2 तीमुथियुस 3 - नोयरी नोवलू नियम

आखरी दिहोओ चेतावनी

¹ पोन ओ ओर मेका आखरी दीहो मेहे कठिन टाईम आवे

² काहाके मांहु लोभी, स्वार्थी, डींगमार, गर्व कोअनारू, निंदा कोअनारू, याह्ही बाह्हाआ आज्ञा न माननारे, कृतघ्न, अपवित्र,

³ दया नी कोअनारू, क्षमा नी कोअनारू, दोष लागाळणारू, असयंमी, कडक, हाजुहोये दुश्मन,

⁴ विश्वासघात कोअनारा, ढीठ, कोठी, अने परमेश्वरोहो नाहा पोन सुख आवाडाविलो दोनाराआ रोही.

⁵ तेए भक्तीई भेष तोए पोन शक्ती जोरावारोह मान्त्लुके नाहा एहलापोरोत अलग रोअलो.

⁶ त्यामेंऱ्यो ते मांहे होय जे कोआत दाबल्यो गुडावांही पोवागोली अने तिया भोळ्या बोअयीही वशमे कोईत लत्ले जे पापुमे दाबिलो अने हर एक एहलाम वासिलो वशमे होय,

⁷ अने आखे काळा शिकाडे रोनारे पोन सत्त्याआ उलखात जाआ खोरोज पूगति नाहा.

⁸ जेहलो योनेस अने याम्ब्रेसाने मोशेच्या विरोध कोअयु ओतो तेहलूज ओ पण खोराआ विरोध कोअता ओ एहलो मांहु होय जिया बुद्धी भ्रष्ट ओत गोयी होय अने ते विश्वासाआ विषयाम न उरिलो होय.

⁹ पोन ते यांपोरोत आगाडी जाऊ शकत नाहा काहाके जीही तियाआ अज्ञानता आखे मांहोपो प्रकट उवी ओती तेहलीज याआ बी ओतगोयु जानारू.

मसीह जीवन मेहे संघर्ष

¹⁰ पोन तू हिकाडीलो, वागणुक, इच्छा, विश्वास, सहनशीलता, प्रेम, धीरज, अने छळा मेहे अने दुख सहन कोअलाआ माआ मदत कोअयी,

¹¹ अने एहलो दुखामेहे पोन जे अन्ताकीया अने इकुनियुम अने लुस्त्रा मेहे मापो पोडये ओत एने इतर दुखामेहे पोन जो आय सहन कोयु होय पोन प्रभू माहु आव आखे त्यापोरोत सोडवीत लेधलो.

¹² पोन जेवडे ख्रिस्त येशु माय भक्तीमेहे जीवोन जेविलो इच्छा कोअता तिया आखाआ छळ उवे,

¹³ पोन खराब अने फिरावनारु अने फिरनारो बिगड़ी गोयली जातेहे.

¹⁴ पोन तू तिया गोठीपो जे तू शिकायो होय अने जे विश्वास कोयु होय ओ जणू मजबुते टीकित रो का तू ते कोडला मांहुपोरोत शिकायो होय,

¹⁵ अने हानेदेखुज तू पवित्रशास्त्र शिकायो होय जो ताहु ख्रिस्तापो विश्वास कोलाकोता तारण मेलविलो बुद्धिमान बानडह शकतो.

¹⁶ आरन्यो पवित्रशास्त्र परमेश्वरोओ प्रेरणेने बोनाड्यू होय अने सिकाडीलो अने सामजाडीलो अने हुधारीलो धर्माच्या शिक्षेकोअता फायदा होय,

¹⁷ त्यापोत परमेश्वरोओ भक्त पुरो ओतगोयु अने हर एक हाजा कामा कोअता तीयार ओतगोयु जाअलो.