2 कुरिन्थि 8 - नोयरी नोवलू नियम

उदारता पूर्वक दान

¹ ओमे ऐ पाही, आय तुमामे परमेश्वरोओ तियाअ कृपाआ खोबोर आपोहो जी मकिदुनिया मंडली उवी होय.

² का संकटा च्या वोडा परीक्षेमेहे तियाआ वोडू आनंद अने हाजा गरीबी मेहे तियाआ उदारता जास्तीज वोडि गोयो.

³ तियाआ विषयी माआ ए साक्ष होय का तिये आपाआ सामर्थ्यावाही पोईत शक्तीचे पण बारथे आप्लु होय.

⁴ अने आव दान मेहे अने पवित्र मांहाहा सेवा सहभागीता उविलाआ कृपेच्या विषयाम आमाहा फासी-फासी जास्तीज विनंती कोअयी,

⁵ अने जेहलो आमाहा आशा कोअयी ओती तेहलूज नाहा पण तिये प्रभूहु फासी परमेश्वरोओ इच्छावाहि आमाहा पण स्वतःहा आपित आप्लु.

⁶ त्याकोता आमाहा तीतुसला होमजाद्योहो, का जेहलो तिये पहीले सालू कोअयु ओतु तेहलूज तीयाम आव दानाआ कामाकोता पण पुरो कोईत लेदले.

⁷ यामुळे जेहलो तुमु हर एक गोठीमे म्हणजे विश्वास, वाचन, ज्ञान अने आखे एहलाम प्रयत्नात अने प्रेमाम जे आमापो कोअता, वोदत्ले, तेहलूज आव दानाआ कामोम पण वोदतो जा.

मसीह आपाआ नमूना

⁸ आय आज्ञा रीतीपो ताहा नाहा पण दिहीरा उत्साहाने तुमाआ प्रेमो खोरावाही पारखिलोओ कोत्लू.

⁹ तुमामे आमा प्रभू येशु ख्रिस्ताची कृपा मालुम होय का तो श्रीमंत ओतलू पण तो तुमा कोअता गरीब ओवयू म्हणजे तियाआ गरीब ओतगोयलो तुमु श्रीमंत उवे.

¹⁰ आव गोठीमे माआ मोत कोत्लू, ओ तुमा कोअता हाजो होय, जे होमला वोरोन नाहा फक्त आव कामाकोता कोइलो; पण आव गोठीकोता आवाडाविलो तोईलो पण पहीले आव्ये ओते,

¹¹ त्यापोत ओमे आव कामाकोता पुरो को का जेहलो आवाडाविलो तोईलो तुमु तीयार ओते तेहलूज आप आपाआ परिस्थिती नुसार ओ पण पुरो को.

¹² काहाके जर मोनाआ तीयारी होय, तीयावाही दान पोन होव कोयत जाहो, जे त्याजागे होय किंवा तेहलो नाहा जे त्याजागे नाहा.

¹³ ओ नाहा का दिहराहा आराम अने तुमामे दुख मिलुहु जोवे,

¹⁴ पोन हारखज विचाराआ आव टायमोमें तुमाआ वतुलू, तियाआ कोम उविलाआ कामोम आविलो, म्हणजे तियाआ वतुलू पण तुमाआ कोम होनारो कामाकोता आविलो जोवे म्हणजे आरी ओतगोयु जानारू.

¹⁵ जेहलो लेखिलो होय, जीआ जाखो एखटो कोल्यु तियाआ किबी निकलीलू नाहा अने जीआ कोम एखटो कोल्यु तियाआ किबी कोम निकलीलू नाहा.

तीतुसोहो कुरिन्थियुसोहो मुकल्या

¹⁶ परमेश्वर धन्यवादित होय, जीआ तुमा कोअता तेज उत्साह तीतूस च्या मोनामेहे टाक्यी होय

¹⁷ का तिये आमाहा सामजाडीलो मानीत लेधलो पोन जास्तीज उत्साही ओतगोयु तो तुमापोओ आवयू होय.

¹⁸ आमू त्याआरी तिया पायहोहो पण मोकल्यीत होय तियाआ नाव सुवार्ते विषयी आखे मंडली माय पसरीलिय होय,

¹⁹ अने एवडोज नाहा पण तो मंडली त्यापोरत नियुक्त पण कोअयु गोल्यो का आव दानाआ कामामुळे आमा आरी आविलो जोवे, आमाहा ए सेवा यकोअता कोअत्लू का प्रभूऊ गौरव अने आमा मोनाआ तीयारी प्रकट ओत जाहू जोवे.

²⁰ आमू आव गोठीमे सावध रोतलू का आव उदारतेच्या कामाविषयी ज्याआ सेवा आमू कोअत्लू, कोडु आमापो दोष लागाडहु कायना.

²¹ काहाके ज्या गोठी फक्त प्रभू जागेज नाहा ताहा मांहाआरी पण हाजी होय आमाहा तियाआ चिंता कोअत्लू.

²² आमू त्याआरी आपाआ पाही पण मोकल्यीत होय ज्याहा आमाहा फासी-फासी पारखिल्यु जास्तीज गोठीमेहे उत्साही पाल्यू होय पण ओमे तुमापो तियाआ वोडी खात्री होय, यामुळे का तो फासी जाखो उत्साही होय.

²³ जर कोडु तीतुसच्या विषयी फुसनारू ताहा तो माआ होबती होय अने माआ आरिज काम कोअतेहे होय; अने जर आमू पाही विषयी फुसनारू ताहा ते मंडली वांही संदेश आपणारो अने ख्रिस्ताचे गौरव होय.

²⁴ कोईत आपाआ प्रेम अने आमाआ तो गर्व जो तुमाआ विषयी होय मंडली आगाडी पुरो कोईत तियाहा देखाव.