2 थिस्लोनी 3 - नोयरी नोवलू नियम

प्रार्थनाआ अनुरोध

¹ आखरी मेहे ऐ पाही आमाआ कोअता प्रार्थना कोअते रोजा का प्रभुउ वचन एहलो वेगो कोयले अने महिमा जोड़े जेहलो तुमाहा मेंहे उवो,

² अने आमू वाकड अने ठोग महापोरोत वासित रोअलो काहाके आखाज मेहे विश्वास ओतू एहलो नाहा.

³ पोन प्रभू विश्वासयोग्य होय तो तुमामे ओ मजबुते अने स्थिर कोआ अने तिया वाईट हाजूहोय मेके.

⁴ आमाहा प्रभूमे तुमापो भोरुसो होय का जी-जी आज्ञा आय तुमामे आपोहो तियाहा तुमु मानतेहे अने मानीत बी रोही.

⁵ परमेश्वरोओ प्रेम अने ख्रिस्ताच्या धीरजावोगे प्रभू तुमाआ मोनोओ मार्गदर्शन कोआ.

आलसी विरुद्ध चेतावनी

⁶ ऐ पाही, आमू तुमामे प्रभू येशु ख्रिस्त नावामेहे आज्ञा कोअत्लू का तुमु हर एक एहलो पाहयोप रोत अलग रो जो कायनिहाजू वागणुक कोअत्लू अने जी शिक्षा तिये आमापोरोत लेदि तीयी होसे कोईत नाहा.

⁷ काहाके तुमामे मालुम होय का कोडला प्रकारे आमाहा वागणुक रोंहु जोवे काहाके आमू तुमामे कायनिहाजू वागणुक कोअयी नाहा,

⁸ अने कोडाआ रुटू फुकट खादल्यी नाहा पोन परिश्रम अने काम कोईते रातदीही काम कोईत ओते का तुमा मेहेरोत कोडापो पो पोडहू कायना.

⁹ एहलो नाहा का आमाहा अधिकार नाहा पोन यकोअता का स्वतःहा तुमा कोअता नमुना बोनावोओ ओतू का तुमु आमा कोअता वागणुक को.

¹⁰ काहाके जोओ आमू तुमाआ इही ओते तेहलाम पोन तुमामे ए आज्ञा आपित ओतू का जर कोडाआ काम कोईलो ने ओयताहा खाहुं पोन नाय जोवे.

¹¹ आमू मानत्लू का कोडु-कोडु तुमाआ माय आलसी वागणुक सालताहा अने किबी काम कोईत नाहा पोन दिहरा कामोम आथे टोकीत रोत्ले.

¹² एहलाहा आमू प्रभू येशु ख्रिस्तामेहे आज्ञा आपोहो अने समजाडत्लो का ठावकू पणे काम कोईत आपाज रोहू खायलो रोअलो.

¹³ ऐ पाही, तुमु हाजो कोअलाआ खचू नाहा.

¹⁴ जर कोडु आमा आव पत्राहा आव गोठी कोअता मोनामे नाहा तियापो नजर मेका अने त्याआरी होबती कोयु नाहा याकोअता तो लाजआली उवूंहू जोवे.

¹⁵ तेबी पोन तियाहा दुश्मन हमजुतल्यो नाहा पोन पाही होमजीत तियाआ कानउगाडे को.

आखरी शुभकामना

¹⁶ ओमे जो प्रभू जो शांतीई कुवू होय स्वतः तुमामे सर्वकाल अने आखे प्रकाराआ शांती आपे अने प्रभू तुम्हाआ आखा आरी राहो.

¹⁷ आय पौलुस आपाआ आथोवाही नमस्कार लेखातुलू हर एक पत्रामेह माआ ओच निशाण होय आय याज प्रकारे लेखातुलू.

¹⁸ आमाआ प्रभू येशु ख्रिस्ताआ कृपा तुम्हाआ बोठासपो उवनारा रोअलो.