2 थिस्लोनी 2 - नोयरी नोवलू नियम

पापोओ मांहो म्हणजे नाशोओ सुउ

¹ ऐ पाही ओमे आय आपाआ प्रभु येशु ख्रिस्तआ आविलाआ अने तियाआ आरी आपुह एकठे उवीलाआ विषयोमेहे आय तुमाहा विनंती कोअताहा

² का एखादो आत्माआ किंवा वचन किंवा पत्राआ त्यापोरत जे जेहेका ही आमाही रोते होय ओ जाईत ले प्रभूऊ दीही आविलो गोये होय तुमाआ मोन अचानक आलविनारू कायना अने तुमु बित नाहा.

³ कोडनीबि प्रकारे कोडाआ त्यापोरोत फसुस नाहा काहाके तो दीही आविलो नाहा जाहुजा धर्माआ त्याग उवे नाहा अने तो पापाहा माहु कोअतीज विनाशो पुत्र प्रकट उवे नाहा.

⁴ ख्रिस्तविरोधी कोअत्लू अने आखाप रोत देव किंवा उपासना मानाडत्लू अने स्वतःहा वोडू मोनोहो इहिंजा का तो देवाआ मंदिरोम बोहित स्वतःहा देव मोनोहो.

⁵ की तुमामे ओर नाहा का जाहा आय तुमाही ओतू आव गोठी तुमामे कोयु रोहिजे?

⁶ तुमु तिया वस्तूउ ओलखीत जी तियाहा ओमे थांबाडीत रोली होय तो त्याज दिहोम प्रकट उवूंहू जोवे.

⁷ काहाके अधर्म गूढ ओमे बी काम कोईत जात होय, पोन ओमे एक उब राखनारू होय जोपोरोत तो सेटे उवनारा नाहा तो थोबिलो रोही.

⁸ तेहलाम तो अनीतिमान प्रकट उवे ज्याहा प्रभून येशु आपाआ सोबिमरोत फुकिलो माईत टाकही अने आपाआ आगमनाआ लाडीवाला नाश कोअनारू.

⁹ तिया नितीमानाआ शैतानाआ कामु होस आखे प्रकारोओ वाईट शक्ती अने चिन्ह अदभूत का मापोरोत,

¹⁰ अने नाश कोअनारा कोअता अधर्म आखा प्रकारो कपट उवे, काहाके तियाआ सत्या बरोबर प्रेम कोयु नाहा ज्याआपोरोत त्याआं तारण उवे.

¹¹ यामुळे परमेश्वर तीयाम एक भ्रांतीई शक्ती मोकलीनारा काजे का ते ठोगनारा विश्वास पालनारू,

¹² कोअतीज जेवडे मांहे सत्य विश्वास पालीत नाहा पोन अनीतीई खुश ओये तिया आखाज दंड मिले.

दृड रोवा

¹³ ऐ पाही, अने प्रभूउ प्रिय माहु जोवे का आमू तुमा बारामे कायम परमेश्वरोओ धन्यवाद कोईत रोअलो काहाके परमेश्वराने पेलेरोत तुमामे निवडीत लेधलो का आत्माआ त्यापोरत पवित्र बोणीत अने विश्वास पालीत तारण मिलुजोवे.

¹⁴ त्याजमेहे तिये तुमामे आमू सुवार्तेमुळे हादाडये का तुमु आमा प्रभू येशु ख्रिस्त गौरवाला जोडयो कोईओलो.

¹⁵ त्यापोत ऐ पाही स्थिर रो अने ज्या-ज्या गोठी तुमु जेबी वाचनाने किंवा पत्राआ त्यापोरत आमापोरोत शिक्षा होय तियाहा तोईत रो.

¹⁶ आमाआ प्रभून येशु ख्रिस्त स्वतः अने आमाआ बाह्हू परमेश्वर जीआ आमापो प्रेम कोयु अने कृपेणे सार्वकालिक शांती अने श्रेष्ठ आशा आप्यी होय,

¹⁷ तुमाआ मोनामे शांती आपे अने तुमामे हर एक हाजा कामोम अने वचनोमे मजबुते कोआ.