2 पतरस 2 - नोयरी नोवलू नियम

विनाशकारी सिद्धांत

¹ जेहला प्रकारे तियाआ माहामे ओ ठोग भविष्यवक्ता ओता, तियाआ प्रकारे तूमामेहे बी ठोग उपदेशक रोय जे नाश कोअनारा पाखंड उद्घाटन निकाई-निकात कोए अने स्वामीई जो तियाहा वेसातो लेत लेदलो होय इन्कार कोए अने तियाआ वेगु विनाशो मेहे टाकित देय.

² जाअखो एहलो तियाआ सारखो ठोग पणा कोए, ज्याआ कारनोवाही सत्त्याआ मार्गाआ निंदा कोअयी जाय.

³ ते लाभ जाअखो गोठी कोत तुमामे आपाआ लाभाओ कारण बोनाविही, अने जी दंडाओ आज्ञा तियापो पेलरोत ओत गोयीही तियाआ आवलोओ कीबी वेल नाहा अने तियाआ नाश उवलो नाहा.

ठोगो शिक्षको न्याय

⁴ काहाके का जाहा परमेश्वराने तिया स्वर्गदूतोहो जिये पाप कोयु तियाहा सोडये नाहा पोन नरकाआ मोकलित आन्दाराम कुंडात टाकीत आप्लु काहाके का न्यायाआ दिहे पर्यंत बांधीत मेकल्ये रोही;

⁵ अने प्राचीन युगाआ जगाहा बी नाहा सोडये नाहा ताहा भक्ती हीन जुगोपो महाजल प्रलय मोकल्यु पोन धर्माआ प्रचारक नोहा आरी सात मांहे वासाडीत लेधलो;

⁶ अने सदोम अने गमोराआ नगराहा विनाशाआ एहेलू दंड आप्यू का तियाहा भस्म कोईत खाओम मिलवीत आप्लु काहाके ते आवनाराआ भक्तिहिन् मांहाहा शिक्षाम याकोअता एक दृष्टांतमेहे बोन्यो,

⁷ अने धोर्मी लूत लागाडले जे अधर्मीयांचे अशुद्ध चाल पोशावाही जाखो दु:खी ओतु सोडीत आप्लु.

⁸ काहाके का तो धोर्मी तियाआ आरीज रोत तियाआ अधर्माआ कामा कोअता पालीत-पालीत अने होमली-होमलित प्रत्येक दीही आपाआ खोरो मनाहे पीडीत कोअतु ओतु

⁹ ताहा प्रभू भोक्तोहो परीक्षे मायरोत काढीत लेहो अने अधर्मी यांना न्यायाआ दिहे पर्यंत दंडाओ दशा माय मेकिलो पण मालुम होय,

¹⁰ विशेष कोईत तियाहा जे अशुद्ध अभिलाषा फासाडी डीलोआ नुसार सालतावाही अने अधिकारोहो तुच्छ मानतेहे ते उद्धट, अने एकदम होय, अने उचो पद वालाहा हाजा बक्ता कोअहू नि बिहत्ले,

¹¹ तेबी स्वर्गदूत जी शक्ती अने सामर्थ्यावाही तियाआ पोरोत वोडो होय, प्रभूउ आगाडी तियाहा हाजो वाईट कोत दोष नाहा लागाडीत.

ठोगोओ शिक्षकोओ भ्रष्टता

¹² पोन ऐ मांहे निर्बुद्ध जनावर सारखे होय, जे तोअया जालो अने नाश उविला कोअता पोन उवे होय; अने ज्या गोष्टी अलखितलो नाहा तियाआ विषया माय दिहराहा वाईट अने हाजो कोतेहे, ते आपाआ सोडीलो ताहा स्वताआ सोडावीत जातेहे.

¹³ दिहरा तियाआ वाईट कोइलाआ बद्दल तीयाआज वाईट उवे तिये दिहे दिह्या मज्याकोली कोअला हाजो लागेहे ओ कलंक अने दोष होय; जाहा ते तुमाआ आरी खातले, पितले, ताहा आपाआ त्यापोरोत मेजवान्या खात्लू ताहा कापडारीजे मौजा कोअता.

¹⁴ तियाआ डोंआ माय व्यभिचार बोहीतरोल्यु होय, अने ते पाप कोअल्यो विना उबोरो शकत नाहा चंचल मोन वालाहा फसाविल्यो लत्ले तियाआ मनाहे लोभ कोअलाआ अभ्यास उवनारा गोल्यो होय; ते शैतानाआ पोऱ्या होय.

¹⁵ ते हीदू मार्गाला सोडीत बोहकीन गोये होय, बौराचा पोऱ्या बिलामाआ मार्गापो आवीत गोये होय, जीयाहा अधर्माआ मोजरी प्रिय महांआ;

¹⁶ पोन तियाआ अपराधाआ विषया माय उल्लघन आप्लु, इहिंजा का अबोलोओ मुक्यो गोदडा महांआ आ गोगीलो तिया भविष्यवक्त्याला तियाआ बावला पण सी रुक्यू.

¹⁷ ते मांहे उगाली वेअ, अने वादलावा उगाडल्यु धुके होय; तियाआ याकोअता अनंत आंदारो ओत गोयो ठेरवीही गोये होय.

ठोगोओ शिक्षकोओ धोका

¹⁸ ते व्यर्थ घमंडीआ गोठी कोईत-कोईत ठोग पणाआ कामाआ त्यापोरत तिया माहुंहु डीलो वासना माय फसाविल्यो लत्ले जे भटकलेल्यां मायरोत ओमे निहीगोयो होय.

¹⁹ ते तियाहा हाजो कोअला प्रतिज्ञा ताहा कोअता पोन आमुज भ्रष्टतेचे दास होय; काहाके का जी माहहू जीयेतीये टाकायत रोलयो होय, तो तियाआ दास बोणीत जात्लू.

²⁰ जाहा तो प्रभू अने उद्धारकर्ता येशु ख्रिस्ताआ ओलखिई त्यापोरत संसारो जुदा-जुदा प्रकाराआ अशुध्दता पोरोत वासित गोये, अने पाशी तीयाम फसित हाराइत गोये, ताहा तियाआ फासाडीई दशा पेल्लापो रोत वाईट ओत गोयी होय.

²¹ काहाके का धर्मीआ मार्गाआ किबी ओळखिलो त्याकोअता तियाआ पेक्षा हाजो मेकीत गोये ओते का तियाहा ओलखीत, तिया पवित्र आज्ञा फासी जातेहे जे तियाहा होपल्यु गोये ओते.

²² तियापो ए कहावत हाजी बोहीलो, कुत्रो आपाआ छाटकि अने उंगलाडलो हुवरयो गारामेहे लोडनारू फासी निहित जाती.