय?

¹⁹ पेत्र ताहा तियाअ दर्शना विषयी विचार कोईत ओतु अने आत्मावांहि तियाहा कोयु, पाला तीन मांहु ताहु होदिअलो होय,

²⁰ आखरी उठित निसे जा अने किबी शंका न कोअता तियाआ आरी जा काहाके आयुज तियाहा मोक्ल्यीत होय.

²¹ तेहलाम पेत्रा तिया माहुहुं कोयु, पाला ज्याचा होद कोईत होय तो आयुज होय तुमाआ आवीला काहाके होय?

²² तिये कोयु, कर्नेल्या सुबेदार जो धोर्मी अने परमेश्वरोओ घाबरीला अने यहुदी जाती माय हरोनाव मांहु होय तिये एका पवित्र स्वर्गदूता पासून ओच निदर्शन आव्ये का माहु ताआपो रोत माहु वचन उजाडीला होय.

²³ तेहलाम तिये तियाहा विसमे हादीत पावनाहा खावाडीलो कोइल्य दिहरा तेदीही तो तियाआ आरी गोल्यो अने याफामेऱ्ये पायहोआरी तियाआ आरी निहित गोये.

²⁴ दिहरा तेदीही ते कैसरीयामे पुग्या अने कर्नेल्य आपाआ कोऱ्याआरी अने प्रिय दोस्तोहा एकठे हादीत तियाआ वात पालीत ओतु.

²⁵ जाहा पेत्र विसमे आवीत ओतु, ताहा कर्नेल्य तियाहा भेट आप्यी, अने तियाआ उठ पोडीत तियाहा नमन कोल्यु,

²⁶ परंतु पेत्राई उठित तियाहा कोयु, उबु रो, आयबी मांहु होय.

²⁷ अने तियाआ आरी गोगीतीज विसमे गोल्यो, अने जाअखो माहुंहु एकठे पालीत,

²⁸ तिये कोयु, तुमामे मालूमे होय का दिहरे जाती याहा होबती कोअला अने त्याआरोत जीआ यहुदी याकोअता अधर्मी होय परंतु परमेश्वराने माहु कोयु का कोडला ए मांहाहा अशुद्ध किंवा अपवित्र माणू नाहा.

²⁹ याकोअता जांहा माहु हादिलो गोये तेहलाम किबी न गोगेहे निहित आवयू?

³⁰ कर्नेल्य लेतजा कोयु, तियाआ टायमोमें आय पुरो चोर दीही उवे आपाआ कोअमे तिसऱ्या वेल प्रार्थना कोईत ओतु तेहलाम पाला, एक धवले कापडो पेईत माहुहू माआ आगाडी उबु रोला

³¹ अने कोहू लाग्यू ओ कर्नेल्य ताआ प्रार्थना होमलित आवयी होय, अने ताआ दान परमेश्वरा आगाडी स्मरण कोअलाआ आवयी होय.

³² याकोता कोडला याफाला मोकलित शिमोनाहा जो पेत्र कोअहो जात्लू गोगीलो, तो दर्या किनाराआ जागे तो शिमोन जो सामडाआ धोन्धू कोअत्लू तीयाजागे गोवारो कोईत होय.

³³ तेह्लाम आय लागेज ताअही मांहे मोक्ल्यीत, अने तू इही आविलो हाजो कोल्यु, अने ओमे आपु परमेश्वरा आगाडी होय काहाके जे किबी परमेश्वराने ताहु कोयु होय होमले.

कुरनेलीयुसो कोओ पतरोसो उपदेश

³⁴ तेह्लाम पेत्राई कोयु ओमे माहु निच्छित मालुम होय का परमेश्वर कोडाआ पक्षपात कोईत नाहा,

³⁵ नाहा ते हर एक जातीमेहे जो तियाहा बित अने धर्माआ काम कोअत्लू तो तियाहा गोमत्लू.

³⁶ जे तिये इस्राएलाआ महापोरोत मोकल्ये ओते येशु ख्रिस्ताच्या त्यापोरत (जो होगापो प्रभू होय) शांतीचा सुवार्ता होम्लाड्यू,

³⁷ ते वचन तुमामे मालुम होय योहानाआ बाप्तिस्मे सुवार्ता गालील मायाफसाडी रोत सुरवात ओतगोयु आखा यहुदीया माय फैलावीत गोये

³⁸ परमेश्वराने कोडला रीतीवाही येशु नासरीच्या पवित्र आत्माआ अने सामर्थ्यावाही अभिषेक कोअयू सत्कर्मे कोअत्लू अने आखाहा शैतान जे त्रास आप्लु ओते, हाजो कोईत फिर्यु, काहाके परमेश्वर तियाआ आरी ओतु.

³⁹ जेते तिया आखे कामोमे साक्षी होय काजे तियाहा यहुदी तियाआ तियाहा अने यरुशलेम माय पण कोल्यु अने तिये तियाहा वधस्तंभपे माअये.

⁴⁰ तियाहा परमेश्वराने तिसऱ्या तेदीही जिवंत कोल्यु अने तियाहा प्रकट उवे एहलो कोल्यु,

⁴¹ आखे माहुंहु नहाते तियाआ साक्षीदारांहा तियाहा परमेश्वरोओ पालील्यो ज्याहा तिये निवडील्ये ओते अर्थात आमापो जिये तियाआ मोल्यामरोत जिवंत उवलानंतर तियाआ आरी खाले पीइलो,

⁴² अने तिये आमाहा आज्ञा कोअयी का माहुंमे प्रचार को अने साक्ष आपा का ओ तोज होय ज्याहा परमेश्वराने जिवंताआ अने मोईतगोल्यू पावलेल्यांआ न्याय कोअनारा ठेरव्यू होय.

⁴³ तियाआ आखे भविष्यवक्ता साक्ष आपत्ले का जो कोडु तियापो विश्वास कोअही तियाहा तियाआ नावापो पापोओ क्षमा जोडीत.

बिगर यहूदी बि पोओ पवित्र आत्मा उतरिलोओ

⁴⁴ पेत्र ए गोठी कोताच ओतु का पवित्र आत्माआ आखे होमलित उतरीलो.

⁴⁵ अने जिये सुंता कोअयी होय एहलो जे विश्वासी पेत्राआरी आव्ये ओते ते आखे चकित उवे का अन्यजाति उपो पण पवित्र आत्माआ दान उंडाल्यो गोल्यो होय.

⁴⁶ काहाके तिये जुदेजुदे भाषा गोगीलावेले होमल्यु अने परमेश्वरोओ गौरव कोअत्लू तेहलाम होमल्यु याकोअता पेत्राई कोयु,

⁴⁷ नाहाकोत कोडु पाई थाबाडीहि शकतो यांहा बाप्तीस्मा नाहा मिले कोईत ज्याहा आमा सारखो पवित्र आत्माआ मिल्यू होय?

⁴⁸ अने तियाहा आज्ञा आप्यी का तियाहा येशु ख्रिस्ताच्या नावामेहे बाप्तिस्मे आप्यू जावा तेहलाम तिये तियाहा विनंती कोअयी का तो तीयाआरी फासी किबी दीही रोअलो.